InfoHub Logo

Búgin Parlament Májilisiniń jalpy otyrysynda depýtat Danıa Espaeva daryndy jastardyń shetelge ketýine qoldanystaǵy granttardy bólý júıesi sebep bolyp otyrǵanyn málim etti, dep QazAqparat habarlaıdy.

 «Ókinishke qaraı, UBT men granttardy taǵaıyndaýdyń daýly sıpaty, sondaı-aq osymen baılanysty emosıalyq kúızelister jyldar boıy jalǵasyp keledi jáne ol sozylmaly máselege aınaldy. Sonymen qatar bul jaǵdaı kóptegen jastardy  qajetsiz mashaqattan aınalyp ótý maqsatynda basqa da joldardy izdestirýge ıtermelep otyr. Oǵan qosa, osyndaı múmkindikterdi, ıaǵnı memlekettik granttardy Reseıdiń, Chehıanyń, Qytaıdyń jáne basqa da elderdiń joǵary oqý oryndary usynyp otyrǵanyn umytpaýǵa tıispiz», - dep toqtaldy ol.

Osy oraıda depýtat keıbir málimetterge toqtala kele, tek bıyldyń ózinde UBT-dan bas tartyp, sheteldik granttar boıynsha bilim alýǵa Qazaqstannyń 40 myń túlegi baǵyt alǵanyn, bul óz kezeginde túlekterdiń 30 paıyzǵa jýyǵy ekenin atap ótti. Bul turǵyda D. Espaeva qoldanystaǵy granttardy bólý júıesi elden talapty jastardyń shetelge qonys aýdarýyn yntalandyryp otyrǵanyn sóz etti.

Onyń paıymynsha, reseılik, eýropalyq jáne qytaılyq ýnıversıtetter UBT-nyń qajetinsiz-aq talapty jastardy iriktep jatyr, sondaı-aq olardyń arasyndaǵy kóptegen jas mamandar endi Qazaqstanǵa oralmaýy múmkin.

«Birinshiden, 110 baldan joǵary alǵan, alaıda tańdaǵan mamandyǵymen grant ıelenbegen talapkerlerge kelesi kezekte UBT boıynsha pánder aıyrmashylyǵyn tapsyrý talabymen bólinbengen granttary bar basqa mamandyqtar boıynsha grant usynǵan durys. Ekinshiden, UBT-dan bólek, qabyldaý emtıhany júıesi arqyly joǵary oqý ornyna túsýdiń balamaly nusqalaryn talapkerler tańdaýyna engizý múmkindigin qarastyrǵan jón. Úshinshiden, daryndy ári talapty jastardyń shetelge qonys aýdarýyn toqtatý men ǵalymdar men jas mamandardyń elge oralýyn yntalandyratyn baǵdarlamany ázirleý kerek»,  - dedi depýtat. 

---