InfoHub Logo

Bizdiń úıdiń qasynda bir shal turady. Turmaıdy da, bireýdiń kúrkesin panalap jatady. Óıtkeni onyń úıi de, bala-shaǵasy da, týysqandary da joq.

Ózi qazaq ta orys ta emes, biraq túri osy ekeýine de uqsaıdy. Eki tilde de sóılemeıdi. Sebebi — mylqaý. Ábden qartaıǵan. Beti myj-myj. Túri aıanyshty. Ústindegi kıimderi de jyrtyq-jyrtyq. Qysy-jazy kir-kir paltosyn tastamaıdy.

Ákemnen bul kim dep surap edim:

— Sordan kóz ashpaǵan jetim shal ǵoı beıshara. Qaıtesiń ony — dedi.

Shal anda-sanda qaltaqtap dalaǵa shyǵyp, qubyrdan kishkene baqyrmen sý alady. Jerde jatqan temekiniń qaldyqtaryn teredi.

Bir kúni dúkennen nan ákele jatyr edim, sharbaqtan basyn sozyp birdeńke aıtqysy keldi. Qaryny ashqan sıaqty. Aıap kettim de nandy bere saldym. Qýandy. Kúleıin dep edi, kúle almady. Júgire jóneldim.

Nanǵa jibergen sheshem:

— Kóshedegi qaıyrshylardy sen asyraıyn dep pe ediń? Neń bar? — dep qatty urysty.

Sonda da aıap júrdim. Biraq oǵan kórshi balalardyń jandary ashyǵan joq. Ylǵı jolda kezdesse mazaqtap, ıterip, sýǵa qulatyp, qashyp ketedi. Olarǵa shalǵa tımeńder dep aıta almaımyn. Menen úlken balalar. Toǵyzynshy, onynshy klastarda oqıdy.

Nege sorlady eken, jaman adam bolǵan shyǵar, ondaı kisilerdiń bári qartaıǵanda osylaı júre me dep oıladym.

Taǵy da aparyp bereıin dep, tamaq orap alyp jatqanda sheshem kórip qoıyp, aıqaı saldy: Ákeme aıtty:

— Qudaı-aı, ánebir shal pále boldy ǵoı. Bul jerden kóshemiz be, ne isteımiz?! — dep.

Ákem túnerip kóp otyrdy.

— Kóshkende qaıda barasyń? Qaıda barsań da qaıyrshylar qaptap júr. Ózimiz de qaıyrshylyqtyń az-aq aldynda otyrmyz — dedi.

Sabaqtan kelsem, kórshiniń úıiniń janynan jedel járdem mashınasy ketip barady. Bireý aýyryp qalǵan shyǵar dedim.

Sheshem qýanyp júr eken. Jetim shal ólip qalypty. Men qýanǵan joqpyn.

---