InfoHub Logo

Erte, erte, ertede orman alqabynda kenetten dúleı órt bastaldy. Ań ataýlynyń bári basy aýǵan jaqqa qashyp, bosyp ketti. Ý-shý etken daýystan, jerdiń ystyq lebi-betin sharpyp, uıqysynan oıanǵan tasbaqa ot-jalynnyń ózine jaqyndap qalǵanyn kórgende bir orynda typyrlady da qaldy. Qansha tyryssa da jybyrlap júrip, jaıbasarlyǵynyń kesiri-nen tilsiz jaýdan alystaı almaı-aq qoıǵany. Sálden soń bıik shoqpar tastyń úshkir ushynda otyrǵan maımyldy kórip, qýanyp ketti. Jalbaryna járdem berýin surady.

— Eger meni ólimnen qutqarsań, qashan bolsa da jaqsylyǵyńdy óteımin, — dedi úzdigip.

Jetken bıigine masattanǵan maımyl mıyǵynan kúldi.

Jerde ilbip, bir aýdarylyp, myń súrinip, áreń jyljyp, jan­dármen kúı keshken tasbaqany bıikten kórip qalǵan jolba­rystyń júregi búlk etti: «Tirshiliktiń bir jándigi alas uryp júr. Ony ólimge qıýǵa bola ma?»

Kóp oılap jatpastan quıǵytyp baryp, aldyńǵy aıaǵymen orap aldy da, oty sóngen shoqylarǵa qaraı alyp ushty.

Jyljyp jyldar óte berdi. Qara kúıe bolǵan atyrap keıinnen gúlge toldy. Sonshama ýaqytta tasbaqa ǵana mazasyz kúı keshti. Ol ózine ómir syılaǵan jolbarysty umytpady. Qudaı tasbaqa-nyń  tilegin berip, kúzdiń bir keshinde shyǵyp kele jatqan kúnniń alaý reńin, sodan keıin kelgen barqyt túnniń qara boıaýyn kezek-kezek almastyryp, jolbarystyń terisine darytty. Osylaısha kúnniń jarqyn nury men túnniń túsi jolaq-jolaq óń berip, jolbarys eń sulý bolyp shyǵa keldi. Osynshama qudiret tylsymy tasbaqadan kelgenin jolbarystyń ózi de bilgen joq. Búkil jan-janýar jolbarystyń terisine qyzyǵýmen qaıran qalysty.

Maımyldyń ishin qyzǵanysh qaryp, opynyp, ókindi. Áli kúnge deıin jolbarys júrgen jerde ol óziniń usqynsyz túrin kórsetýge uıalyp, tyǵylyp qalatyn kórinedi...

---