Júzdesý
BİR AKTİLİ MISTIKALYQ DRAMA
QATYSÝSHYLAR:
Berik
Aıdos
Gúlsara
Ajar
Alpamys
Alpamystan basqasy 36-38 jas shamasynda, klastastar.
Sahnada jaqsy aǵashtan soǵylǵan taý-ormandarda bolatyn demalys úıi. Kamın. Kamınniń aldynda aıýdyń terisi jatyr. Ot mazdap janyp tur. Mamyrajaı, jaıly kórinis. Kenet sahnaǵa erbıip-erbıip, úrikken tórt adam shyǵady.
Gúlsara. /Berikke/. Aıtqan jeriń osy ma?
Berik. Joq, árıne.
Aıdos. Ertegi sıaqty. Qazir hor qyzy shyǵa keletindeı.
Gúlsara. Bul bolmasa, kettik onda.
Berik. Qaıda?
Gúlsara. Syrtqa shyǵaıyq.
Berik. Sodan soń?
Gúlsara. Telefon shal aýylǵa.
Berik. Taýdyń arasynda telefon ustamaıdy.
Ajar. Iesi kelse, bále qylar. Dalada kúteıik shynynda.
Berik. Tura turyńdarshy.
Aıdos. Báli, dastarhan jaıýly, ishimdik, qazy-qarta. Mynaý bir keremet jer boldy ǵoı!
Gúlsara. Qonaq kútip otyrǵan shyǵar.
Berik. Aý, qojaıyn! Qojaıyn!
Ajar. Jigitter, keteıikshi. Ne degen qorqynyshty úı. Sýyq, qaltyrap baramyn.
Berik /ashýlanyp/. Tura turyńdarshy. Kim bar munda!
Gúlsara. Eshkim joq.
Ajar. Boldy deımin, syrtta kúteıik, uıat bolady.
Gúlsara. Bir nársesi joǵalsa, bizden kórer.
Aıdos. Qatyndar, qaqyldamańdarshy.
Gúlsara. Saılanyp shyqpaısyńdar ma. Senderdi de erkek deıdi-aý.
Aıdos. Osyndaı da erkekke jete almaı júrgen joqsyń ba.
Gúlsara. Pishtý! Sen sıaqty erkek kerek bolsa, on baıǵa tıer em.
Aıdos. Almaı kettiń dep jylaǵan kim edi sonda? Ne degen památyń qysqa? Qarǵap-silep, esigimniń aldyna kókbettenip otyryp alǵan joqsyń ba. Búkil aýyl betin shymshydy.
Gúlsara. Sonda qudaı saqtady meni! Saǵan tısem jetiser em. Jaqsy erkekti qatyn tastaı ma, bir emes úsh qatyn birinen soń biri tastady!
Aıdos. Seniń qarǵysyń tıdi. Aqyry almaıtynymdy kórdiń, baqyt tilep qala berseń, sen de jaqsy, men de jaqsy, tympıyp otyrar edik.
Gúlsara /qolyn shyǵarady/. Mine, baqyt emes! Mine ne tilmeımin men saǵan!
Aıdos. Oıdoıt! Maǵan ǵoı úsh qatyn tıdi, al seni birde bir erkek alǵan joq!
Ajar. Boldy qoıyńdarshy, ne boldy senderge?
Gúlsara. Iá, otyraıyn sodan soń shapyldasyp sen sıaqty bireýmen. Allaǵa táýba, táýba, táýba, táýba!!! Eshkim almasa da, arym taza!
Berik myrs etip kúlip jiberedi.
Gúlsara. Sen nemenege jetisip kúlesiń?
Berik. Jaı... Eshkim joq deımin... mynda.
Ajar. Iesiz úı emes ekeni jáne anyq.
Aıdos. Mystan kempirdiń úıi bolyp shyqsa...
Gúlsara. Qıalı, prıdýrak!
Ajar. Qoıyńdarshy, basym aýyryp ketti.
Berik. Qojaıyn!
Eshkim jaýap bermeıdi.
Gúlsara. Ne isteımiz.
Berik. Kúte turaıyq. Basqa ne amal bar?
Ajar. Jaıaýlatyp bolsa da kete bereıikshi. Myna jer birtúrli.
Aıdos. Ne boldy kóleńkeńnen shoshyp. Tórt balany qalaı tapqansyń.
Berik /óz-ózimen sóıleskendeı oıly/. Qorqa-qorqa tapqan bolyp tur ǵoı.
Ajar. Ketshi!
Kúledi. Alpamys shyǵady. Ol bozbala, onynshy klastyń oqýshysy beınesinde qalǵan.
Alpamys. Assalamaǵaleıkúm! Tórletińizder! Senderdi kútip otyrmyn.
Berik pen Aıdos qol berip amandasady.
Berik. Siz bizdi bireýmen shatastyrdyńyz.
Aıdos. Mynda mashınamyz óship qaldy. Janarmaı taýsyldy.
Ajar. Úı turǵan soń kire saldyq. Aıyp etpeńiz.
Gúlsara. Túriń sondaı tanys. Kimniń balasysyń?
Alpamys. Sender meni tanısyńdar. Men tap senderdi kútip otyrmyn. Asyqpaı jaıǵasa berińder. Dám alyńdar. Asyqpańdar. Qazir bárin sheshemiz. Men qazir.
Berik. Áı, inishek!
Alpamys. Qazir, qazir...
Shyǵyp ketedi. Qalǵandary ań-tań.
Ajar. Baıqus bala bireýmen shatastyrdy-aý bizdi.
Gúlsara. Júzi tanys. Ólgenshe tanys.
Aıdos. Men bildim kimge uqsaıtynyn.
Berik. Tek aıtpashy. Aıtpashy...
Ajar. Kimge?
Aıdos /Berikke jaltaqtap/. Nege aıtpaımyn? Sen de baıqadyń ba?
Gúlsara. Iá, esime tústi. Júrińder, kettik qurysyn.
Aıdos. Tura qashqanymyz birtúrli bolmaı ma?
Berik. Túk te etpeıdi.
Olar esikke júgiredi. Esik jabyq. Ary-beri árekettenip, asha almaı qaıta oralady.
Ajar. Túsinbedim. Aıtsańdarshy, ne bul?
Gúlsara. Ana bala, shynymen baıqamadyń ba? Tup-týra Alpamys?
Ajar. Qaı... Al-pa-mys...
Gúlsara. Sol. Tup-týra sol.
Ajar. Múmkin emes...
Aıdos. Álde balasy ma? Jap-jas. Alpamys bizdiń qurdas qoı. Bul jaı, kezdeısoq bireý...
Gúlsara. Qaıdaǵy balasy? Ol kimge bala jasap úlgerdi? Botagózdi sen aldyń. Ol tipti senen de kótergen joq.
Berik. Iá, biraq. Túý! Júregim ushyp ketti ǵoı. Alpamys bolsa, qartaıar edi ǵoı...
Kúledi.
Berik. Degenmen, jyndymyz! Joq jerden shoshyp.
Ajar. Onda nege esik jabyq?
Gúlsara. Áı, bala! Bala qaıdasyń?!
Alpamys kelip kiredi.
Aıdos. Áı, kókem, bizdi qamap ketkeniń ne?
Alpamys. A, esik pe? Sondaıy bar. İshten ashylmaı qalady.
Berik /ózimen-ózi sóılep/. Joq, degenmen, aýmaıdy. Beti, shashy... Bul múmkin be? Áı, bala, aty-jóniń kim?
Alpamys /kúlip/. Alpamys.
Bári óre túregeledi.
Ajar. Qaı Alpamys?
Alpamys. Alpamys. Alpamys.
Berik. Durys-durys.
Aıdos. Jaı, bizdiń bir tanysymyzǵa uqsaıdy ekensiń.
Alpamys. Men sol Alpamyspyn.
Gúlsara. Qaı sol?
Alpamys. Gúlsara, Ajar, Berik, Aıdos! Bul menmin. Alpamyspyn!
Ajar shyńǵyryp jiberedi. Gúlsara esikke umtylady. Esik jabyq.
Berik. Bala, qaljyńdy qoı. Alpamys... bizdiń Alpamys sonaý bala kezde, mektep kezinde úshti-kúıli joǵalyp ketken. Taýǵa shyǵyp adasyp ketken... Seniń ol bolýyń múmkin emes.
Alpamys. Nege múmkin emes?
Berik. Onda nege qartaımaǵansyń?
Alpamys /muńaıyp/. Bilmeımin. Jaraıdy, sender ázir otyra turyńdar. Dámnen aýyz tıińder. Barlyǵy sender úshin jasalǵan. Sender keledi degen soń bárin ózim ázirledim. Qoryqpańdar. Qazir bárin túsindiremin. Sál shydańdar.
Alpamys shyǵyp keted. Gúlsara dastarhanǵa baryp, júzimnen alyp jeı bastaıdy. Berik araq quıyp alyp qaǵyp salady, ony kórip Aıdos ta ishedi.
Ajar. Bizge de quısańdarshy.
Gúlsara. Berik sen róldesiń ǵoı. İshpe.
Aıdos. Kishkene eshnárse etpeıdi. Asýdan ótip aldyq qoı.
Berik. Qıyspaıdy. Ne deseńder de qıyspaıdy... Birinshiden, sol qalpy, jap-jas... Ekinshiden... ekinshiden... umytyp qaldym... ne aıtaıyn dep edim...
Aıdos. Eger ol tabylsa, aýylǵa oralsa, biz estir edik qoı. Áke-sheshesi aıtar edi... bilmeımin... Múmkin emes!
Gúlsara. Biraq Alpamys. Alpamystyń naq ózi!
Ajar. Álde ony sol joly basqa planetalyqtar alyp ketti me eken...
Aıdos. Iá, qısynǵa keledi...
Berik. Bizdi kútip otyrdym deıdi... Mashınanyń týra osynda buzylatynyn qaıdan bildi sonda?
Gúlsara. Demek, Alpamys ólmegen boldy ǵoı?
Ajar. Ol taýda adasyp ketpep pe edi? Óli-tirisin eshkim bilmeıdi emes pe?
Berik. Bizden basqa...
Gúlsara. Aıtpa!
Berik. Nege? Nege aıtpaımyz? Endi myna psıhty Alpamys dep qabyldaımyz ba? Kimdi aldaımyz? Ózimizdi qosyp aldaımyz ba? Mynaý, kim ekeni belgisiz bireý Alpamyspyn dese, soǵan senemiz be? Alpamys ólgen! Ne boldy senderge? Ózimiz, myna tórteýimiz emes pe ony kómgen!
Ajar /betin basyp/. Jáne... óltirgen...
Gúlsara men Ajar birin-biri qushaqtap, teńselip jylaıdy.
Ajar. Meni nege alyp shyqtyńdar úıden. Barmaımyn desem qoıdyńdar ma. Ne izdep keldim munda. Qudaı-aı, typ-tynysh úıde otyra bermeı nem bar edi...
Gúlsara. Berik, sen ǵoı shyǵarǵan. Taýǵa baraıyq, demalaıyq dep...
Aıdos. Sodan beri, sol jazdan beri taýǵa shyqpap edim... Nemenem bar edi... Berik sen, sen kináli...
Berik. Men? Alpamysqa pyshaq suqqan men be sonda?
Aıdos /birden jýasyp/. Ózi kelip pyshaqqa uryndy ǵoı. Maǵan neǵyl deısińder. Báriń sonda boldyńdar ǵoı.
Gúlsara /úzip-úzip/. Iá-ıá. Júgirip kelip ekpinmen, seniń qolyńdaǵy pyshaqqa qulady. Esimde. Ne bolǵanyn túsinip úlgerdik pe? Shoshyp kettik. Al ol jatty, appaq bolyp ketken. Sodan soń qan. Jerdiń bári qan boldy ǵoı.
Aıdos. Mende kiná joq.
Berik. Seniń jalǵyz kináń sodan keıin Botagózge úılengeniń boldy.
Gúlsara. Iá, sodan keıin Botagózge úılendiń...Sen maǵan... ekeýmiz... Al sen Botagózge.
Ajar. Ol kezdikke qulaǵan joq. Sen kezenip turǵan pyshaqqa uryndy. Men qarap turdym.
Gúlsara. Joq!
Berik. Ajar, abaıla.Qorqynyshty nárse aıtyp tursyń.
Aıdos. Ajar, bilmeseń, kórmeseń, adamdy beker qaralama.
Ajar. Iá-ıá. Sol bir sýret kóz aldymnan keter emes. Alpamys júgirip keledi, aıtpaqshy, ol kimnen qashty sol túni? Biz jóndep sóılesken de joqpyz ǵoı. Asyǵys qoshtastyq, bul taqyrypqa qaıtyp oralǵan emespiz, endi mine, jıyrma jyldyqta kezdeskende, Alpamys ta keldi. Bul qalaı boldy?
Berik. Ajar, sandyraqtama. Bul Alpamys emes.
Aıdos. Alpamysqa uqsaıtyn basqa bozbala. Ne boldy senderge? Beker, beker bas qostyq. Nemenege jeliktik? Beker boldy bári.
Gúlsara. Sen nege Botagózge úılendiń? Ekeýmiz sóz baılasyp júrdik te, kenet bir kúnde Botagózdi aparyp túsirdiń. Nege?
Aıdos. Jıyrma jyl buryn bolǵan nárseni qazbalamashy.
Berik /keketip/. Áıeldiń ótinishin jerge tastamasańshy, Aıdos. Túsindirseńshi.
Aıdos. Botagózden keıin men taǵy eki qatyn aldym. Solardy nege suramaısyń?
Gúlsara. Sebebi Botagóz Alpamystyń qyzy bolatyn. Olar úshinshi klastan juptary jazylmaıtyn. Eger... Eger Alpamys úshti-kúıli joǵalmaǵanda úılenetin edi. Alpamys joǵala salysymen, sen onyń qyzyna úılenesiń. Al Ajar seni Alpamysqa pyshaqty ádeıi suqty dep tur. Mine, meniń aıtpaǵym! Bálkim sen Alpamysty ádeıi óltirgen shyǵarsyń! Botagóz úshin.
Berik. Oıbaı! Oıbaı! Alpamysty eshkim óltirgen joq, ne aıtyp kettiń, Gúlsara!
Ajar. Biz qudaıdyń qaharyna iliktik, dostar.
Aıdos. Botagóz úshin... Botagóz úshin... Botagóz úshin men on Alpamysty óltirer edim.
Gúlsara /jylaıdy/. Mine, mine...
Berik. Aıdos, ne boldy saǵan? Sen úshin bárimiz ketemiz. Ózińe óziń ıe bol. Sabyr saqta. Iesiz taýda júrsek te artyq nárse aıtpa. Myna bala Alpamysqa uqsaıdy eken, bir jerde jasyryn kamera turmaǵanyna kim kepil. Topyrlap tobymyzben sottalyp ketpeıik.
Aıdos. Sol joly bárin moıyndap túrmege otyrǵanda endigi shyǵatyn edik.
Berik. Ne aıtyp tursyń? Onda myna ómirdi kim súrer edi?
Aıdos. Osy ómir dep ókinseń sen ókinetin shyǵarsyń, meniń ómirimdi ıtke bermesin.
Ajar. Biz qudaıdyń qaharyna ushyraǵan jandarmyz.
Gúlsara. Jaraıdy, meni qoıshy, mine qyryqqa keldim, ne baı joq, ne bala joq. Qara basym saýsyldap áli júrmin. Sen nemenege ókpelisiń Ajar. Altyn asyqtaı tórt balań bar. Úlken qyzyńdy uzattyń. Ulyń – stýdent. Baıyń qasyńda.
Ajar. Bala ósken soń óz qyzyǵy ózinde, ushqan uıasyna burynǵydaı qaıyrylmaıdy eken. Baıyń bar deısiń, onyń da óz qyzyǵy ózinde. Qyryqqa endi shyǵyp qylshyldaǵan der shaǵy.
Gúlsara. Jaraıdy, erteń nemere súıesiń, barlyǵy umytylyp ketedi.
Ajar. Qaıdam...
Aıdos. Qyzdar, qyzdar, ne býdem o grýstnom. Men tamadamyn ba, joq álde tamada emespin be. Jańaǵy bala dám-tuzdan aýyz tıip otyryńdar dedi. Kóńil kótereıik. Senderdiń áıel ekenderiń ras bolsa, bizge shaı berińder. Al biz araq quıaıyq. Bárin umytaıyq, kúleıik. Tek jaqsy nárselerdi eske alaıyq.
Alpamys kelip kiredi. Barlyǵy úrpıip tym-tyrys bolyp qalady.
Alpamys. Durys, dastarhanǵa kelińder.
Berik. Balaqaı, meniń ulymdaı ekensiń, sen degeniń túrpideı tıip tur.
Alpamys. Keshirińder...
Berik. Esimiń kim bolady ózińniń? Jóndep jónińdi aıtshy.
Alpamys. Men Alpamyspyn ǵoı.
Barlyǵy qaıta shoshyp ketedi.
Berik. Sen Alpamysty qaıdan bilesiń?
Alpamys. Qaıdan bilgeni qalaı? Men Alpamyspyn.
Gúlsara. Berik, qoıa tur, attas bireý shyǵar.
Aıdos. Attas, túrles, bet-álpettes.
Ajar. Balaqaı, olaı qaljyńdama úlkendermen.
Alpamys. Men kádimgi Kókparbaev Alpamyspyn. Ózderińniń klastastaryń.
Ajar esinen tanyp qulaıdy. Oǵan Gúlsara júgirip baryp medısınalyq manıpýlásıalar jasap jatyr.
Berik. Múmkin emes.
Aıdos. Onda nege qartaımaǵansyń?
Alpamys. Endi qartaımaıtyn jerge attandyrdyńdar ǵoı.
Gúlsara /aıǵaılap/. Jigitter, senbeńder, bul podstava. Esh nárse aıtpańdar!
Berik. Bala, shynyńdy aıt, sen Alpamystyń baýyrysyń ba? Ulysyń ba álde? Bizdi qaıdan bilesiń?
Aıdos. Bálkim akter... Bireý jaldap ádeıi kameraǵa túsirip jatqan bolar. Berik, sen depýtat bolamyn dep júrsiń ǵoı, sen úshin osynyń bári.
Berik. Iá, jaýlarym jetedi.
Gúlsara Ajardy ornynan turǵyzyp oryndyqqa otyrǵyzady.
Ajar. Bul árýaq. Qalaı túsinbeısińder. Bul Alpamystyń arýaǵy kelip turǵan. Ah, Aıdos, Aıdos, sen ony nege óltirdiń... Óldiń be sol Botagózdi almasań... Ol saǵan qatyn bolyp ta jarytqan joq qoı... Úsh aı turdy ma? Qansha turdyńdar? Sol úshin endi mine ómir boıy azap shegýdemiz. Óldiń be sol qatyn úshin adam óltirip? Jaýyz, jaýyz...
Alpamys. Meni Aıdos óltirgen joq.
Gúlsara. Endi kim?
Alpamys. Óltigen adamnyń ózi biledi.
Aıdos. Onda sol adamdy alyp qal da qalǵanymyzdy bosat.
Ajar. Bosata gór bizdi, o, arýaq!
Berik. Áı, jyndy boldyńdar ma? Nemene qýyp kettińder báriń?
Ajar. Álde Berik sen be? Sen be óltirgen myna kúnásiz beıshara Alpamysty?
Berik. Mynalar qıyn boldy ǵoı. /Alpamysqa/ Aqsha ma saǵan keregi? Qansha? Aıtshy, taýyp beremin. Qansha surasań sonsha taýyp beremin. Mıllıoner emespin, biraq myna tozaqtan shyǵý úshin bárine daıynmyn.
Alpamys. Joq, maǵan aqsha kerek emes.
Berik. Endi ne?
Ajar. Oǵan bizdiń qanymyzdy ishý kerek. Kek! Kek onyń kóksegeni.
Aıdos. Sonymen seni kim óltirdi?
Berik. Dál qazir bul sonshalyqty mańyzdy ma?
Aıdos. Men úshin mańyzdy. Osy kúnge deıin ıt azapta ómir keshtim. Pyshaq meniń qolymda boldy. Alaýdyń basynda et týrap otyrǵanmyn. Qyzdar et aspaımyz, káýap jasańdar dedi ǵoı. Oıymda eshnárse joq. Kenet apyr-topyr qarbalas boldy da ketti, qarańǵyda bireý qorbańdap maǵan júgirdi, ornymnan turdym. Kózdi ashyp jumǵansha bireý kelip moınyma asyldy, qolymdaǵy pyshaq jyp-jyly bolyp ketti. Qoıý, jabysqaq suıyqtyq quıylyp jatyr, quıylyp jatyr. Ol seniń qanyń eken, Alpamys. Sosyn, sosyn ózderiń bilesińder...
Berik /basyn shaıqap/. I ty Brýd týda je. Bul – Alpamys emes!
Ajar. Arýlap kómilmedi, janazasy da shyqpady.
Berik /keketip/. Áke-sheshesi as berdi ǵoı.
Ajar. Úsh jyldan keıin...
Gúlsara. Berik, demek sen óltirgen. Basqa eshkim bolǵan joq ol jerde. Beseýmiz ǵana boldyq. Aıdos emes, Ajar emes, men emes, demek sen. Boldy. Tochka.
Berik. Gúlsara, bul endi dál sen aıtatyn sóz emes.
Gúlsara. Nege?
Berik. Nege ekenin myna burynǵy jigitińniń kózinshe aıta bereıin be?
Gúlsara. Ekeýmizdiń ońashalanǵan sátimiz be meńzep turǵanyń?
Berik. Iá, ońashalanǵan sátimizdiń biri.
Aıdos. Ah, jezókshe!
Gúlsara. Sóıtse ne bolypty. Sen buryn ketip qaldyń. Men kelgende Alpamys... Alpamys jerde jatty... jansyz... Al sen ketip qalǵansyń...
Aıdos. Ah, jezókshe, saıqal! Botagózge úılengenimde nemene ottap meni qarǵap-silep júrsiń? Ózińniń istegeniń mynaý... Onda nege úılenbediń Gúlsaraǵa, Berik?
Berik. Qaıtyp úılenem, ol seniń qyzyń edi ǵoı.
Aıdos. Meni qudaı saqtapty. Mynany alsam, qas masqara bolǵaly tur ekenmin ǵoı.
Gúlsara. Áıtpese bulaı keremet jetisip ketpes pe ediń?
Aıdos. Úsh qatyn shyǵarsam da, sen sıaqty opasyzy bolǵan joq.
Gúlsara. Qaıdan bilesiń?
Aıdos. Ah, ty kázzzap!
Tura kep qýady, Gúlsara tura kep qashady. Jete almaı qaıtyp keledi.
Aıdos. Berik, sen she? Jigit emes ekensiń. Senderdi de dos dep júrmin-aý, aqymaq basym.
Aıdos betin basyp otyryp qalady. Ajar ony aqyryn baryp, arqasynan sıpap jubatady.
Gúlsara /ańtarylyp qaıtyp keledi/. Dala tas qarańǵy.
Aıdos. Kór soqyr bolyp qalǵan shyǵarsyń, kór soqyr bolyp qalǵyr.
Ajar. Boldy, qoı, qoı. Ashýlanba. Barlyǵy ótti, ketti...
Berik. Nemene qarańǵy, tapa tal túste.
Shyǵyp ketedi de, qaıta kiredi.
Berik. Kózge túrtse kórgisiz.
Barlyǵy syrtqa qarady. Meńireıgen qarańǵylyq.
Ajar. Qashan tún bolyp úlgerdi...
Aıdos. Ýaqyt qalaı tez ótti...
Berik. Seniń ısterıkalaryńdy qyzyqtaımyz dep, kúnniń batqanyn baıqamaı qalyppyz. Alpamys, baýyrym, kim bolsań da, biz qaıtaıyq. Kólik qaıda?
Ajar. Sonymen seni kim óltirdi?
Berik. Neń bar, oıbaı!
Aıdos. Men de sharshadym, osy toıǵanymyzben qaıtaıyq...
Alpamys. Men qalaı aıtarymdy bilmeı turmyn...
Gúlsara. Taǵy ne qaldy aıtylmaǵan?
Alpamys. Ákesi ólgendi de estirtedi deıdi ǵoı...
Berik /Gúlsaraǵa/. Valıdol bar ma?
Gúlsara basyn shaıqap, Alpamysqa qaraıdy.
Alpamys. Sender bul jerden shyǵa almaısyńdar.
Berik. Nege?
Alpamys. Sebebi dál osy jerden basqa oryn joq.
Ajar. Qandaı oryn?
Alpamys. Sender úshin.
Gúlsara. Túsinikti. Oryn joq.
Gúlsara ymdap, talaspańdar, kelise berińder degendi jetkizedi.
Ajar. Gúlsara, sen nege uqpaısyń? Bul esi aýysqan adam emes, bul arýaq.
Gúlsara. Iá, árıne, arýaq. Arýaq, bilip turmyn ǵoı.
Berik pen Aıdosqa ymdap, myna ekeýiniń de esi aýysqan degendi bildiredi. Talaspańdar dep ótinedi.
Ajar. Alpamys, seni kim óltirdi? Aıtshy.
Alpamys. Ol adam aralaryńda joq.
Berik. Ýh.........
Aıdos. Biz beseýmiz ǵana boldyq qoı.
Alpamys. Botagóz keldi artymyzdan...
Aıdos. Botagóz???
Alpamys. Men Almatyǵa oqýǵa ketemin dedim. Ol jibermeımin dedi. Sodan keıin burylyp kete bergenimde arqamnan kezdik suqty, sodan keıin taǵy, men qasha jóneldim. Ári qaraı bilmeımin. Esimdi osy jerde jıdym.
Aıdos. Ne aıtyp tursyń?
Alpamys. Al sender... Sender meni óltirdik dep oıladyńdar... Ári qaraı ózderiń bilesińder...
Gúlsara. Masqara...
Ajar. Qazir Botagóz qaıda?
Alpamys. Bilmeımin. Biraq áli tiri...
Berik. Tirisi qalaı?
Aıdos. Biz sonda ne ólimiz be?
Alpamys. Iá...
Gúlsara. Qalaısha?
Alpamys. Kólik apaty.
Berik. Mynaý shyn jyndanǵan jyndy eken.
Alpamys. Dalaǵa shyǵa almaısyńdar.
Gúlsara shyńǵyryp dalaǵa qaraı júgiredi de, qarańǵylyqqa sharǵa soǵylǵandaı soǵylyp, keri serpiledi. Ajardan basqasy shyǵýǵa áreket jasaıdy. Shyǵa almaıdy.
Berik. Sonda bul qalaı boldy?
Alpamys. Solaı...
Ajar. Alpamys. Bizdi keshirshi. Júzińdi jasyrmadyq. Taspen bastyra saldyq. Biraq ol kezde biz bala edik. Búkil ómirimiz aldymyzda bolatyn. Bolashaǵymyz úshin qoryqtyq.
Aıdos. Botagózdiń arbaýyna tústim... Kesh meni de...
Alpamys /salqyn/. Keshiretin qudaı emespin.
Aıdos. Berik, rólde sen boldyń. Demek bizdiń ólimimizge kináli sensiń.
Gúlsara. Jigitter, kináli degen sózdi aıtpaıyqshy. Kináli degen sóz óte aýyr, júregińdi ezetin jaman sóz. Eshkim kináli emes. Berik ádeıi jasady ǵoı deısiń be?
Berik. Sonda qaı jerde boldy?
Alpamys. Asýdan óte almadyńdar. Quzdan ushtyńdar.
Aıdos. Til tartpaı ketken shyǵarmyz.
Alpamys. Solaı... Jigitter, qyzdar, óte ókinishti. Júregim qars aıyrylady sender úshin.
Ajar. Sonda osy turǵanda bárimiz arýaqpyz ba?
Alpamys. Iá...
Gúlsara. Myna qol-aıaǵymyz she, bet-álpetimiz?
Alpamys. Estelik, jady. Qazir senderge osylaı yńǵaıly. Sodan keıin birte-birte ózderińniń Qudaı jaratqan qalyptaryńa túsesińder.
Ajar. Ol qandaı qalyp?
Alpamys. Nurly...
Gúlsara. Qorqynyshty emes pe?
Alpamys. Joq.
Aıdos. Bilmeımin nege ekeni, ókinish joq.
Alpamys. Aq ólimde solaı bolady...
Barlyǵy áldebir ádemi kúıde únsiz qalady.
Berik. Olaı bolsa, jigitter, qyzdar, ómirimiz oqystan úzilipti. Ázirshe adamı keıiptemiz. Ázirshe bári jaqsy, ınstınkt bitken uryp tur. Tórt kózimiz túgel. Tipti mine Alpamys ta qatarymyzǵa qosyldy.
Aıdos /keketip/. Kim kimniń qataryna qosylypty.
Berik. Saıqymazaq kekesindi osymen doǵaraıyq. Ózimizdi ólgen adamdar sıaqty salmaqty ustaıyq.
Aıdos. Sen munda ákim emessiń, qalaı ustasaq ta ózimiz bilemiz.
Berik Alpamysqa suraýly júzben qaraıdy. Ol basyn ızeıdi.
Berik. Onda jigittershe sheshemiz. Shyq, bylaı!
Gúlsara. Áı, qoıyńdar, ıdıottar!
Aıdos. Men senimen tóbelespeımin.
Berik. Nege?
Aıdos. Báribir jeńip ketesiń.
Berik. Vooot! Mine, shyndyq qaıda. Sonymen myna aq dastarhannan alyp jep otyraıyq. Bokaldaryńdy sýsynnan bosatyńdar. Meniń qýanyp otyrǵanym, Alpamysty biz óltirgen joqpyz!
Gúlsara. Alaqaı! Alaqaı!
Kenet bári kóńildenip ketedi.
Aıdos. Al, alaýlap janaıyq, do konsa alaıyq!
Gúlsara. Ýrra! Alpamys, bı bola ma?
Berik. İshpegenniń ishi ótsin!
Ajar /kópshilikke qosylmaıdy, oıly/. Men báribir senbeımin.
Berik. Nege?
Ajar. Biz ólgen bolsaq, nege osynshama kóńildi júrmiz?
Aıdos. Endi ne isteımiz?
Ajar. Bilmeımin. Kishkene qorqyp... bylaı. Jylaý kerek sıaqty.
Berik. Biz jylaımyz ba? Tiriler jylasyn.
Gúlsara. Bar ǵoı jylaıtyndar.
Ajar. Endi eń bolmasa bir-birimizdi neýjelı ne jalko...
Aıdos. Jalko... shyny kerek.
Berik. Jaraıdy, qoıyńdarshy. Bolary bolsa, amal qaısy?
I eslı moı ogon pogas
Jaleıte ne mená.
A teh, sıdevshıh stolko raz
Ý moego ogná...
Aıdos. Berik, aǵataı, moıyndashy, sen ákim bolyp jetistirgen joqsyń ǵoı. Ne istediń aıtshy? Aýyl úshin ne istediń? Qoqystan tazaladyń ba, jańa úıler saldyń ba, ózińe salǵan úıden basqa? Endi nemene ottap otyrsyń, jaleıte ne mená dep? Tebá jaleem ı vse! Qalǵandary qýanady! Dý qol shapalaq! Shymyldyq jabyldy!
Berik. Al sen ne tyndyrdyń, saıqymazaq, chert! Ózińe qarap al! Ómir boıǵy armanyń bir dý qol shapalaq edi, oǵan da jetpeı kettiń. Bezdarnyı akter, bezdarnaıa jızn!
Aıdos. Solaı-aq bolsyn, biraq men eshkimniń aqysyn jegen joqpyn.
Berik. Men kimniń aqysyn jeppin? Dáleliń bar ma?
Aıdos. Vot, qazir Qudaıdyń aldyna barǵanda dálel suraısyń. Qazir kóresiń, ákeńdi tanytady seniń!
Berik /shoshyp/. Alpamys, baýyrym, mynaý ne deıdi?
Alpamys /kúledi/. Menińshe, túk te bolmaıdy. Bári jaqsy, qoıyńdar, jigitter.
Gúlsara. Iá, ursysýǵa bolmaıdy, kishkene táýbalaryńa kelseńdershi. Aýyldyń syrtynda maevkada júrgendeı bolmaı. Imandaryńdy úıirip degendeı.
Aıdos. Iá, qurysyn, Berik, keshir.
Berik. Iá, sen de... Tirshilikte artyq ketip, kóńilińe qaıaý túsirip, júregińdi jaralasam keshir, baýyrym. Báriń keshirińder meni...
Aıdos. Meni de keshirińder.
Gúlsara. Meni de...
Ajar /sol oıly qalpy, basqalarǵa qosylmaıdy, Alpamysqa/. Ábeke, qaıta oralýǵa tipti múmkindik joq pa?
Alpamys. Kólikterińmen quzdan ushyp kettińder ǵoı. Denelerińniń mylja-myljasy shyqty. Orala almaısyń.
Ajar. Al eger, eger mylja-myljasy shyqpasa oralý múmkin be edi?
Alpamys. Jol joq. Qalaı oralasyń?
Ajar. Bir amal-aılasy bolmaı ma?
Alpamys /kúledi/. Qudaıdyń qudireti kúshti. Men bilmeımin.
Ajar. Sonda bul ne?
Alpamys. Ne?
Ajar. Osynyń bári?
Alpamys. Júzdesýsiz jibermeıdi. Bul - júzdesý. Júzdesý.
Berik. Nemene júzdesý?
Alpamys. Baqyldasý de. Bilmeımin.
Berik. Jaraıdy, solaı-aq bolsyn. Sen... sen she? Ólgende sen de júzdestiń be?
Alpamys. Iá...
Berik. Kimmen?
Alpamys. Ákemmen...
Aıdos. I?
Alpamys. Júzdestik.
Gúlsara. Sosyn?
Alpamys. Sosyn ári óttim. Bul - tabaldyryq. Qazirgi.
Ajar. Ana jaqta ne bar?
Alpamys. Ómir.
Berik. Endi nege qaıta myna jaqta júrsiń?
Alpamys. Ákeldi ǵoı. Senderdi qarsy alý úshin.
Gúlsara. Basqa adam tabylmaı qaldy ma? Meniń ákem qaıda, mysaly?
Ajar. Iá... meniń anam... ol nege qarsy almady meni?
Alpamys. Sebebi sender meni suradyńdar.
Aıdos. Men seni oılaǵan joqpyn.
Ajar. Men de.
Berik. Meniń de seni qalaýym múmkin emes.
Gúlsara. Ótirik!
Alpamys /jaılap, eppen/. Meni ómir boıy oılaýmen kelesińder. Meni oıǵa almaǵan birde bir kúnderiń bolǵan emes.
Berik. Iá...
Gúlsara. Ras...
Alpamys. Olaı bolsa, dostar, júrińder.
Aıdos. Alpamys, qolyńnan ustap alsam bola ma?
Alpamys. Kel.
Olar qol ustasyp, appaq araıly álemge kirip ketedi.
Sońy
You Might Also Like
