InfoHub Logo

Baıaǵy zamanda teńiz jaǵasyndaǵy eldi-mekenderdiń birinde mynadaı oqıǵa oryn alǵan eken. Ádettegideı kún shyǵarda áıel, bala-shaǵalar izgi tilekterin aıtyp erkekterdi teńizge shyǵaryp salady. Jelkenderi ashylǵan kemeler jaǵadan uzap, birazdan soń kózden ǵaıyp bolyp, kókjıekten kórinbeı ketedi. Jaǵalaýdaǵy el bolǵandyqtan balyq aýlaý – bulardyń negizgi tirshilik kózi bolatyn. Balyqshylardyń sol kúngi balyq túsimi berekeli bolady. Biraq keshke taıaý qaıtar kezde aspan túnerip qatty daýyl bastalady. Daýyldyń joıqyndyǵy sonshalyq kóz ashtyrmaıtyndaı dárejede edi. Áıel, bala-shaǵa jaǵaǵa júgirisip, Jaratqanǵa duǵa etip jalbaryna bastaıdy. Báriniń kózderi jasqa tolyp, kóńilderi jabyrqaýly. Sol sátte aýyldyń eń bıik jerinde ornalasqan bir úıden órt shyǵady. Áıelder men balalar órtti sóndirý úshin qyrǵa qaraı jóneledi. Sóndirmek bolyp qansha talpynǵandarymen eshteńe shyqpaıdy. Jeldiń áserimen órt odan saıyn alaýlap kúsheıe túsedi. Ár úıdiń asqar taý áke, aǵa býyndary keletin ýaqytynan tym uzaq keshikkendigi bárine úlken ýaıym edi. Onyń ústine myna órttiń shyǵýy qaıǵy ústine qaıǵy qosqan edi. Túnniń edáýir bóligi ótip, laýlaǵan otpen áli de arpalysyp jatqanda jaǵadaǵy balalardyń «kele jatyr! kele jatyr!» degen aıqaıy estiledi. Bári jaǵaǵa júgiredi. Kemelerdi kórýmen kózderine qýanyshtyń jasy kelip, kóńilderi jaılana bastaǵandaı. Kemeler jaǵaǵa jetip, balyqshylar kemeden túse sala bári jaqyndarymen qushaqtasa qaýyshady. Tek úıi janǵan áıel kúıeýine muńaıa qarap, qyr jaqty meńzep: «Qurydyq, úıimiz, ishindegi búkil jıǵan-tergenderimiz bári janyp kókke ushty» -deıdi. Kúıeýi bolsa kúlimdep: «Úıimizdiń janǵany qandaı jaqsy bolǵan. Daýyldyń kesirinen baǵytymyzdan adasyp, ábden ábigerge tústik. Janǵan úıimizdiń jaryǵynyń arqasynda búkil kemeler jolyn taýyp, jaǵaǵa aman-esen oraldyq! Teńizde taǵy biraz kidirgende sýǵa keter edik» deıdi.

---