InfoHub Logo

Oblatkom predsedateli Orynbetov kesh aldynda aýdan ortalyǵyndaǵy meımanhanaǵa kelip toqtady. Bul aýdan ortalyǵy úlken poezd jolynyń toraby Jandyaǵash degen stansıa edi. Sondyqtan munda únemi bir poezdan túsken adam ekinshi poezǵa minip, únemi sapyrylys, bolyp jatatyn. Sondyqtan osyndaǵy kishkentaı meımanhana adamǵa lyq tolyp, bos oryn bolmaıtyn. Orynbetov kishkentaı meımanhananyń aıaqtaı aýyz úıine kirip, dem alyp otyrdy.

Álden ýaqytta osy meımanhananyń ári qojasy, ári ákimgeri eki qoly ıyǵyna deıin ashyq, kóıleginiń oıyntasy anaryna jetip turǵan juqa jibek kóılek kıgen Rábıla keldi. Ol kirgen bette-aq jan-jaǵyna qarap:

— Otyrmaı-aq qoıyńyz, meımanhanada oryn joq — dep jaýapty kelte qaıyrdy. Orynbetov jaı ǵana:

— Eń bolmasa, osynda otyryp shyǵýǵa rýqsat etińiz,— dedi. Rábıla muny áńgimege aınalyp estimegen boldy. Tipti azdan keıin ol syrtqa shyǵyp ketti. Rábıla qaıta kirgende Orynbetov meımanhanaǵa qonyp jatqan bireýmen áńgimelesip otyr edi. Rábıla áńgimeden onyń qaladan kelgenin ańǵaryp qaldy.

— Siz qaıdan keldińiz?— dep surady ol Orynbetovtan.

— Oblystan.

— Sizdiń famılıańyz kim?

— Orynbetov.

Rábıla sál úndeńkiremeı qaldy da:

— Sizge oryn bar, júrińiz,— dedi.

Ol túkpirdegi bólmege Orynbetovty ertip kelip aldymen kirip osynda buryn ornalasqan adamǵa adýyn sózder aıta bastady:

— Siz jónińizdi tabyńyz, mynaý orynǵa uıatty adamdy ornalastyramyn. '

Tósekte jatqan adam basyn kóterip aldy. Jas jigit eken. Ol:

— Ózim stýdentpin, munda tanysym joq, kesh batqanda qaıda barmaqpyn.

Rábıla aıǵaı shyǵaryp, mılısıa shaqyramyn degen soń stýdent amalsyz oryndy bosatpaq boldy. Oryndy bosattyrǵan Rábıla:

— Al osynda ornalasyńyz, men sizge tósek-oryn ákelip beremin, — deı berip ańyryp turyp qaldy. Óıtkeni Orynbetov stýdent «tanysym joq edi» degende-aq burylyp shyǵyp ketip edi.

---