InfoHub Logo

Bir baıdyń úsh ulynyń ortasynda bulǵaqtap ósken jalǵyz qyzy bolypty. Qyzdyń bir aıaǵynyń týa bitken syltymasy bolsa kerek. Biraq áke dáýletine shalqyp, úsh aǵasyna arqa súıep ósken qyz kókiregin kóterińki ustaıdy eken deıdi. Tipten, aıaǵynyń syltymasyn bildirtkisi kelmeı, kerbezsingen qylyǵyna qarap, tóńiregi «kerbez qyz» dep atap ketken eken.

Kerbez qyzdyń basy jas, boıy jeńil kezinde qyz «teńim emes» dep talaı jigittiń meselin qaıtarady. Osymenen júrgende qyz biraz ýaqyttyń ótkenin baıqamaı da qalady. Qyz ǵumyry qyzǵaldaqtaı kelte ǵoı, qatarynyń kóbi bas qurap, shańyraq quryp ketkende, baıdyń qyzy endi oń jaqta otyryp qalǵan kári qyz atana bastaıdy.

Arada taǵy da biraz jyl ótedi. Kúnderdiń bir kúninde bul aýylǵa bir jigit keledi. Aýyl-aımaqty sóz etip otyryp, baıdyń kerbez qyzynyń áli uzatylmaǵanyn estıdi. Sóıtse, bul jigittiń de bir kezderi kerbez qyzǵa kóńili ketip, sóz aıtqan eken ǵoı. Ol kezde kókiregin kóterip júretin baıdyń qyzy bu jigitti «teńim emes» dep, mańyna jolatpaı jiberipti.

Sol kezde qyzdyń áli oń jaqta otyrǵanyn estigen jigit oıǵa qalady: «Apyr-aı, bir kezderi jastyq sezimimdi ózine aýdaryp, tún uıqymdy qashyrǵan ǵashyǵym edi. Biraq meniń dáýletimdi qorashsynyp, meselimdi qaıtaryp edi. Shyn baqyttyń kilti baılyqta emes ekenin endi bildi me eken?» — dep tolǵanady. Tolǵanys ústinde otyryp, sol sezimin kúıge túsiredi. Kúıdiń bas-aıaǵyn tıanaqtap qolyn jattyqtyrǵan soń, aýyldyń bir ónerpaz jigitine qolqa salady: «Osy kúıimdi kerbez qyzǵa aınytpaı jetkizgeısiń. Kúıdi túsinip, mán-jaıyńdy suraı jatsa, jasyrmaı aıtarsyń», — deıdi.

Ýádege berik ónerpaz jigit keshikpeı-aq kerbez qyzdyń aldyna baryp, sálem kúıdi tartady. Kúı qulynshaqtaı quldyrańdap muńsyz-qamsyz áýenmen bastalady da, kelesi bir oramynda qos ishektiń asty-ústi qatar ún qatyp, qaınaǵan ómirdiń bir qýanysh, bir qaıǵy sarynyna oıysqandaı bolady. Munan ári kúıshiniń qoly saǵaqtan qaıtyp, bel býynǵa jetkende álde bir ókinishti óksik alqymnan alyp, syǵymdap turyp alǵandaı áser beredi...

Osy kezde kerbez qyz «boldy, toqtat» degendeı belgi berip, kúıdi úzip tastaıdy. Sálem kúıdi kimniń joldaǵanyn surap biledi. Sonan soń, óńi buzylyp, qamyǵa júdep kóz jasyn móldiretip syǵyp-syǵyp alady. Álden ýaqytta boıyn jınap, eńsesin túzep: «Qaıteıin, taǵdyrdyń jazýy sol da, men kerbezsip júrip, qadirimdi biletin naǵyz azamatty baıqamaı qalyppyn, baǵalaı almappyn», — dep ókinishin bildirgen eken.

Keıin osy kúı el ishine «Kerbez qyz» degen atpen tarap ketse kerek.

---