InfoHub Logo

Bir baıdyń mápelep ósirgen egiz uly bolady. Ata-ananyń tilegine saı egiz uldyń ekeýi de jurt aýzyna ilikkendeı azamat bolyp ósse kerek. Qaı iste de ekeýiniń juby jazylmaı, birine-biri súıeý bolyp, birin-biri tolyqtyryp, kórer kózdi qýantyp júredi eken.

Bir kúni baı otyryp: «Bul ekeýiniń kindigin Qudaı bir etip jaratqanda, meniń aıyrǵanym bolmas, ekeýine egiz qyzy bar úıge quda túseıin», — deıdi. Sol oımen boıjetken egiz qyzy bar úı izdep qulaǵdar bolyp júredi.

El ishi bolǵan soń ártúrli gáp kezdese bermeı me, bir úıden egiz ul týǵanda kelesi úıden egiz qyz nege týmasyn? Keshikpeı- aq, boıjetken egiz qyzy bar úı belgili bolady da, baı qulshyna qımyldap quda túsedi. Eki jaqtyń da yqylas-nıetteri jarasyp, quıryq-baýyr jesisip, tós qaǵystyrǵan quda bolysady.

Sodan ýádeli merzim jetip, qos kelinshek aq tileýmen bosaǵa attaıdy, kelin bolyp túsedi. Bir basy ekeý bolyp, eki basy tórteý bolyp, tilegi oryndalǵan baı neden aıansyn, aıaq jeter jerge jar salyp, ulan-asyr toı jasaıdy.

Biraq, bári de jazýdan ǵoı, toı qyzyp, el máre-sáre bolyp jatqanda «attandaı» shaýyp jaýshy keledi. El shetine qaraqurym qaskóı jaýdyń kılige kirgenin habarlaıdy.

Sonda otaý úıde máz-meıram bolyp otyrǵan egiz jigit jubyn jazbastan atqa qonady. Tas-túıin bolyp bekinip, qatygez jaýdyń aldyn alý úshin aǵaıynǵa uran salyp, qol bastap shyǵady.

Al qos kelinshek bolsa álginde ǵana shyrqap otyrǵan shattyq ánin muńdy zarǵa ulastyryp, Táńirge jalbarynady. Aq tileýmen qosylǵan asyl azamattarynyń aman-esen oralýyn, jaýdyń beti qaıtyp, el ishine qaıtadan tynyshtyq ornaýyn tilek etedi.

Estigen jannyń júregin eljiretken qos kelinshektiń osynaý zarly tilegin keıin bir ónerpaz dombyra tiline túsirgen eken. Sol kúıi «Qos kelinshek» degen atpen jurtqa jaıylǵan.

«Qos kelinshek» kúıi — tel buraýmen tartylatyn sanaýly ǵana kúılerdiń biri. Dombyranyń astyńǵy jáne ústińgi ishekteri bir dybysqa keltirilip tartylǵanda, shynynda da úmit-tilegi bir egiz kelinshektiń qatar shyqqan muń-syryndaı áser beredi.

---