InfoHub Logo

Jańa jyldan keıingi bir aptaǵa jýyq demalys kózdi ashyp-jumǵansha zý etip óte shyqty. Jumystyń alǵashqy kúni-aq joǵary jaqtan kelip túsken shuǵyl habarlama jergilikti basqarý úkimetin ábden ábigerge saldy. Oblys aktıvteri taıly-tuıaǵymen jınalyp ótkizgen otyrys sol kúni-aq qala, aýdan, basqarma, ortalyq, bólim, bólimshelerge quldılaı jalǵasyp, tolyqtaı bir táýlikke ulasyp ketti. Jınala qalyp aqyldasty, bas ızesip quptasty, qoıan-qoltyq juptasty, qol beristi, qol alysty...

Erteńinde-aq ádettegi jumys kúnderi aýzy-murnynan shyǵyp, shendi-shekpendilerge lyq tolyp otyratyn keńseler qańyrap bos qaldy da bári jappaı kóshege shyǵyp ketti. Árıne, kóshege degende álde bir narazylyq sherýi nemese mıtıńke shyqty dep oılap qalmańyzdar. Bizdiń qalada ondaı bolmaıdy. Bolǵan kúnniń ózinde buǵyp qalatyn basshylar men atqosshylar qalaısha jaıly-jumsaq keńselerin bos qaldyryp, dalaǵa shyǵady?

Úlken kisiniń arqasynda beıbit mamyrajaı kún keship, turaqty damýǵa nıettenip, birneshe jyl boıy bir orynda toqtap, tynysh qana múlgip turǵan jergilikti ólkede ondaı alabóten alaýyzdyq dep sanalatyn betburys bola qoıýy ekitalaı. Bolǵan kúnniń ózinde el men jerdi basqaryp otyrǵandar shyǵa ma eken, ondaı mıtıń pen sherýge. Byltyr bir sábıin kóterip, bes-alty balasyn shubyrta jetektep, onshaqty ana toptasyp kóshege shyqqan. “Ataýly áleýmettik kómek qaıda?” — dep. Osylaısha, jaı ǵana alýǵa tıis járdemaqysyn talap etkenniń ózinde olarǵa bes qarýy saı ásker men polıseılerin jiberip, ózderi qoryqqanynan ákimdiktiń jertólesine kirip ketip, mańdaılaryn túıistirip únsiz tura qalyp edi ǵoı. Olar tek birligi jarasyp kóshe tazalaýǵa ǵana shyǵa alady. Bul joly da jappaı senbilikke shyqqan beti bolatyn.

Jergilikti úkimettiń ortalyǵy sanalatyn ájeptáýir iri qalada kóshe kóp qoı. Onyń bárin jónge keltiremin, qoqystan jáne battasyp basyp qalǵan aq qar men kók muzdan tazartamyz deý ańyz bolar. At tóbelindeı shendi-shekpendiler qampıǵan qaryndarynyń ózin zorǵa kóterip júrgende, ondaı aýyr jumystan tıtyqtap, zoryǵyp ólmeı me? Sol sebepten, olardyń jantalasa tazartýǵa den qoıǵan jerleri áýejaıdan bastalyp, ákimdik pen bıleýshi partıa keńsesi turǵan ǵımaratqa deıingi aralyq qana. Sol mańda turǵan bir mektep pen emhana bar. Oǵan baratyn jerdi de tazartý kerek. Qala sharýashylyǵy kúndelikti tazartqan bolyp júrse de bul joly olar eshkimge senbedi. Ózderi kirispese, ózgeler birdeme búldiretindeı kúmándanyp, bar sharýany kózderimen kórip, qoldarymen ustaǵylary keldi. Nege?

Aıtaıyn, bul qalaǵa el astanasynan Úlken kisi ózi kelgeli jatyr. Al, ol kisiniń aralap kóretin, baryp bas suǵatyn jerleri muntazdaı taza, kórse kóz toıarlyqtaı ásem bolýǵa tıis. Sol úshin jergilikti bastyqtar ózderi bastap, halqy qostap, kóshe tazalaýǵa krisken.

Jergilikti úkimette shaǵyn bólim basqaratyn Saılaý kóshe boıyndaǵy turǵyn úılerdiń qasynan ótetin kúre joldy tazalaýǵa áriptesterimen birge qyzý kirisip jatyr edi:

— Ha, ha, ha! Myna Saılaýdyń myqshyńdap júrgen túrin qarasańshy-eı! Jaqsylap tazala-eı, meniń aýlamdy! — dep, gújildegen bir tanys daýys tas tóbesinen estildi.

Joǵaryǵa jalt qaraımyn degende, basyndaǵy qulaqshyny jerge túsip ketip edi, álgi gújildek taǵy da qarqyldap kúldi. Joǵary jaqqa qarasa, qurdasy Jaılaý eken. Besinshi qabattaǵy balkonda temeki tartyp tur.

— Úlken kisi bizdiń úıdiń jol jıegi jaǵyn ǵana emes, kireberis jaǵyn da kóremin deýi múmkin ǵoı. Bálkim, bizdiń úıdi bir aınalyp ótip, ákimdikke baratyn shyǵar. Kúńgeıin ǵana emes, teriskeıin de eskerip, aınaldyra tazartyńdar-eı! - dep, qarq-qarq kúldi de, ary qaraı kirip ketti.

Saılaý qasyndaǵy qolastyndaǵylarynan bir qysylyp, ústinen qaraıtyn basqarma basshylarynan taǵy ımenip, eshteńe deı almady. Bar qolynan kelgeni ishteı bir sybap, kijindi de qoıdy. Sonda da syrttaı sabyrly keıip tanytyp, jaıbyraqat túr jasap aldy da, qar kúreýin jalǵastyra berdi.

Úlken kisi kelerden bir kún buryn qarbalas jumys odan ary qyza tústi. İshki saıasat pen mádenıet basqarmasy qyzmetkerleri jáne bıleýshi partıanyń belsendileri álgi temeki tartqysh Jaılaýdyń úımen qatarlas turǵan eski turǵynjaılardyń ala-shubar bolyp, aıǵyzdalyp ketken kúngeı jaq qabyrǵalaryn árleýmen aınalysty. Kónetoz balkondaryn syrlap edi, ájeptáýir jańaryp, jaınap shyǵa keldi. Bul sharýa aıaqtalǵanymen kelesi mańyzdy ister taǵy da alǵa shyǵyp, sharýa shashetekten týyp jatty.

Endi, aspannyń ashyq bolýy, Úlken kisi kelip-ketkenshe qar jaýyp ketpeýi úshin din qyzmetkerleri qaladaǵy dástúrli dinderdiń birneshe ǵıbadathanalaryna bólinip alyp duǵa oqydy. İshinara ákimdiktiń arnaıy tapsyrmasymen qala shetindegi baqsy-balgerlerge baryp, qobyz tartqyzyp, jyn-periler shaqyryp qarly borannyń aldyn alýǵa tyrysty. Olardyń bul áreketterin keıbir ásire dinshilder “Jaratýshyǵa serik qosý, shırk” dep synap-sókse da, sheneýnikter oǵan pysqyryp ta qaraǵan joq. Jergilikti shendiler úshin eń bastysy, Úlken kisige serik qospasa boldy, qalǵany, dalbasa bolsa kerek. Ártúrli senim-nanymdaǵylardyń san alýan duǵa-tilekteriniń áseri bolǵan-bolmaǵanyn kim bilsin. abyroı bolǵanda, sary shunaq aıaz qansha qyssa da aspan shaıdaı ashyq turdy. Meshit ımamdary men shirkeý poptary ony Úlken kisiniń nur shapaǵatynyń arqasy dep halyqqa túsindirip qoıdy.

Qala ákimdigi qyzmetkerleri mektep, kolej, joǵary oqý oryndary muǵalimderi, oqýshy, stýdentter jáne medısına mamandarymen birge qardan tazartylǵan qara joldyń eki jaq jıegine qaz-qatar tizilip kúni boıy repetısıa jasady. Olarǵa ózderine júktelgen sharýalaryn merziminen tórt saǵat buryn bitirgen bıleýshi partıa músheleri men jas óren qanatynyń belsendileri kelip qosyldy. Sonymen áýejaıdan ákimdikke deıin sozylyp jatqan kúre joldyń qos jıegi sap túzegen adamdarǵa lyq toldy.

Saqyldaǵan sary aıazǵa qaramastan repetısıany ińirge deıin jalǵastyrdy. “Jasasyn, Úlken kisi!”, “Alǵa, bizdiń ólke!” degen urandardy túrli daýystarmen qosylyp, aıǵaılaı-aıǵaılaı tamaqtary qarlyqty. Bárine erteń tań sáride kelip, jol boıyndaǵy oryndarynda tapjylmaı turýdy mindettegen bas uıymdastyrýshy:

— Eger, kimde kim ýaqytynda kelmese, dál búgin turǵan ornyna jaıǵaspasa, ol adam qandaı qyzmette ekendigine qaramastan jumystan shyǵarylady. Solaı etýge týra keledi. Óıtkeni, bul asa mańyzdy saıası is-shara. Sondyqtan, osynda jınalǵandardan biriń de qalmaı kelip, qoldaryńdaǵy plakattaryńdy ustap, urandatyp turasyńdar! Al, endi úılerińe qaıtyńdar! Daýystaryń tunyq ári áýezdi shyǵýy úshin úılerińe barǵan soń tamaqtaryńdy soda qosylǵan jyly sýmen shaıyńdar! Tańerteń aranyń baly qosylǵan sháı iship jáne bir-bir shıki jumyrtqa jutyp alyp kelińder! — dep tapsyrma berdi.

Osy sátte jergilikti úkimet ordasynda da qyzý daıyndyq júrip jatty. Qaladaǵy eń beldi eki teatrdyń attarynan at úrketin rejıserleri el astanasynan kelgen ortalyq apparattyń qyzmetkerlerimen birlesip, mańyzdy saıası qoıylym ázirlep jatty. Qoıylym deıtindeı-aq bar. Úlken kisini áýejaıda qarsy alatyndar men jergilikti úkimet ordasyndaǵy jıynda sóz sóıleıtinderdi qyzý daıyndyqtan ótkizip jatty. Aktıv jınalysynda aldyńǵy qatarǵa otyratyndardy buryn-sońdy “Jigit sultany” baıqaýynda top jarǵan jastar men jasamys erkekterden jáne ártúrli “eń sulý arý”, “teńdesi joq mıss” konkýrsynda jeńimpaz bolǵan qyz-kelinshekterden jasaqtap qoıdy. Olarǵa tek qana bolmashy ǵana jymıyp, qýana kúlimsirep otyrý tapsyryldy. Al, betaldy yrjalaqtap kúlýge de, qabaq túıip túksıýge de qatań tıym salyndy.

Ortalyq apparattan kelgender jıynda sóz sóıleıtinderge ózderi daıyndap ákelgen mátinderdi jattatyp álek. Árkimniń ózindik oıy men shynaıy sózi emes, bireýlerdiń daıyndap bergen jasandy jalǵan birdeme bolǵandyqtan ba, kólemi eki-úsh bettik qana mátindi ıgerý de ońaı sharýa emes eken. Odan góri “Qobylandy batyr” nemese “Alpamys batyr” jyryn túgeldeı jattap ala salý op-ońaı sekildi kórindi.

Kásipker, dáriger, mektep muǵalimi jáne kitaphanashy tórteýi bergen mátindi lezde jattap ala qoıdy. Teksergen kezde múdirmeı aıtyp bere aldy. Ortalyqtan kelgen uıymdastyrýshy qaǵazdaǵy mátinge qarap turyp, álgilerdiń ár birine jatqa aıtqyzyp kórip edi. Olar óte muqıat jattaǵandary sonshalyq, útir, núkte qoıylǵan jerdiń ózinde tıisti paýzany alyp, barlyq talapty múltiksiz oryndap shyqty. İshindegi eń myqtysy kitaphanashy edi. Biraq, ony ortalyqtan kelgen ýákil onsha unatpady da ornyna aı dese aýzy, kún dese kózi bar, ózi jas bir qyzdy aldyryp, sózdi álgige jattatyp biraz ýaqytty zaıa ketirdi. Qazaqsha sóıleıtin ózge ulttyń ókilin búkil ólkeni shyr aınalyp izdegender eshkimdi tappaı bos keldi. Ony estigen ákimniń orynbasary tas-talqan bolyp ashýlandy:

— Áı, álgi Tán, Pak degender qaıda?

— Olar Almatyǵa kóship ketipti.

— Shnaıder bar emes pe?

— Eki jyl buryn Germanıaǵa ketip qalypty.

— Ózimizdiń Aleksandr she?

— Eki apta buryn Reseıge kóshipti ǵoı.

— Qoı-eı! Kolejdiń dırektory kim edi? — dep ákimniń orynbasary esimin esine túsire almaı tur edi:

— Svetlana Markovna! — dedi, kómekshisi.

— Endi, sol bar emes pe? Bilip turyp nege ala kelmedińder?

— Bardyq qoı, oǵan da...

— Kelmeımin deı me, ne?

— Joǵa, keler-aq edi...

— Ne bolyp qalypty?

— Qazaqshany umytyp qalypty.

— Áı, ol qazaq aýylynda ósken qyz edi ǵoı. Albasty basty ma, ony, nege umytady, a?

— Oǵan biz de solaı dep edik, ózimizdi kinálaı jóneldi ǵoı.

— Ne dep?

— Qalada barlyq qazaq oryssha sóıleıdi. Aýylǵa barsam, bári kóship ketipti, ıen tur. Sońǵy bes jyl boıy qazaqsha sóılesetin adam tappaı aqyry, umytyp tyndym dep ózimizdi ursyp-ursyp qýyp shyqty.

Ákimniń orynbasary amaly taýsylǵandaı eki ıyǵyn qomdap turdy da qaldy. Osy sátte ortalyq apparattan kelgen ýákil zaldyń shetinde turǵan qysyq kóz, shashy tikireıgen aryq qara jigitti shaqyrdy da:

— Qazaqsha bilesiń be? — dep surady.

— Árıne, bilemin. Qazaqpyn ǵoı.

— Bárekeldi! Erteń sen koreı ultynyń ókili bolyp sóz sóıleısiń. Túriń uqsap tur eken.

— Qoıyńyzshy aǵasy, ázilińiz be? Meniń qazaq ekenimdi bári biledi, uıat qoı.

— Eshteńe etpeıdi. Keıin jergilikti jurtqa aty-jónin moderator qate jarıalap jiberdi degendeı bir syltaý aıta salamyz. Bastysy, Úlken kisi seni tanymaıdy ǵoı. Boldy! — dep, máseleni dereý sheshe saldy.

Bárinen qıyny, jergilikti ýnıversıtettegi eń jas profesordy kóndirý boldy. Ol úshin tún jarymy aýǵansha daýlasýǵa týra keldi. Aqyry eń sońynda:

— Men bireýdiń jazyp bergen sózin jattap aıta almaımyn. Ne aıtarymdy ózim bilemin. Sondyqtan, maǵan repetısıanyń qajeti joq! Óz oıymdy ashyq bildirýge múmkindik bolmasa, ne úshin sóılemekpin! — dep, jas profesor short kesti.

— Úlken kisiniń aldynda sóz sóıleý degen zor qurmet ári asa jaýapty másele. Ekiniń birine berile salmaıtyn baq. Ol jerde árkim óz bilermendigimen ne bolsa, sony betaldy aıtpaıdy. Bári biz jasaǵan baǵdarlama boıynsha ótýge tıis — dep, ortalyq apparattyń ókili qoımady.

— Sizdiń munyńyz baǵdarlama emes, senarı ǵoı. Men akter emespin. Siz daıyndaǵan mátindi nege jattap aıtýym kerek? Onyń ústine meniń týǵan qalamdy siz Úlken kisiniń atymen ataýdy maǵan júktep otyrsyz. Men kelispeımin. Jazǵan mátinderińiz unamaıdy. “Sizdiń dana basshylyǵyńyzdyń arqasynda...”, “Siz bolmaǵanda, biz qońyz terip keter edik” deı me, ne bul?! Netken jaǵympazdyq? Ózińiz aıtyńyz endeshe! — dep, álgi jas jigit shyǵyp júre berdi.

Apparat qyzmetkerleri aldyn ala bekitilgen baǵdarlamasyna sál ózgertý engizip, onyń ornyna eń qart profesor shaqyryldy.

— Ol aqsaqaldaryń álgindegiden ótken qyrsyq bireý bolyp shyqpasyn. Durys adam ba, ózi? — aparatshylardyń biri ákimniń orynbasarynan surady.

— Senimdi kisi. Bizdiń aqsaqaldar jaqsy ǵoı. Ne aıtsań da, “láppaılaı” beredi — dedi, ákimniń orynbasary shaldardyń kónbistigin maqtan etip.

Aıtsa aıtqandaı-aq eken. Shal daıar mátindi kóz júgirtip oqydy da dereý aına-qatesiz aıtyp berdi. Arasynda, ony túrlendirip, Úlken kisige aıtylatyn madaqtyń boıaýyn qanyq ete túsetin sóz tirkesterin qosýdy usyndy.Onysy aparatshylardyń kóńilinen shyǵyp, olardy qýantyp tastady. Sonymen, báriniń kóńilderi jaı tapty.

Apparat ókilderi meımanhanaǵa barar jolda ákimniń orynbasarynan:

— Aqsaqal máledes eken. Ómir boıy ustazdyq etken kisi me? — dep surady.

— Sovet kezinde obkomnyń ıdeologıa jónindegi hatshysy bolǵan. Kompartıa taraǵan soń profesor bolyp, shákirt tárbıelep júr.

— Báse, kórinip tur. Altynnyń synyǵy eken ǵoı. Al, anaý eń jas profesoryń opozısıa ókili sekildi ǵoı. Qalaı ondaı adamdy baqylaýǵa almaı júrsińder? — dep, aparatshy keıı sóıledi.

— O, ne degenińiz, baseke! Bizde oppozısıonerge oryn joq. Ol “Bolashaq” túlegi, eshbir partıaǵa múshe emes.

— Qaıdam, tym birbetkeı eken. Erteń aktıvter jınalysyna jolatpańdar! Bizdiń josparymyzdy búldirip, syn-sógis birdemeler aıtyp nemese qyńyr-qısyq suraq qoıyp, yńǵaısyzdyq týdyryp júrmesin!

— Maqul, baseke! — dedi, ákimniń orynbasary elpeń qaǵyp.

Sol túndi ákim-qaralardyń birazy uıqysyz ótkizdi. Ortalyq apparattan kelgender men eki rejıser, jıynda sóz sóıleıtinderdiń de uıqylary qashty. Eń qart profesor da qatty tolqyp, oıaý jatty. “Úlken kisi sózimdi unatyp, jeke qabyldaýyna shaqyrsa, bek jaqsy bolar edi. Jalǵyz ulymnyń qyzmette ósýine bir septigim tıse...” dep oılaǵan saıyn tún uıqysy tórt bólindi.

Ákimniń orynbasary da osy joly kózge túsip, kóńilden shyqsa, Úlken kisi unatsa, mınıstrdiń nemese ákimniń taǵyna jarmasa ketýden dámeli. Shaǵyn ǵana bólimniń qozy qaryn bastyǵy Saılaý da kirpik aıqastyrmaǵan kúıi tańdy qarsy aldy. Onyń da kókeıin tesken mánsap. “Provınsıadan ketip, ortalyqqa jetsem, mınıstrliktiń bir departament basshylyǵynyń tizgini qolyma tıse, ary qaraı...” — dep, ahylap, dóńbekshýmen boldy.

Jıynda sóz sóıleıtinder de qatty qobaljyp, uıqylary shala boldy. Sózderin jańylmaı aıtyp, bastyqtaryna jaqsa, jaǵdaılarynyń jaman bolmaıtynyn ishteri sezetin sekildi.

Úlken kisi bas suǵady delingen mektep dırektory da qatty qobaljyp, uıqy-kúlkiden aıyryldy. Osy joly bári sátti ótse, ol bilim basqarmasynyń bastyǵy bolýdan dámeli. Sol úshin búgin kúni boıy qanshama áýire-sarsańǵa tústi deseıshi.

Oqýshylar men ustazdarmen kezdesý ótkizetin zaldaǵy oryndyqtardyń biri de unadym. Dırektor sharýashylyq jónindegi orynbasaryn shaqyryp:

— Úlken kisi kelgende otyratyn bir jaqsy jumsaq oryndyq taýyp ákelip munda qoıshy! — dep tapsyrma berdi.

Ol kúni boıy keńse taýarlary men úı jıhazdary satylatyn dúkenderdi sharlap eshteńe tappaı keldi. Dırektordyń ábden basy qatty. Kórshi mekemelerden birli-jarym oryndyqtardy surap ákelip, orynbasary kórsetken kreslolar unamady. Óte keremet bir oryndyqty dırektor bir jerden kórgeni kenet esine tústi. Ótken kúzde jańadan salynǵan juqpaly indetter dıspanserininiń ashylý saltanatyna barǵanda bas dárigerdiń kabınetinen kórgen. Dereý orynbasaryn dıspanserge jóneltti. Obaly neshik, ákeldi, eki kúnnen keıin qaıtaratyn bolyp, kelisipti. Tazalaýshy áıeldi shaqyryp:

— Myna oryndyqty jaqsylap tazartshy! Erteń Úlken kisiniń otyratyn kreslosy ǵoı! — dep edi, ózi de kókbet qatyn edi, tazalaýshy:

— Sizder oqýshylar men ustazdar ortasyna týberklez dıspanserinen oryndyq ákelip, aýrý taratqaly otyrsyzdar. Aldymen, maǵan odan keıin ózgelerge, eń sońynda Úlken kisige de aýrý juǵady. Erteń men muny barlyǵynyń kózinshe aıtamyn! — dep bulqan-talqan boldy.

Dırektorda zere qalmady. Tazalaýshy áıeldi aldap-sýlap, oǵan sý jańa teledıdarmen qosa azyn-aýlaq aqsha berip zorǵa toqtatty.

Osylaısha, sanaýly ǵana jandar bolmasa, jergilikti ólkeniń jalpy jurty bul túndi tynysh ótkizip, uıqylaryn tolyqtaı qandyryp, tańdy ádettegisinshe shúkirshilikpen qarsy aldy.

Úlken kisi mingen ushaq áýejaıǵa taltúste qonady dep habarlanǵanymen jergilikti basshylar men halyq tań sáride jınalyp, belgilengen oryndarynda qaqqan qazyqsha qaqıyp turdy. Qarapaıym halyq aqyryp turǵan tańǵy aıazǵa qaramaı joldyń eki jaǵynda qaz-qatar tizilip tur. Ara-tura tońa bastaǵandary aıaqtaryn jylytý úshin turǵan jerlerinde typyrshyp, sekirisip qoıady. Aýyzdarynan shyqqan demderi sol sátte býdaqtaǵan býǵa aınalyp, qasy-kózderi men teri malaqaılaryn lezde aq qyraýǵa oraıdy. Olardyń kókeıindegi jalǵyz oılary, ushaq tezirek kelip, qurmetti meımannyń osy jol boıymen zýlatyp óte shyǵýy ǵana. Ary qaraı ózderi-aq tarap, jyly úılerine baryp, ystyq sháılaryn soraptap otyrsa, dúnıeniń raqaty ázirshe, sol bolyp turǵan jaıy bar.

Al, jergilikti úkimettiń jyly ǵımaratyna qulqyn sáride kelip alyp, ersili-qarsyly oıqastap júrgen shendiler saǵattaryna álsin-álsin kóz salyp, Úlken kisiniń keletin ýaqytyn taǵatsyzdana kútip júr. Negizi, taltúske deıin qaı zaman. Biraq, ıgi jaqsylardyń ózara aqyldasatyn, aldyn ala belgileıtin is-sharalary áli bar sekildi. Biraq, burynǵydaı kabınetterinde mamyrajaı jaıǵasyp otyrǵan tiri jan joq. Bári abyr-sabyr bolyp, ersili-qarsyly shapqylap júr.

Keń dálizde toptasyp, jergilikti úkimettiń jaısańdarymen birge ortalyq apparattan kelgen ýákilder de turǵan edi. Kenet kórshi oblystyń ákimi osyndaǵy áriptesine telefon shaldy. Ekeýi aman-sálem alysqannan keıin jańalyq surasyp jatqan. Aıaq astynan mundaǵy ákim qatty daýystap jiberdi:

— Ne deıdi-eı! Oı, Úlken kisi osynda keledi dep biz jik-japar bolyp júrsek, ol qalaı bolǵany? Bir sátte eki oblysqa qatar barýy múmkin emes qoı... Bálkim, aldymen bizde bolyp, keshkisin sizdiń ólkege baratyn shyǵar? Rasymen solaı ma? Qazir biz anyqtaıyq! — dedi de, ákim ortalyq apparat ýákilderine:

— Bul qalaı bolǵany? Úlken kisi kórshi oblysqa kelip, odan ary shetelge attanady dep tur ǵoı, meniń áriptesim.

— Múmkin emes! — dep, qatty abyrjyǵan ýákil Úlken kisiniń kómekshisine telefon shaldy.

Ákimniń aıtqany aına-qatesiz ras bolyp shyqty. Ortalyqqa dereý habarlasqan ýákil uıymdastyrý basqarmasyndaǵy álde bir qyzmetkerdiń jaýapsyzdyǵynan aty uqsastaý eki oblysty shatastyrylǵanyn bildi. Úlken kisi keledi degen dúrmekpen biraz sharýalaryn rettep alǵan ákim qýanyp, kóp dúnıeden úmittengen orynbasardyń kóńili ortaıyp qaldy.

Al, jol jıeginde taltúske deıin búrseńdep, sherý tartyp turǵan kóptiń nazaryn besinshi qabattan aıǵaı salǵan Jaılaýdyń barqyldaǵan daýsy birden aýdardy:

— Áı, Saılaý qurdas! Bosqa dúrlikpeı tarasańdarshy! Úlken kisi kórshi oblysqa kelip, ushaqtan túsip jatyr. Bizge kelmeıdi deıdi ǵoı. Kórshi oblystan shetelge ketedi deıdi. Mine, Feısbúktiń tikeleı efıri! Ha, ha, ha! — dedi, smartfonyn jyltyńdatyp.

---