InfoHub Logo

Qoja esegine jem bere-bere jalyǵyp, bir kúni áıeline:

— Búginnen bastap esekti sen kútip baǵatyn bol, — dese kerek. Áıeli kelispeı, ekeýiniń arasynda biraz urys-keris bolady. Aqyry, ekeýi de tomsaryp otyryp alady jáne qaısysy buryn til qatsa, sonysy esekti sýǵaryp, jem beretin bolady.

Qoja buryshqa baryp, birneshe saǵat boıy teris qarap úndemesten, siresip otyra beredi. Áıeli ábden jalyqqan soń, shálisin jamylyp kórshisine barady da, keshke deıin sonda bolady. Azan shaqyratyn mezgil taqap qalady. Qojanyń áıeli kórshisine úıinde bolǵan jaǵdaıdy aıtady:

— Bizdiń úıdegi kisiniń qyńyrlyǵyn surama, — deıdi Qojanyń áıeli, ashtan ólýge bar, biraq sóılemeıdi. As-sý berip jibersek qaıtedi. — Áıelder shara aıaqqa kúrish kóje quıyp, bir baladan Qojaǵa berip jiberedi.

Sol eki arada mynadaı oqıǵa bolady. Qojanyń áıeli úıden shyǵyp ketken kezde úıine ury túsedi, barly-joqty iske tatyr múlkin jınap alyp, ury aqyrynda Qoja otyrǵan bólmege kelip kiredi. Koja buryshta teris qarap, esh nárseni elemeı otyra beredi. Ury «á» degende sasyp qalǵanmen, Qojanyń aıǵaı salmaı melshıip otyrǵanyn kórgen soń, «e, til-qulaqtan aırylyp, top bolyp qalǵan adam eken ǵoı» dep oılap, aspaı-saspaı, Qojanyń kózinshe qalǵan dúnıesin taǵy da jınap, býyp-túıip alady. Sirá, qyzyq kórgen bolý kerek, «sáldesin sheship alaıyn, sonda da shirkin til qatpas pa eken», dep, Qojanyń basynan sáldesin de sheship alady. Sonsoń alǵan zattaryn arqalap, shyǵyp júre beredi.

Ury kete salysymen kórshi bala kelip, buryshta qaqqan qazyqtaı bolyp otyrǵan Qojaǵa:

— Sizge tamaq berip jiberdi, — deıdi.

Qoja úıiniń tonalǵanyn, sáldesinen aırylǵanyn, sondyqtan áıeliniń úıge tez jetýi kerek ekenin ymmen habarlamaq bolyp ysqyrady, sonsoń qolyn basynan úsh aınaldyra bylǵap tóbesin nusqaıdy. «Qoja ymdap qolyndaǵy asty basymnan úsh aınaldyr da tóbeme quıa sal», — dep aıtyp otyr eken dep túsinedi bala. Túsinigin jalma-jan júzege asyrady. Aıaqty Qojanyń basyna tóńkere salady. Ystyq kúrish kóje Qojanyń basyn, bet-aýzyn kúıdirip ketedi. Biraq áli de qasarysyp, jaq ashpaıdy.

Kórshi bala úıine qaıtyp kep, Qojanyń úıiniń esik-terezesi, kebeje, sandyq bitkenniń bári ashyq, esikten tórge deıin zattardyń shashylyp jatqanyn aıtady. Qojamen ekeýiniń arasynda bolǵan oqıǵany da aıtady.

Qojanyń áıeli bir páleniń bolǵanyn ishi sezip, úıine tura júgiredi.

Úı-ishiniń astan-kesteńi shyǵyp jatqanyn kórip shydaı almaı:

— Oıbaı-aı, mynaý ne sumdyq! — dep baǵanaǵy qalpyn buzbaı buryshta melshıip otyrǵan kúıeýin baryp bas salady.

Sol-aq eken Qoja:

— Bar, esekti sýǵaryp, jem berip kel, — depti.

---