InfoHub Logo

Este joq eski zamanda en dalany erkin jaılap, muńsyz-qamsyz ǵumyr keshken el kútpegen bir náýbetke tap bolady. El shetinen bilingen qalyń jylan ordasy kózine kóringen mal-janǵa shabýyl jasap, qyryp-joıa bastapty. Nebir aq orda úılerdi saqınalap orap alatyn jylandar kútirlete syqqanda kúl-talqan etedi eken. Alyp jylandardyń qyspaǵyna túsken atan túıelerdiń ózi tanaýynan qany dirdektep, aıaq serpýge shamasy kelmepti.

Mundaı sumdyqtan dúrlikken qalyń el shoshynyp, bas saýǵalaı qashady. Taý-tasty, úńgir-oqapty panalaıdy. Biraq jylan nópirinen sonda da qutyla almaıdy. Ásirese osynaý ordaly jylandardyń kósemi — qos múıizdi aıdahar tiri janǵa saýǵa taptyrmaıdy. Onyń qos múıizi dem tartyp, ýytyn shashqanda adamdardyń eti aǵyp túsip, saýdyraǵan qý súıekteri qalady eken.

Ábden aılasy taýsylǵan adamdar quryp bitetin bolǵan soń, Táńirige jalbarynyp kómek suraıdy. Adamdardyń zary Táńiriniń qulaǵyna jetse kerek, keshikpeı kókten belgi bilinedi. Aldymen, aspannan jolaq jasap jaryq sáýle kórinedi. Sonsoń, sol jaryq sáýleni jol etip, qos órkesh túıege teris qarap mingen Nurtóli atty bala túsedi. Balanyń qolynda aqqý moıyn qara qobyz bolsa kerek, nebir sıqyrly saz shyǵaryp, kúı tóge keledi. Jer betinen kúıdiń saryny estilýi muń eken, qaptaǵan ordaly jylan shıyrshyq atýyn qoıyp, siltideı tynady. Burynǵy qan qumar obyr minezin umytyp, kúıdiń daýysyn uıyp tyńdaǵandaı bolady. Osy kezde kókten túsken Nurtóli qobyzyn sarnatqan qalpy Qarateńizdi betke alyp júre beredi. Onyń sońynan kúıdi úzdige tyńdaǵan jylandar da qalmaı jyljyp, teńiz tuńǵıyǵyna birge kiredi.

Sóıtip, en dalany erkin jaılaǵan halyq ıyqtarynan aýyr júk túskendeı kóńilderin demdep, qaıtadan muńsyz-qamsyz kúılerimen qaýyshady.

Adamdarǵa arasha túsken Nurtóli kúni búginge deıin Qarateńizdiń astynda toqtatpastan kúı tógip otyrsa kerek. Al múıizdi ajdaha bastaǵan jylandar ordasy qobyzdyń sazdy sarynyn jalyqpaı tyńdaýda kórinedi.

Nurtóli qobyz kúıin toqtatpaýǵa tıisti. Eger qobyz kómeıinen kúı saryny úzilse, jylandar ordasy qaıtadan jer betine shyǵyp, tirshilik ataýlyǵa qyrǵyn taptyrmaq.

Nurtóliniń jylandardy kúımen shaqyryp, sońynan ertken sıqyrly sazyn estigen bir quıma qulaq qobyzshy keıin «Shaqyrý» kúıi dep jurtqa jaısa kerek.

---