InfoHub Logo

Jańa jyl keshinde ótetin mereke.

Jasyl shyrsha janynda balalar men Aıaz ata.

Shymyldyq ashylady.

Aıaz ata.
Ýa, balalar, barlyǵyń
Tártiptisiń, bilemin.
Oryndalar dál búgin,
Ne tileseń – tilegiń.
Oryndalar búgingi
Alǵa qoıǵan maqsat ta.
Qoıaıyq biz kúlýdi,
Artyq ketip jatsaq ta.
Óz maqsatyn, armanyn,
Aıtar eken kim qane?
Qulaǵyń sal, al báriń,
Tynysh turyp tyńdalyq.

1-bala.
Erteńim dep bizden el
Kútip otyr kóp úmit.
Bilim qýyp, izdener
Shaǵymyz ǵoı sony uǵyp.

2-bala.
Aýyzdy ashyp,
Qoımaıyq
Basqa jurttan soń qap biz.
Osy bastan oılaıyq,
Qaısymyz kim bolmaqpyz?

1-bala.
Biz jasyrmaı aıtaıyq,
Siz de aıtyńyz shyndyqty.
Bolmaq eken
Baıqaıyq
Kim qurmetti, kim myqty?

Aıaz ata
Usynysyń oryndy,
Sóz bastaýǵa maqul kim?
Qysylmaı-aq qolyńdy
Kótere ber batylyń.

(Bir bala qol kóteredi.)

Aıaz ata.
Er ekensiń! Jaradyń!
Al aıta ǵoı, qaraǵym.

2-bala.
Bıznesmen bolyp men,
Baıyp alý – tilegim.
Júrmeımin jaı kólikpen,
Inomarka minemin.
Bireýlerdeı,
Baıysam,
Zyp bermeımin shetelge.
Óndiriske aýysam,
Týǵan elden ketem be?

3-bala (bıznesmen balaǵa qarap). 
Júrý úshin shirenip,
Men bankır bop alamyn.
Saǵan berip kredıt,
Kúrep aqsha tabamyn.
Babalardyń ámbege
Qasterletem sýretin.
Barsha jurttyń
Teńgege
Arttyramyn qurmetin.

4-bala.
Men birinshi nómirli
Elshi bolam. Mynandaı!
(Bas barmaǵyn shoshaıtady.)
Ózge elderge
Elimdi
Syılatamyn Qudaıdaı.
Oqyp júrmin sol úshin
Eki birdeı shet tilin.
Keńeıip oı-órisim,
Keledi údep ekpinim.

5-bala.
Jetpeı taǵam sanyna
Tursyn dúken, ashanań.
Sol úshin men
Sharýa
Qojalyǵyn basqaram.
Qaryq qylyp,
Bárińniń
Berekeńdi arttyram.
Otbasynan ár úıdiń
Úzilmeıdi shattyq án.

6-bala.
Pir tutatyn asyldar
Men tarıhshy bolamyn.
Zamanalar ǵasyrlar
Qoınaýlaryn sholamyn.
Baǵalamaı babany
Daralamaı danany,
Súımeı Otan-Anany,
Bolamyz ba sanaly?!
Kóne zaman kóshiniń
Kóp izderi – aqtańdaq.
Ár shuńǵyly osynyń
Nıetim bar aqtarmaq.

7-bala.
Uıalasyń bir-birińnen
Televızor qoısań tek.
Sondyqtan da júrmin men
Rejıser bolsam dep.
Ulylardyń beınesin
Jasap shyǵam kınoda.
Qara da tur, kóresiń:
Shet qalmaıdy bir dana.

8-bala.
Tyńdaı alman tańdanbaı
Nuraǵańnyń kóp ánin.
Men Nurǵısa aǵamdaı
Kompozıtor bolamyn.
Nuraǵańdaı
«Altyn juldyz» keýdeme taǵamyn.

9-bala.
Men jumysker aradaı
Barymdy elge arnaımyn.
Toqtar, Talǵat aǵadaı
Zeńgir kókke samǵaımyn.

10-bala.
Meniń de bar maqsatym,
Bolsa da kóp basqa óner.
Bolsam deımin jaqsy aqyn,
Jazýshy ne baspager.
Aıtarlyqtaı aıt dese
Kitaptardy qaptatam.
Dúkenderde áıtpese
Kitap degen joqqa tán.

11-bala.
Abyzdardan bata alǵan,
Tilegen bıik samǵaýyn.
Dál Nursultan atamnan
Aýmaı qalý – armanym.
Aqtaımyn el senimin,
Beıbitshilik saqtaımyn.
Baqyty úshin elimniń
Bir sát tynym tappaımyn.
Emespin men jaı bala,
Jıyrma bes jyl mursat ber.
Elbasy etip saıla da,
Sodan keıin jumsap kór...

12-bala.
Prezıdent te, balalar,
Muǵalimnen oqyǵan.
Dáris alar danalar,
Men ustaz bop otyram.

Aıaz ata.
Sezip otyr kim myqty –
Balalardyń ózderi.
Qandaı jaqsy
Shyndyqty
Aıtqyzbaı-aq sezgeni.
Jaqsy azamat bol báriń,
Meıiri mol Jaratqannyń.
Arman, tilek, oılaryń,
Oryndalsyn, qaraqtarym.

---