InfoHub Logo

Altaı sońǵy kezde «Mynaý qyzdyń, mynaý uldyń jumysy» degendi shyǵaryp aldy. Qundyz jumsaı qalsa, sony syltaýratyp bezerip otyryp alatyn boldy.

Mine, búginde sol qyńyrlyǵyna basyp otyr. Tańerteń sháıden keıin Qundyz:

— Ústel ústin jınaı salshy, men sabaǵymdy daıarlaıyn, — dep edi.

— Iá, saǵan! Meni qyz deısiń be? Óziń jına, — dep, dalaǵa shyǵýǵa bet aldy.

— Eshqaıda barmaısyń! — dedi Qundyz onyń aldyn kes-kestep.

— Sabaǵyńdy oqydyń ba óziń?

— Oqydym. Keshe oqydym. Tek eńbek sabaǵyn oryndaǵan joqpyn.

— Nege?

— Qalaı oryndaımyn? Apaı balalarǵa da qyzdar isteıtin jumys tapsyrdy.

— Ne tapsyryp edi?

— Eı, qoıshy. Qyzdar tigip aparsa da bolmaı ma? Ul bala keste tige me eken, aıtshy óziń?

— Tikse qaıtedi? Qane, kórsetshi? — dedi Qundyz.

Altaı sál oılanyp turdy da:

— Men qalaı tigem? Ul keste tikpeıdi. Ákemniń keste tikkenin kórdiń be? — dedi.

— Kórdim. Keste tikpese, túımesin ózi qadap, kıimin ózi ótektep alady. Ótirik deshi, káne? Kıim tigetin de ákeler bar. Ony qyzdyń jumysy dep shyǵaryp júrgen sen.

Qundyz ústel ústin jınastyra bastady. Altaı ne isterin bilmeı, qıpaqtap sál turdy da, oǵan kómektesýge kiristi. Ydys-aıaqtardy as úıge tasyp júr. Stol jınalyp bolǵan son, Altaı Qundyzdyń janyna otyryp alyp, taǵy qyńqyldady:

— Qundyz, men de saǵan járdemdestim ǵoı... Kesteni tigýge kómektesshi.

— Ákele ǵoı, — dedi bir kezde Qundyz da. Altaı qýana kúlimdep, onyń qolyna kesteleıtin shúberegin ustata saldy.

Qundyz jibek jip sabaqtap aldy da, aq shúberekke qalammen salynǵan gúl sýretiniń ústin bastyra tige bastady.

— Mine, bylaı, — dedi ol Altaıǵa, — kórdiń be? Ineni bylaı ustaısyń. Baıqap otyr. Sonan soń myna syzyqtyń ústimen tige beresiń. Túk qıyndyǵy joq. Má, endi óziń tigip kórshi.

Altaı ıneni alyp, amalsyz tige bastady.

— Al, — dedi Qundyz oǵan kórsete otyryp, — ne qıyndyǵy bar eken? Osylaı tige ber. Úırenip ketesiń. Altaı máz-meıram. Tigip otyrǵan kestesi, shynynda da, gúl bolyp kele jatqan sıaqty. Bulardyń ústine mamasy da kelip qaldy.

— Mama, — dedi Altaı ornynan ushyp tura kelip. — Mine, qarashy, keste tiktim!

— Óte jaqsy, — dedi mamasy oǵan. — Mynaý uldyń, mynaý qyzdyń jumysy deıtini joq. Bilgenniń paıdasy bolmasa, zıany bolmaıdy, balam. Bári eńbek.

---