InfoHub Logo

Tańerteń tósekten turý nemese kóńilimizge jaqpaıtyn ispen aınalysý, ıa bolmasa sansyz kóp kezdesýlerge ýaqytynan keshikpeı bara almaý – tártiptiń joqtyǵynan. Tártiptiń joqtyǵy tek jeke ómirimizde ǵana emes, jumysta, bızneste, dostarmen qarym-qatynasta da kedergi bolyp, ózimizge degen senimdilikti joıa bastaıdy.

Ózimizdi qalaı tártipke shaqyrsaq bolady?

Ádet qalyptastyrý

Sanaly túrde bir nárse jasaýǵa daǵdylaný: 15 mınýt kitap oqý, tańerteń jattyǵý jasaý nemese aldaǵy jumysyńa jospar qurý. Bul «Alynbaıtyn qamal joq» degenge adamnyń oıyn sendiredi jáne jańa bastamalarǵa jaqsy túrtki bolady.

Jasaǵan qateligińnen sabaq alý - beker istemedim dep ókingennen jaqsyraq

(Beker istemedim degenshe, beker istedim degen jaqsyraq)

Tabysqa jetýge jalqaýlyq jıi bóget bolyp jatady. Basyńa eki kishkentaı adam minip alyp aıtysyp jatqandaı. Birinshisi «Bul mańyzdy is, mindetti túrde oryndaý kerek!» dese, ekinshisi «Ne qajeti bar? Qaıtesiń? Erteńge qaldyra sal, aspan aınalyp jerge túse qoımas» dep keri tartady. Árıne, eshteńe bolmaıdy. Búgin, erteń, arǵy kúni, tipti bir aıdan soń da eshteńe ózgermeıdi, dál búgingi kúniń sıaqty ótedi de ketedi. Al, bala kúngi armanyń she? Jarqyn bolashaq týraly armandaryń qaıda qaldy? Adam ózin-ózi qolǵa almaıynsha, mańyzdy isterdi oryndamaıynsha (asa qatty mańyzdy is bolmasa da), armandaǵan jarqyn bolashaǵy qıal bolyp qala bermek. Sondyqtan da, saǵyzdaı soza bermeı, isti dál qazir oryndaý kerek.

Josparlaý – tabys kepili

Kóptegen kompanıalardyń problemasy bir jylǵa jospar quryp qoıǵandyǵynda. Saıyp kelgende, jumyskerlerdiń kóp ýaqyty bar sıaqty bolyp kórinedi. Sondyqtan da olar qarqynmen jumys istemeıdi, jyl sońyna deıin ýaqyt bar dep ózderin aldaıdy. Nátıjesinde tıimdi jumys tek jyl sońyna qaraı, qarasha-jeltoqsan aılarynda atqarylady. Jeke basyna josparlaǵanda da dál solaı bolady. Odan da bir jyldy 12 aptadan turatyn 4 bólikke bólgen durys. Ár bólikke maqsat qoıa bilý kerek. Soǵan súıene otyryp, aptalyq, kúndelikti maqsat bolý qajet. Ári qaraı tipti ońaı: kúndelikti tizim quryp qoıyp, sol boıynsha áreket jasaý ǵana. Ýaqyt óte kúndelikti jasalǵan jumystaryń úlken nátıje beretin bolady. Talaptardy durys qoıa bilý qajet. Birinshi mańyzdy jáne shuǵyl jumys, odan keıin mańyzdy biraq onsha shuǵyl emes, sodan keıin mańyzdy da jáne shuǵyl da emes jumystardy artynan oryndasa bolady.

Óz kúshińdi durys shamalaý

Kóptegen adamdar, ózderin tártipke shaqyrǵanda, ýaqyt kestesin tym qatty nyǵyzdap tastaıdy. Nátıjesinde, keıbir jumystarǵa ýaqyt jetpeı jatsa, ózderine kiná artyp jegideı jeı bastaıdy «Men keste boıynsha ómir súre almaımyn, qolymnan kelmeıdi». Joq, olaı emes. Qapalanbańyz. Odan da tizimdegi jumysqa kóbirek ýaqyt bólińiz. Ár jumysqa 15 mınýt artyǵymen qosyp qoıyńyz. Sol kezde qatty sharshamaısyz, josparlaý da kóńilińizden shyǵyp ózine tartyp turady.

Demalys - jemisti jumysqa jeteleıdi

Tek eńbekti ǵana emes, demalysty da josparlaý qajet. Túski as, úzilis, kóz jattyǵýlary da, serýendeý – bári de kestede jumyspen qatar kórsetilýi qajet. Qaljyrap, sharshaǵan adamnyń jumys nátıjesi de tómendeıdi. Osyny esten shyǵarmaı, arasynda demalý da qajet.

Árıne, keıde biz josparlaǵandaı bola bermeıdi. Mundaı jaǵdaıda jumys kestesin túgeldeı joımaı, atqarylmaı qalǵan jumysqa basqa kúni ýaqyt bólý qajet. Ol úshin basqa mańyzdy emes jumysty qurban etýińiz ábden múmkin. Mundaı sátterde eń basty maqsatty oılap, dedlaındy keıinge shegermeńiz.

---