InfoHub Logo

(Kolej muǵaliminiń ótinishine baılanysty jazylǵan).

Kitap – adamnyń jan-dúnıesiniń asyl qazynasy, rýhanı baılyqtyń ólshemi, adam ıntellektisiniń kórinisi. Ol – adamzat úshin ǵasyrdan ǵasyrlarǵa jalǵasyp qyzmet etip kele jatqan ǵylym men ónerdiń, sonyń ishindegi sóz óneriniń týyndysy, ǵalym adam men qalamgerdiń jemisi. Áý basta sol rýhanı ólshem men adam aqyl-oıynyń ajyramas tunyǵyndaı bolyp kórinis tapqan kitap endi ózin oqyǵan, paıdalanǵan adamǵa da qyzmet ete otyryp, sol jandy da rýhanı turǵydan baıytady, bilim-biligin ushtaıdy, senimdi serigi, ajyramas dosyna aınalady.

Zamana legine teledıdar ilesti, qoǵam kóshine ǵalamtor ıelik ete bastady. Bular adamzat ómirine kitaptan keıin kelgen dúnıeler edi. Biraq bir qyzyǵy, teledıdar da, ǵalamtor da kitaptyń ornyn almastyra alyp kete alǵan joq. Oqyrman sanyn kemitti degen sóz almastyrdy degen sóz emes. Kitap óziniń áý bastaǵy tuǵyrynda qala beredi. Mysaly, adam turaqty teledıdar qaraýshy nemese adam belsendi ǵalamtor qoldanýshysy bolyp kelýi múmkin, biraq onyń jan-dúnıesinde rýhanı turǵydan kemshindik bolýy da ǵajap emes. Munyń jalǵyz ǵana sebebi onyń nashar oqyrman bolǵandyǵynda da jatýy múmkin. Sebebi basty rýhanı baılyq – kitapta.

Kitap sonymen birge aqparat pen tehnıka dáýiri, jańa tehnologıalardyń zamanynda da birden-bir bilim berýshi qural retinde qala beredi. Kitap ǵalamtordan ýaqyt turǵysynan alǵanda utylýy múmkin, biraq adamǵa daıyn aqparattardy usynýshy emes, tereń sezimge, ózindik oılaýǵa úırete otyryp, bilim beredi. Adamdy izdenimpazdyqqa jeteleıdi, oı-órisin ushtaıdy.

Al sonymen birge kez kelgen qyzmetkerdiń, sonyń ishinde memlekettik qyzmetkerdiń sheshendik ónerine de, aýdıtorıany ózine qarata, tarta bilýine de kitaptyń kómegi óte zor. Óıtkeni ol – til baılyǵyn qalyptastyrýshy qural. Osymen birge kitaptyń tálim-tárbıelik, ımanı qundylyqtardy adam boıyna sińire alatyndaı qasıeti teledıdar men ınternetten joǵary turmasa, kem turmaq emes.

Demek, kitap – búgingi kún turǵysynan alǵanda da mańyzyn joımaǵan dúnıe. Endeshe, qoǵamnyń san-salaly maqsattarynyń ishindegi ajyramas bir maqsaty ol – únemi jas oqyrman tárbıelep otyrý. Bul oqý oryndary úshin de, basqa da qoǵamdyq uıymdar úshin de abyroıly ári úzdiksiz júre beretin mindet bolmaq.

---