InfoHub Logo

Qazaqstannyń jas geologtar komandasy Fransıadaǵy Nıssa qalasynda ótken IESO- 2017 Jer týraly ǵylymdardyń Halyqaralyq olımpıadasyna qatysty, dep habarlaıdy QR IDM saıty.

Jer týraly ǵylymdardyń Halyqaralyq olımpıadasy (IESO - International Earth Science Olympiad) - geologıa, meteorologıa, geofızıka, muhıttaný jáne astronomıa pánderinen orta mektep oqýshylary arasynda ótkiziletin jyl saıynǵy jarys.

Osy jyly oǵan 130-dan astam jasóspirim asty.

Óskemen qalasy OMFIML (Oblystyq matematıka, fızıka, ınformatıka salasyndaǵy daryndy balalarǵa arnalǵan mamandandyrylǵan mektep-lıseı - red.) 11-synybynyń oqýshysy Gleb Smırnov jeke esepte qola jeńimpaz atandy. Oǵan júlde eki jazbasha test pen 4 praktıkalyq testiniń jıyntyq baly boıynsha berildi.

Astana qalasyndaǵy Nazarbaev zıatkerlik mektebiniń 10-synyp oqýshysy Arýjan Qalymova jáne 12-synyp oqýshysy Móldir Shyńǵys ESP (Earth Science Project) Jer týraly ǵylymdar jobasy boıynsha komandalyq jarysta kúmis júldeni ıelendi.  

Earth Science Project (Jer týraly ǵylymdar boıynsha joba) - bul halyqaralyq komandalyq jarys. Bul jarys qorshaǵan ortany qorǵaý, jahandyq jylyný problemasy, basqa planetalardy kolonıalaý problemalary tárizdi mańyzdy taqyryptar boıynsha júrgizildi. Jarysty Japonıa, AQSH, Aýstralıa ýnıversıtetteriniń ataqty profesorlarynan quralǵan halyqaralyq qazylar alqasy baǵalady.

Ulttyq kıimmen bılegen oqýshylarymyz kórermenderge jaqsy áser syılady. Olımpıada qatysýshylary men qonaqtaryna bizdiń qonaqjaı elimiz týraly beınerolık kórsetildi.

Qazaqstan komandasynyń barlyq qatysýshylary Astana q. «Jas geolog» úıirmesiniń jáne Óskemen q. úıirmesiniń músheleri. Qazaqstandyq komandanyń barlyq shyǵyndaryn (komandalyq jarnany, formany jáne jol júrýdi qosa alǵanda) akademık Sh.Esenov atyndaǵy ǵylymı-bilim berý qory kóterdi.

---