InfoHub Logo

Jaz jaılaýda dýmanǵa ábden qanyp, qys qysqanda alyp taýlardyń qoıny-qonshyna enip izim-ǵaıym joq bolyp ketetin osynaý bir qaýymnyń ár biri dúnıege kelgen sátte-aq jan túkpirine jazylyp qoıǵandaı óz zań, qaǵıdalary bar-dy.

Kisi qaıtys bolǵan shańyraqty jeti kún óter-ótpeste aınala aýyl birinen soń biri úıine shaqyryp kóńil sháıin berer edi. Osy kezeńde qaraly úıdiń estıar adamdarynyń eshqaısysy kóńil sháıǵa shaqyrmaǵan úıdiń tabaldyryǵyn attaýǵa bolmaıdy. Tipti sol úıden alar zárý zaty bolsa da ózi barmaı, ózge adamdy jiberip aldyrady. Jaqyndarynan aıyrylyp qamkóńil bolǵan shańyraqty shaqyrmaı myna jurttyń da kóńili jaı tappaq emes. «Qaıǵyny solaı bólisedi, kóńildi solaı emdeıdi» deıdi eken bireýi, «qaraly jandy qulazytyp úıinde otyrǵyzýǵa bolmaıdy, ýaıymnyń ýysyna túsirmeı tezirek baıaǵy tirshilik dıirmeniniń tisine ilip jiberemiz, áıtpese ishke kúıik túsip ketýi kádik» deıdi eken taǵy bireýi. «Qaraly úıdiń bosaǵasynda jyl ýaǵyna deıin arystan jatady, ol arystan sol úıdiń adamdaryn syrttan bireý shaqyrsa ǵana jiberedi eken, arystan degeni sol qaıǵy shyǵar» dep fálsafalaıdy eken endi biri.Sondaı da sondaı qanshama qaǵıdalaryn qalt jibermeıtin bul qaýymnyń bir-biriniń kóńilin emder talaı oqıǵa keıipkerleriniń betin beıit jaýyp qalsa da aınalańda tiri júrgendeı seziletini nesi eken? Álde bul saǵynysh pa? Álde bul seniń de anaý bir jyldardaǵy emdelmeı qalǵan jaraly kóńilińniń endi-endi izdep tapqan dárisi me eken? Oıyńa orala beredi, orala beredi...

Sonaaaaý jyldary, taǵy da sol qaýymda, sol aýylda jasy seksennen asqan Hanıfa degen áje hál ústinde jatypty. Shekesi tership, áldenege qysylǵandaı júzi de qyzaryp, birdeńe aıtqysy kelgendeı kelinine qaraǵyshtaı bergen eken. Kelini qaıqybas tósek aldyna tizerleı otyryp enesiniń ernine qulaǵyn tósepti. Sonda hál ústindegi Hanıfa kempir ár sózin demine jalǵap shyǵaryp jatyp:

— An-aý Nur-dan-dardy kóńil shaı-ǵa shaqyr- alma-ǵany-myz-aı, jas ól-im edi ǵ-oı, en-di me-niń jana-zama qal-aı kel-er ek-en? — dep kúrsinipti.

Sodan sál tynyǵyp baryp, kóziniń jasy mólt etip tógilip ketken kelinine qaıta bir tiktep qarap:  

— Aldy-men sol-arǵa kóń-il sh-áı ber-ip aly-p, so-dan keı-in ózder-iń bar-ar-syńdar ǵoı, jó-ni so-laı, — dep, ósıetin aıtyp úlgergenine jany jaı tapqandaı aqyryn ǵana sozyla túsip, úzilip kete barǵan eken, jaryqtyq...

Solaı, sol aýylda, sol qaýymda áli kúnge qolǵa ustalmaǵan, kózge kórinbegen tek qana bir-biriniń kóńilderin jalǵap turatyn bir qupıa, syrly jip bar edi desedi, ony ólgender tirilerge tastap ketip otyratyn deıdi...

---