InfoHub Logo

—Men Dostyqtyń mekenjaıyn surap alyp, izdep bardym.

— Ne dedi?

— Qýanyp qaldy. Jalǵyzsyrap júr eken. Áńgimelestik, syrlastyq. Kóńilim araılandy. Dostyǵymyz óle-ólgenshe bolsyn dep serttestik.

— Sosyn?

— Sosyn Básekelestiń esigin qaqtym.

— Qalaı qarsy aldy?

— Kúldi. Ótirik. Tórin usyndy. Shyqtym. Bárin aldyma jaıyp saldy. Úıiniń asty-ústin, bar baılyǵyn, aqsha toly sandyǵyn kórsetti. Tań qaldym. Biraq úıinen bir kitap tappadym. Kúıindim. Esigin tars japtym. Maǵan básekeles bolýǵa jaramaıdy eken.

— Sosyn?

— Sosyn Qyzǵanyshtyń aýylyna jol tarttym. Qyzǵanyshtyń aýyly qyp-qyzyl bolyp býlyǵyp tur eken. Meni kórip selt etip, kózderin ashty bári. Sóılespedi. Aýyldy aralap shyǵam degenshe, aınala or qazyp tastapty. Bir-aq sekirip óttim. Olar meni Baqyttyń aýylyna deıin qýyp keldi.

— Oıpyrmaı, á! Sonda jolyńdy kespek bolǵan ǵoı.

— Iá-á. Sóıtti. Baqyttyń aýylynda bári shat-shadyman, Aqyl da, Bilim de, Eńbek te osynda eken. Kidirgem joq.  

— O nege?

— «Daıyn asqa tik qasyq» bolǵym kelmedi. Ózimniń Aqylymmen, Bilimimmen, Eńbegimmen kelsem dedim. Jolda Jaǵympazdyń aýylyna soqtym. Jemqormen aýyly aralas, qoıy qoralas bop ketipti.

— Solaı ma? Ne istep júr olar?

— Eshteme. Ystyqta bas shulǵyp, masalap turǵan jylqy sekildi... Bıiktegi bir dáýi túshkirip qalyp edi, bári «járekimalla» dep shýlap, etpetterinen qulap tústi. Báriniń qaryndary qampıyp ketipti. Juqpaly aýrý taraǵan ba, dep ketýge asyqtym.

— Iá, ketkeniń durys bopty.

— Jolda Mahabbatty izdep kele jatyp, Toıshyldarǵa tap boldym.

— Ne deıt? Mahabbat áli bar ma edi? Birjola ketip qalǵan bolar dep oılap em... Toıshyldar áli toılap jatyr ma eken?

— Toılaǵanda... Aspannan dollardan shashý shashty. Astaý-astaý et, araqtyń túr-túri sel bop aǵyp jatyr. Atyn atam estimegen áldebir taǵamdardan dastarqan maıysyp tur. «Shymqalada joq-joq, Astanada joq-joq» dep joq izdep, tapyraqtap bılep júr eken. 

— Birge toılamadyń ba?

— Jo-oq. O ne degeniń? Aýyl syrtynda bala-shaǵasymen kedeıler shubap júr eken. Dátim barmady.

— Sodan... Mahabbatty taptyń ba?

— Uza-a-aq izdedim. Aptyǵyp kele jatyp, Eńbektiń aýylyna tap boldym.

— Oıpyr-aı, á. Ol ne dedi?

— Qýanyp qarsy qaldy. Bul aýylǵa qonaqqa taǵy Aqyl, Bilim, Baqyt kele qapty. Meni qýyp júrgen sekildi, sońymnan qalmady. Solarmen az da bolsa dámdes bolǵym keldi.

— Durys bolǵan. Olar seni qataryna qosty ma?

— Qosty. Dostastym. Aıtylmaǵan áńgime-syr, aqyl-naqyl qalmaǵan shyǵar-aý... Baqyt meni qonaqqa shaqyrdy. Baratyn boldym... tek keıinirek kelem dedim. Básekelesti, Qyzǵanyshty, Jaǵympazdy jeńgen soń, o joq, durys jolǵa salǵan soń, olardy da erte baraıyn dep sheshtim.

—Mahabbat she? Mahabbat!

 — Aıttym ǵoı, kóp izdedim, Mahabbatty. Rasynda alystap ketipti. Biraq taptym. Kól jıegine úı tigipti. Bıikte otyryp alyp, jarqyraǵan Kúnge, qazbaýyr bultty aspanǵa, qańqyldaǵan aqqý-qazǵa, kógildir kólge, aınalaǵa súısine, móldireı qarady. Alysqa kóz tikti. Dostyqtyń, Básekelestiń, Qyzǵanyshtyń, Baqyttyń... báriniń aýyldaryn sholdy.

—Sosyn?

— Sosyn maǵan: «Bárin shaqyr, bárińdi qonaq etem» dedi. Qustaı ushyp baryp bárin shaqyryp keldim. Áreń júr eken, taıly-taıaǵy qalmaı júgire basyp, túgeli jetti. Mahabbattyń júzine qarap ańtaryldy...

— Qyzyq bolǵan eken.

— Bolǵanda qandaı? Mahabbat meıirimmen súısine túgel sholyp edi... o ǵajap, báriniń qýanyshtan basy aınaldy. Jemqoryń, Jaǵympazyń, Qyzǵanysh, Básekelestiń aýyly, Toıshyldaryń bári-bári Eńbekke, Aqylǵa, Bilimge umtyldy. Tipti talasyp áketti. Áreń jetkizdik. Dúnıe aq mamyqqa oranǵandaı nurlanyp sala berdi. Pendeshilik ataýly kúresinge tastaldy.

— Endi qaıda barasyń?

— Jaqsylyqtyń...  Máńgilik mekenine...

---