InfoHub Logo

Burynǵy zamanda bir ǵalymdy eldiń patshasy qatty qadirleıtin bolady. Bul ǵalym patshaǵa únemi: «Patsham, jaqsylyq qylǵan adamǵa jaqsylyq jasańyz! Jamandyq jasaǵan adamǵa jaza retinde óziniń jamandyǵy da jetkilikti», — dep nasıhat aıtady eken. Bul ǵalymdy ýázirlerdiń biri kúndep, kóre almaı patshaǵa shaǵymdanypty:

— Patsham! Ana ǵalym sizdiń aýzyńyz sasıdy dep aıtyp júr.

— Sózderińniń durystyǵyna qalaı senemin?

— Ǵalymdy qasyńyzǵa shaqyryńyz, egerde sizge jaqyndaǵanda murynyn jabatyn bolsa, sózimniń rastyǵy belgili bolady.

Kóre almaı júrgen ýázir patshanyń aldynan shyǵa salyp ǵalymdy asqa shaqyrady da sarymsaq qosylǵan taǵam usynady.  

Birazdan soń ǵalym patshanyń aldyna barǵanynda, patsha oǵan qasyna jaqyndaýyn aıtady. Ǵalym patshaǵa jaqyndaǵanda sarymsaqtyń ıisi bar ekeni esine túsip, qolymen aýzyn jabady. Patsha ýázirim durys aıtypty degen sheshimge keledi. Bir qaǵazǵa «Myna hatty ákelgen adamnyń basyn shap!» dep hat jazyp, orap ǵalymǵa hatty bas ýázirge aparyp berýin jáne odan bir syılyq alýyn aıtady. Ǵalym bul hatty alyp kele jatyp jolda baıaǵy kúnshil ýázirdi kóredi. Patshanyń buıryǵymen syılyq alý úshin bas ýázirge bara jatqanyn aıtady. «Syılyq» degen sózdi estigen ýázir «hatty maǵan berseńiz, men aparsam» dep jalynǵan soń, ǵalym hatty oǵan bere salady. Sóıtip hatty aparǵan kóre almaýshy ýázirdiń basy ketedi.

Ǵalym ádeti boıynsha qaıtadan patshanyń qasyna barady. Patsha ony kórip tań qalyp, suraıdy:

— Sen hatty ne istediń?

— Hatty alyp bara jatqanymda sizdiń ýázirlerińizdiń biri hatty berýimdi surady, soǵan berdim.

— Keshe sol ýázir maǵan, seniń «Patshanyń aýzy sasıdy» dep aıtyp júrgenińdi jetkizdi. Sol ras pa?

— Múldem ondaı eshteńe aıtpadym.

— Olaı bolsa nege keshe aldyma kelgenińde aýzyńdy japtyń?- degende, ǵalym sol ýázirdiń ony asqa shaqyryp sarymsaq qosylǵan tamaq bergenin jáne sarymsaqtyń ıisimen patshanyń mazasyn almaý úshin aýzyn japqanyn aıtady. Patsha «seniń aıtqan nasıhatyń durys eken» dep ǵalymnyń sózderin qaıtalap shyqty: «Jamanǵa óziniń jamandyǵy jetkilikti boldy. Hasedshi (kóre almaǵan) ýázir jazasyn tartty».

---