InfoHub Logo

Bilim jáne ǵylym mınıstri Ashat Aımaǵambetov Memleket basshysynyń bilim salasyna qatysty tapsyrmalary qalaı oryndalatynyn málim etti.

«Ulttyq qoǵamdyq senim keńesiniń mamyr aıyndaǵy otyrysynda bilim men ǵylymdy damytý máseleleri negizgi taqyryp boldy. Otyrys qorytyndysy boıynsha Memleket basshysy Qasym-Jomart Toqaev bilim jáne ǵylym júıesi úshin mańyzdy tapsyrmalar berdi. Mysaly, pedagogıkalyq mamandyqtarǵa túsetin abıtýrıentterge qoıylatyn talaptardy arttyrý jáne stıpendıa mólsherin 42 myń teńgege deıin ulǵaıtý tapsyrmasy berildi. Ótken jyly stıpendıa mólsheri 21 myń teńgeni qurasa, Prezıdenttiń tapsyrmasynan keıin jeltoqsan aıynda 26 myń teńgege deıin ósti. Al 1 qyrkúıekten bastap bolashaq pedagogterdiń stependıasy 42 myń teńge mólsherinde bolyp otyr», — dep jazdy mınıstr Facebook paraqshasynda.

Mınıstrdiń habarlaýynsha, bul barlyq mamandyqtardyń ishindegi eń joǵarǵy stıpendıa bolady. Aıta keterligi, stýdentter kesheden beri osy stıpendıany ala bastaǵan.

Sondaı-aq, osy jyldyń maýsym aıynan bastap pedagogıkalyq mamandyqtarǵa túsý úshin shekti bal birden 70-ke deıin kóterilgen.

«Pedagog mártebesi týraly zańdy qabyldaýdyń jáne atqarylǵan sharalardyń arqasynda bıyl «Altyn belgi» tósbelgisi ıegerleriniń arasynda pedagogıkalyq mamandyqty tańdaǵandar sany 1,7 ese ósti, al kóptegen baǵyttar boıynsha ortasha bal 100-den asty. Eger birneshe jyl buryn pedagogıkalyq mamandyqqa túsýshilerdiń ortasha baly 65-ti qurasa jáne pedagog mamandyǵy túlekter arasynda kóp suranysqa ıe bolmasa, qazir joǵary bal jınaǵan myqty túlekter pedagogıkalyq baǵyttar boıynsha oqýǵa túse bastady», — deıdi ol.

Ashat Aımaǵambetov sonymen birge UQSK qorytyndysy boıynsha berilgen tapsyrmalar aıasynda doktoranttardyń stıpendıasy 102 myńnan 150 myń teńgege deıin óskenin jetkizdi. Mundaı shara jas ǵalymdardy qoldaý úshin óte mańyzdy, óıtkeni doktoranttardyń otbasylary bar jáne olar óz zertteýlerin júrgizýmen aınalysady.

«Budan bólek 2020 jylǵy qyrkúıek aıynan bastap memlekettik granttyń quny aıtarlyqtaı ósti. Bul nege mańyzdy? Bul joǵary oqý oryndary oqytýshylarynyń jalaqysyn arttyryp, materıaldyq-tehnıkalyq bazasyn nyǵaıtýǵa múmkindik beredi. Prezıdenttiń Ulttyq qoǵamdyq senim keńesiniń qorytyndysy boıynsha bergen tapsyrmalarynyń barlyǵy erekshe baqylaýda jáne belgilengen merzimde oryndalatyn bolady», — dep túıdi mınıstr.

---