InfoHub Logo

Qazirgi kezde aqparat kólemi men onyń qoljetimdiligi deńgeıiniń joǵarylyǵy sondaı, kún saıyn bizge belgili bolyp jatqandy este saqtap qalý múmkin emes. Al eger buǵan búgingi adamnyń jumysbastylyǵyn jáne ol atqarýy tıis isterdiń óte kóp bolatynyn qossaq, kerekti mezette jadymyzdyń qýys-qyrtystarynan qandaı bir aqparatty «sýyryp alý» ońaıǵa soqpaıdy. Mine, osy úshin adamdardyń kópshiligi oqýynda, jumysynda, bızneste jáne kúıbeń tirshilikke toly kúndelikti ómirde kúndelikterdi paıdalanady. Alaıda, kúndelikterdi paıdalaný ońdy nátıje berip, tirlikti ońaılatýy úshin, olardy durys rásimdeı bilý qajet. Endi olardy qalaı rásimdeýge bolatynyn qarastyryp kóreıik.  

Kúndelikter jaıyndaǵy jalpy maǵlumat

Sizdiń kúndeligińizdiń jalpy alǵanda ańysy qandaı bolatynynan bastaǵan abzal. Kúndeliktiń ishki jaǵynyń ǵana emes, syrtqy jaǵynyń da qalaı árlenip-rásimdeletini osyǵan baılanysty. Bulaı bolatyn sebebi sizge bul kuraldy paıdalaný barynsha yńǵaıly bolýy tıis. Ásirese sizge kúndelik jazyp otyrý unaýy tıis, osy úderisten lázzat alyp, bul sizdiń ermek isińiz bolyp ketýi kerek.  

Qazirgi kezde kóptegen óndirýshilerdiń kúndelikterdi rásimdeýdiń ár-alýan ıdeıalaryn kórýge bolady. Sondyqtan, ózińizdiń talap-tilekterińizge saı bolatyn kúndelikti tańdap alýǵa bolady. Kúndelikterdiń barlyq túrlerin biz tizbektep shyqpaımyz, tek eń kóp taralǵan túrlerin aıtyp shyǵamyz:  

◎ Qarapaıym kúndelik. Bundaı kúndelik retinde ár kúnge arnalǵan tirlikter josparyn jazyp otyrýǵa oryn bar kádimgi bloknot jarap jatyr. Kúndeliktiń bul túrin adamdardyń kóbi paıdalanady, óıtkeni oǵan jazbalardy túrtip otyrýǵa, kerekti nárselerdi belgilep otyrýǵa, ataýly kúnderdi jáne kezdesý ýaqyttaryn belgilep otyrýǵa, týǵan kúnderdi, telefon nomerlerin, mekenjaılardy jáne basqa derekterdi jazyp qoıýǵa yńǵaıly. Qarapaıym kúndelikti adam ózi oılap tabatyn júıe boıynsha toltyryp júredi.    

◎ Jeke (ózińizge arnalǵan) kúndelik. Ony kúndelik deýge bolady, óıtkeni ol eń áýeli emosıonaldyq turǵydaǵy shıryqqan kóńildi ornyna túsirýge, alańdatyp júrgen oılardy qaǵazǵa «tógýge» arnalǵan. Psıhoterapevter men psıhologtar, ásirese artyq sezimge, qorqynyshqa, ýaıymǵa, negatıvti oılarǵa berilgish adamdarǵa, osyndaı kúndelikterdi jazýǵa keńes beredi. Bunyń ońdy nátıjesi shynymen-aq bar — bundaı «praktıkadan» soń adam arqany keńge salyp, jeńildep qalady, óziniń psıhologıalyq kúıin jaqsartady. Jeke kúndelikter, kóbinese, erkin formada jazylyp otyrady.  

◎ Bıznes-kúndelik. Bul bıznesmenderge, isker kisilerge, grafıginde bos ýaqyt az adamdarǵa arnalǵan. Bıznes-kúndelik tirlik-qamdardy rettestirip, eshteńeni umytpaýǵa, mańyzdy aqparattyń kózden tasada qalmaýyna septesedi. Ol naqty rettestirilip (qurylymdalyp), ýaqyt aralyǵy: saǵat, kún, apta, aı jyl retinde anyq jazylýy tıis. Adamnyń jumysyndaǵy nátıjeleri men jetistikteri kúndeliktiń uıymdastyrylýyna edáýir baılanysty.  

◎ Elektrondy kúndelik. Buǵan ár alýan kompúterlik qosymshalar men baǵdarlamalar jatady, biraq keıingi kezderi smartfondar men planshetterge arnalǵan ýtılıtalar da kóptep shyǵa bastady. Elektrondy kúndelikter óte-móte qolaıly, dybystyq habarlamalary t.b. baptap qoıýǵa bolatyn paıdaly fýnksıalary óte kóp. Belsendi ómir saltyn ustanatyndar men utqyr qurylǵylardyń qadirin bietinder úshin olar taptyrmaıtyn kúndelik túri bolmaq.  

Al jalpy aıtyp óter bolsaq, qazirgi tańda kúndelikterdiń mol mólsherin, olardyń ishinde tar salaǵa — «paıdalanýshylardyń» belgili bir maqsattaryna ǵana arnalǵan kúndelikterdi kórýge bolady. Biz olardyń bárin sıpattap otyrmaımyz — dúkenderge baryp, sórelerde ne turǵanyn bir sholyp shyqsańyz jetkilikti.   

Sizdiń qajetińizge jaraýy múmkin kúndelikterdi rásimdeýdiń birneshe ıdeıasyn qarastyraıyq.  

Kúndelik betterin rásimdeýdiń úsh jaqsy ıdeıasy

Tómende usynylyp otyrǵan ıdeıalardy kúndelikterdiń kez kelgen túri úshin paıdalana alasyz. Bylaısha aıtqanda qaǵaz ben qalam bolsa boldy, olardy qoldanýǵa bolady, biraq biz kúndelikterdi paıdalanýǵa keńes beremiz, óıtkeni, birinshiden, qobyratyp paraqtardy tasyp júrmeısiz, ekinshiden, júıeni meńgerip alǵan soń, siz kúndeligińizdi isterdi júrgizý men maqsattarǵa jetýdegi pármendi kómekshińizge aınaldyrasyz.  

Dýaıt Eızenhaýer júıesi boıynsha túziletin kúndelik

Siz Eızenhaýer matrısasymen — taım-menedjment tehnıkalaryna qyzyǵýshylyq tanytatyn kóptegen adamdar paıdasyna jaratyp júrgen josparlaý quralymen tanys shyǵarsyz. Eızenhaýerdiń AQSH-nyń 34-prezıdenti bolǵanyn jáne isteletin tirlikterdi durystap bólý jaıy ol úshin asa tolǵaqty máselelerdiń biri bolǵanyn eske sala keteıik.   

Ádistiń máni óz isterińe beriletin basymdyqty durystap belgileýge saıady. Berekesiz adamnyń kóp ýaqyty bolmashy isterge ketip, mańyzdy da mándi sharýalary iske aspaı qalyp jatady. Onyń jeke basynyń tyndyrymdylyǵy mardymsyz. Biraq matrısany qoldaný arqyly ony joǵarylatýǵa bolady.   

Ol boıynsha maqsat-mindetter eshqashan derlik tek qana mańyzdylar bola bermeıdi, al mańyzdylary — tek qaýyrt bola bermeıdi. Sharýalardyń tórt sanaty bar:  

◎ Mańyzdy jáne qaýyrt sharýalar (olardy dál qazir tyndyrý qajet);

◎ Mańyzdy, biraq qaýyrt emes sharýalar (olarǵa negizgi ýaqytty jumsaý qajet);  

◎ Mańyzdy emes jáne qaýyrt sharýalar (olardy basqa adamdarǵa tapsyrýǵan jón);  

◎ Mańyzdy emes jáne qaýyrt emes sharýalar (olarǵa múldem ýaqytty shyǵyndamaǵan abzal).  

Eızenhaýer matrısasyn alǵash ret qoldanýshylarǵa sharýalardy durys jiktemeleý men olardy tórt sanatqa — matrısa kvadranttaryna bólý úderisi eń kóp qıyndyq týdyryp jatady. Onyń kórinisi mynandaı bolady: 

Keı kisiler belgili bir sharýalaryna basymdyq berý úshin arnaıy tehnıkalardy paıdalanady, biraq kópshilik buny ıntýıtıvti túrde isteıdi. Bloknot paraqtary sýrettegideı sharshylarǵa bólinip, kún saıyn sharýalar sharshylarǵa úlestirilip jazylady. Sanaty joǵary sharýalardy (A, B jáne C) oryndamaı turyp tómen sanatty sharýalardy (B, C jáne D) bastaýǵa bolmaıdy.   

Eızenhaýer matrısasy sharýalardy josparlaýdyń basqa da ádisteriniń paıda bolýyna, mysaly, Stıven Kovıdiń ádistemesiniń paıda bolýyna sebep boldy. Sondaı-aq ony Bullet Jornal kúndeligin jazýda da paıdalanýǵa bolady. Bular jaıynda endi aıtyp beremiz. 

Stıven Kovı júıesi boıynsha túziletin kúndelik

Stıven Kovı zamanymyzdyń eń tabysty motıvasıalyq oratorlarynyń, jazýshylarynyń jáne taım-menedjment jónindegi mamandarynyń biri boldy. Onyń kitaptarynyń kóbi bestsellerlerge aınalyp, áli kúnge deıin dúnıe júzinde kóp-kóp taralymmen shyǵarylyp jatyr. Kovıdiń ózi bolsa, «Forbes» jýrnalynyń pikirinshe Amerıkanyń eń yqpaldy 25 adamynyń ishine kirdi.  

Bul kisiniń eńbegin kóptegen korporasıalar qyzmetkerlerine ýaqytty utymdy paıdalanýdyń negizderin jáne jeke bas tyndyrymdylyǵyn arttyrýdy úıretýde paıdalanyp júr. Bul jerdegi quraldardyń biri Kovıdiń «Jasampaz jandardyń jeti daǵdysy» kitabynda aıtylǵan qaǵıdattarǵa sáıkes keletin kúndelik bolyp tabylady.  

Kádimgi kúndeliktiń ózi kóptegen paıdaly fýnksıalary bar kásibı josparlaýyshqa (organaızerdiń fýnksıalary artqan nusqasy) aınalady. Ol bızmenmenderge jáne búkil sharýalary men maqsat-mindetterin ret-retimen atqaryp, baqylaýynda ustaýdy qalaıtyn; ýaqyt resýrsynyń qadirin biletin adamdardyń ıgiligine jaraıdy.

Kovı júıesi boıynsha túzilgen kúndelik eki bólikten: negizgi bólikten jáne qosymshadan quralady. Negizgi bóligi — bul kúndelikti josparlardy jasaýǵa arnalyp syzylǵan better. Onda múmkindiginshe tez oryndalýy nemese dál belgilengen ýaqytynda istelýi tıis sharýalar jazylady. Ekinshi qosymsha negizgi maqsattar, sondaı-aq adamnyń qundylyqtary (oǵan arnaıy oryn bólinedi) jazylatyn apta saıynǵy jáne aı saıynǵy jazbalarǵa arnalady. 

Tapsyrmalardy, sharýalardy jáne maqsattardy naqty-naqty belgilep, basymdylyǵyn aıqyndaý (qazir ne isteý kerek, neni — erteń, neni — kelesi aıda t.b. isteý kerek) arqasynda Stıven Kovı júıesi boıynsha túzilgen kúndelik adamǵa tyndyrymdy bolýǵa septigin tıgizedi. Ony paıdalanyp, kún saıynǵy jáne apta saıynǵy josparlaýmen ǵana emes, tabysqa jetelep, maqsatqa jetkizetin jahandyq josparlardy da jasaýmen aınalysýǵa bolady.

Gleb Arhangelskıı júıesi boıynsha túzilgen kúndelik

Bul kúndelik taım-menedjment salasyndaǵy reseılik maman Gleb Arhangelskııdiń avtorlyq týyndysy. Ádisteme qazirgi tańdaǵy eń tıimdilerdiń biri.

İs-tapsyrmalar birinshi kezektegiler men ekinshi kezektegilerge bólingendikten kúndeliknaqty-naqty qurylymdalǵan. Bul onyń jalǵyz ereksheligi emes — onyń taǵy bir ereksheligi osy quralmen jumys isteýdiń óte qyzyqtylyǵynda. Ol úshin avtor kúndelik betterine ártúrli kúndelikti sharýalardy kúlkili, biraq naqty ári bári qamtylǵan formada jazyp qoıǵan.   

Sondaı-aq, árbir bette sol kúni bolatyn oqıǵalarǵa arnalǵan oryn bar (ol oryndy ózińiz belgileısiz). Sonda, qarabaıyr tirliktermen qatar, josparlar men oqıǵalardy jadyńyzda jańǵyrtyp, sonymen birge kóńilińizdi bir kóterip qoıý úshin kóz júgirtip turýǵa bolatyn jeke kúndelikti de jasap otyrasyz.  

Buǵan qosa, kúndelikte «Syılyq» belgisi tańbalanǵan «Aralyq shattyq» bar, onda dostarmen kezdesý, kınoǵa barý, dúken aralaý jáne basqa kúndelikti janǵa jaıly kóńil kóterý sharalaryna arnalǵan ýaqytty engizip qoıýǵa yńǵaıly. Kúndelikti paıdalanýshy nazaryn basqaǵa aýdarmaýy úshin bul baǵan bettiń tómengi jaǵyna jaıǵastyrylǵan.  

Arhangelskıı kúndeligi udaıy túzetilip, jaqsartylyp otyrady jáne onyń birneshe nusqasyn tabýǵa bolady. Tanysyp shyǵý úshin onyń betterin túzýdiń bir mysalyn kóreıik:

Baıqaǵandaryńyzdaı, bettiń joǵary jaǵynda «Baqa» jáne «Pil» grafalary bar. Bul tirshilik ıeleri taım-menedjmenttiń klasıkasy bolyp ketti: baqalarǵa tezirek sheshimin taýyp, bir jaqty bolýy qajet usaq, sonshalyqty qyzyqty emes jáne jaǵymdy emes sharýalar jatady (bul baqalardy «jep qoıý» kerek). Al pilder — bul kúrdeli jáne aýqymdy is-sharýalar. Pildi «jeý» úshin ony kishkentaı túıirlerge «týrap» tastaý, ıaǵnı úlken bir sharýany birneshe kishkentaıǵa bólshekteý qajet.

«Qatań kezdesýler» baǵanyna kelsek, ol jerge tek júzdesýlerdi ǵana emes, belgili bir ýaqytta aıaqtalýy tıis sharýalardy da túrtip qoıýǵa bolady. Al «Jumsaq is-tapsyrmalar» baǵanyna qatań kezdesýler men sharýalardan bos kezde atqarýǵa bolatyndardyń bári jatady.    

Keshke qaraı atqarylǵan istiń bárin qarap shyǵyp, eń mańyzdylary men jaǵymdylaryn tańdap alyp, grafalardyń tusyna «Kún» belgisin qoıý kerek. Aı aıaqtalǵan kezde qandaı jumys kólemi atqarylǵanyn kórý úshin jazbalaryńyzdy qarap shyǵýǵa óte yńǵaıly. Bul grafa basymdylyq qanshalyqty durys berilip jatqanyn jáne qandaı sharýalar eń mańyzdy bolǵanyn óte jaqsy kórsetip beredi.

Taǵy bir aıtarlyǵy: ár bettiń tómengi jaǵynda bıznes jáne ýaqytty paıdalaný jónindegi aqyl-keńester bar. Barlyǵy 365 aqyl bar, ıaǵnı ár kúnge arnalǵan bir keńes bar. Olardy jumysta jáne bızneste (oqýda da) paıdalanýǵa bolady. Bul kúndelikti óte utymdy jáne qyzyqty kural etedi.

Joǵaryda aıtylǵandarǵa qosa aıtpaǵymyz — sizge mindetti túrde joǵaryda aıtylyp ótken kúndelikterdiń bireýin satyp alýǵa dúkenge qaraı shaba jónelýdiń qajeti joq. Siz kúndelik betterin túzý ıdeıalaryn kez kelgen kúndelikke, tipti qoldan jasalǵan kúndelikke de, qoldana alasyz. Bylaısha aıtqanda, josparlaý jáne ýaqytyńyzdy tıimdi paıdalaný quralyn qolǵa túsirý úshin kóp aqsha shyǵyndamasa da bolady.  Eger siz azdaǵan eptiligińiz ben qıalyńyzdy qoldanýǵa jáne qyzǵylyqty ermekke az ǵana ýaqytyńyzdy arnaýǵa daıyn bolsańyz, sizge kúndelikti qoldan jasap alýdy usynamyz. Bizge senińiz, bunyń eshqandaı qıyndyǵy joq. Bul sharýa balalarmer birge ýaqytty jaqsy ótkizýge de jarap tur.  

Óz qolyńyzdan shyqqan kúndelik

Kúndelikti (onyń ishinde Bullet Journal kúndeligin de) óz qolyńyzben jasap alý men rásimdeýdiń qıyndyǵy joq. Aldyn ala keńselik zattardy: túrli-tústi qaryndashtardy nemese markerlerdi, kartondy, vatmandy, aq jáne túrli-tústi qaǵaz paraqtaryn, jelimdi, eki jaǵy da jabysqaq skochty daıyndap alyp, kúndeliktiń syrtqy jáne ishki jaǵy qalaı jasalatynyn jaqsylap oılastyrsańyz jetip jatyr. Taǵy ne qajet bolatynyn oqyp kóreıik.  

Kúndeliktiń syrtqy jaǵy

Kúndeliktiń syrty  —  bul onyń bet-júzi, sondyqtan ony saýatty ári durys jasaý qajet. Jasaý barasynda álbomdyq nemese bloknottyq pishimdegi (format) daıyn úlgilerdi (olardy keńse zattary dúkenderinen, ınternetten júktep alýǵa nemese baspahanadan tapsyrys berý arqyly alýǵa bolady) paıdalanýǵa nemese ózińiz jasaǵan túrin negizge alýǵa bolady.  

Kúndeliktiń syrtqy jaǵyn rásimdegen kezde ár alýan dekoratıvtik materıaldardy qoldanyp kórgenniń paıdasy kóp. Mysaly, túrli-tústi karton alyp, odan oıýlar qıýǵa jáne olardan buıymyńyzǵa ár beretin aplıkasıa túzýge bolady. Al qyzdarǵa monshaq tastaryn paıdalanyp kórýge keńes beremiz — ol órnekter men keskinderdi (syzbasy boıynsha) salýǵa óte jaqsy. Eger monshaqtan geometrıalyq órnek nemese etnıkalyq stıldegi órnek salynsa, erlerdiń kúndelikteri de osylaı bezendirilýi múmkin.

Aıtpaqshy, vıntaj stılinde jasalatyn kúndelikter tamasha shyǵady. Eger siz qara, sur jáne qońyr tústerdi belgili bir stıl boıynsha úılestirseńiz, syrtqy kórinisi keremet bolyp shyǵady. Degenmen, monshaqty ǵana qoldanyp qoımańyz — dermantındi, jasandy terini nemese basqa bir jasandy materıaldy paıdalanyńyz (tabıǵı bylǵaryny paıdalanýǵa eshkim tyıym salyp jatqan joq, tek ol kádimgideı qymbatqa túsedi).

Kúndelik syrtyn rásimdeýdegi mańyzdylyǵy bir mysqal da kem emes bóligi — ol bekitpe ilgegi. Qazirgi tańda olardyń túr-túri kóp: sydyrma, toıtarma, baý, shyrtyldaq, túıme jáne basqalary bar. Bul tusta eshqandaı shekteý joq jáne bári sizdiń kóńilińizdiń júıriktigine, kúndeliktiń qandaı bolǵanyn qalaǵanyńyzǵa jáne tańdaǵan stılge sáıkesýine baılanysty.  

Kúndelik tıpin, ony bastaýdaǵy maqsatyńyzdy (jumys, kezdesýler, jeke jazbalar jáne t.b.) jáne pishimin (format) aıqyndap alyńyz. Dál osydan bastaǵan abzal jáne osy qaǵıda syrtyn ǵana emes, sizdiń organaızerińizdiń, plannerińizdiń nemese kúndeligińizdiń ishin rásimdeýge de qatysty.

Kúndeliktiń ishki jaǵy

Kúndelikttiń ishki jaǵymen aınalysý syrtymen aınalysqannan da qyzyq. Ony jetekshi jaǵy deýge bolady, óıtkeni ol bul quralmen jumys isteýdegi yńǵaılylyq pen jaılylyqqa, sondaı-aq alatyn lázzatqa jáne, álbette, jeke bas tyndyrymdylyǵyna áser etedi. Mańyzdy eki nársege nazar aýdarǵan abzal — bul kúndeliktiń betteri men olarǵa kerekti belgilerdiń jazylyp-syzylýy.

Betterdiń sapasy, sonymen qatar olardyń qandaı túspen árlenetini erekshe mánge ıe. Asa qanyq jáne jarqyn tústerdi paıdalanbaı-aq qoıǵan durys, óıtkeni olarmen jumys isteý yńǵaısyzdyq týdyrady — olar jazýdy kórýdi qıyndatady (sosyn kórý apparatyna qajetsiz artyq kúsh túsiredi). Sondyqtan, better kóz qarymaıtyn, jumsaq jáne kózge úırenshikti reńde bolýy tıis. Jumsaq (pasteldik) reńkterdi paıdalanyp kórińiz — olar kózdi taldyrmaıdy (onyń ústine olardyń antıstresstik áseri de bar).

Endi kúndelik betterin qalaı «shımaılaıtynymyz» jaıynda birer sóz. Kúndelikti rásimdeýdegi negizgi qaǵıdattardyń biri — ol betterin nómirlep shyǵý. Eger betteri nómirlenip tursa, kerekti aqparatty siz anaǵurlym ońaıyraq jáne tezirek taýyp alyp otyrasyz. Kelesi mańyzdy nárse — ol syzǵylap-belgilep shyǵý. Eger sizdiń ustaıtynyńyz planner nemese organaızer bolsa, onda onyń betteri kúnder, ýaqyt jáne jazbalar túsetin bolyp syzyqpen bólinip turýy tıis.

Ary qaraı kúndelik betterin yńǵaıyńyzǵa qaraı bezendire beresiz. Qıaldap kórińiz: betterine fondyq sýretterdi, týystaryńyzdyń sýretterin, maqsat-murattaryńyzdyń beınesin, mandalalardy, uly adamdardyń aıtqan sózderin nemese basqa birnárse salyp qoıýǵa bolady. Betterdi biz joǵaryda aıtyp ótken úlgiler boıynsha rásimdeı berýge bolatynyn umytpańyz.  

Jazbalardy erekshe túrde, tipti qupıa jazý (shıfrlar) arqyly, jazyp otyrýǵa bolady. Árıne, kúndelikti atqarylyp júrgen ister úshin shıfrdy qoldaný durys bola qoımas, biraq qandaı da bir derekterdi qupıa ustaý qajet bolsa, bul jaqsy amal. Shıfr tek sizge ǵana túsinikti bolýy tıis, al onyń oqylý jolyn (bul da tek sizge ǵana túsinikti bolýy tıis) kúndeliktiń sońǵy betine jazyp qoıýǵa bolady. Osylaı etseńiz, basqalar bilmeýi kerek nárseni eshkim bile almaıtynyna senimdi júrýge bolady jáne bildirmeý úshin jazbalaryńyzdy tyǵyp ustaýdyń qajeti bolmaıdy.  

Maqalanyń negizgi ıdeıasyn túsindirip bere aldyq dep bilemiz. Endi kúndeligińizdi rásimdep alý ońaı bolady. Alaıda, joǵaryda aıtylyp ótken Bullet Journal kúndeligi týraly birer sóz artyq bolmaıdy dep oılaımyz. Osy ýaqyt pen isterdi utymdy uıymdastyrý quralyn paıdalanýdy ıgerip alýǵa keńes beremiz.

Bullet Journal kúndeligi

Bullet Journal kúndeligin áıgili veb-dızaıner Raıder Kerroll oılap tapqan. Ol birneshe jyl boıy óziniń ýaqytyn meılinshe utymdy uıymdastyrý jolyn izdep, nátıjesinde osy biregeı quraldy jasap shyǵardy.   

Bullet Journal kúndeliginiń negizgi ereksheligi onyń óz ıesine barynsha sáıkes keletininde. Bylaısha aıtqanda, bul óziń yńǵaıyna ıkemdeletin daıar turǵan úlgi emes, bul ózińe yńǵaılap alatyn júıe: rásimdeısiz, oılastyrasyz jáne qoldanasyz.  

Býllet Djornaldy kúndelik pen plannerdiń qospasy deýge bolady. Ol qyzyqty oılar men ıdeıalardy, mindetterdi, maqsattardy jáne josparlardy (uzaqmerzidilerdi de) jazyp otyrýǵa, sondaı-aq arnaıy belgiler arqyly qajetti aqparatty tez izdep tabýǵa bolatyn qural. Mindetter men isterdi, eshteńeni kózden tasa qylmaı, basqa ýaqytqa jáne basqa kúnge op-ońaı aýystyryp otyrýǵa bolady.  

Kerroll kúndeligi telefon dápterine jáne qoıyn dápterine, tipti Trello men Evernote sıaqty qosymshalarǵa kúshti balama bola alady jáne basymdyqtardy belgilep, óziniń iskerı jáne kúnbe-kúngi ómirin josparlap otyrǵandy jany súıetinderge qolaıly.

Bundaı quraldy kez kelgen adam jasap ala alady. Aldymen jaqsy bir bloknot (nemese dápter) satyp alý kerek. Ol óte kishkentaı jáne óte úlken (A5 pishimdegisi jaraıdy), asa aýyr nemese tym jeńil bolmasyn. Bastysy — ony paıdalaný men ózińmen birge alyp júrý sizge qolaıly bolýy kerek.  

Bloknottyń betteri nómirlengen bolǵany óte mańyzdy. Eger ondaı bolmasa, ózińiz nómirin qoıyp shyǵyńyz. Birinshi betti (birneshe betti arnasańyz da bolady) kúndelikti júrgizý barysynda jazyp otyratyn mazmuny bolýy tıis — kúndeligińizdiń taraýlary men olarǵa arnalǵan betterdi jazyp toltyryp otyrasyz.

Budan keıingi birneshe betti jyldyq bólimge arnaý qajet. Bir betke, ony teń úsh bólikke bólip, úsh aıdy syıdyrýǵa bolady. Bunda iri-iri josparlar men maqsattar, eleýli oqıǵalar men kúnder jazylady. Jyldyq bólim josparlardy jalpy baǵamdap otyrýǵa yńǵaıly.

Budan keıin kelesi bólim — bir aıǵa arnalǵan better bastalady. Kerroldyń ózi bettiń sol jaǵynda bir baǵanǵa aıdyń kúnderin, janyna apta kúnderin jazyp shyǵýǵa keńes beredi. Ár kúnniń tusyna bolatyn ýaqyty ózgermeıtin oqıǵalardy (jol júrý, issapar jáne t.b.) túrtip qoıýǵa yńǵaıly. Bettiń oń jaǵyna belgili bir kúnderge baılanysty emes, biraq naqty sol aıda atqarylýy tıis barlyq iri-iri mindetter men máselelerdi jazyp qoıý kerek.

Eń aqyrynda, kún saıynǵy jazbalardyń kezegi keldi. Olarǵa qalǵan betterdiń bári arnalady (ár aı bitkende jańa aıǵa arnalǵan better bastalady). Mindetter tarmaqtar túrinde jazylyp, al tizimdegi tarmaqtardyń ózin arnaıy tańbalarmen belgilep otyrý qajet, mysaly:

◎ núkte  —  kún saıynǵy qam-qareket pen usaq tirlikter;  

◎ sheńber  — is-sharalar, kezdesýler jáne oqıǵalar;  

◎ syzyqsha  —  oılar, ıdeıalar jáne este bolsyn dep túrtip qoıǵan jazbalar;  

◎ juldyz  —  asa mańyzdy ister;  

◎ lep belgisi  —  asa shuǵyl ister.  

Bir is atqarylyp bitken kezde sımvol ornyna sharmyq (kres) qoıylady. Ár kúnniń jáne aptanyń aıaqtalýyna qaraı oryndalmaǵan mindet-tapsyrmalardy bir qarap shyǵý kerek te, olardyń oryndalýy áli de mańyzdy ma, joq pa anyqtap alý kerek. Eger mańyzdy bolmasa — esh oılanbaı olardy syzyp tastańyz, al eger mańyzdy bolsa — nusqama tańbasymen (➜) nemese «>» tańbasymen belgilep qoıyńyz, ıaǵnı oryndalý merzimin keıinge (kelesi kúnge, aptaǵa nemese aıǵa) aýystyryńyz.  

Osylarmen qatar, siz basqa da sımvoldardy paıdalana alasyz. Mysaly, «$» arqyly qarjyǵa baılanystynyń bárin belgilep otyryńyz ("$+" tańbasy — tabys, "$-" — shyǵyn) taǵy sol sıaqtylar. Tek shatasyp júrmeý úshin, tańbalar óte kóp bolyp ketpese boldy. Qolaıly bolýy úshin bloknottyń bólek bir betine barlyq tańbalardy jáne olardyń neni bildiretinin jazyp qoıýyńyzǵa bolady.  

Kórip otyrǵanyńyzdaı, Bullet Journal-dy jazyp otyrýdyń esh qıyndyǵy joq. Jalpy alǵanda bul kez kelgen kúndelikke terezesi teń balama jáne biz sizge, zaýqyńyz soǵyp jatsa, osy keremet quraldy paıdalanyp kórýge keńes beremiz. Bul quraldyń kóńilińizden shyǵatynyna senimimiz kámil.

Ár isińiz tabysqa jetelesin!

---