InfoHub Logo

Qazaqstan oqýshylarynyń matematıka-jaratylystaný ǵylymı saýaty boıynsha álemniń úzdik 10 eliniń qataryna kirdi. Bul týraly QR Bilim jáne ǵylym mınıstri Ashat Aımaǵambetov aıtty.

«Postkeńestik elderde kadr daıyndaý júıesi eńbek naryǵynyń talaptaryna saı emes, memlekettik retteý tym artyq, al oqytý negizinen akademıalyq sıpatqa ıe» degen pikir bar. Shynymen de, bul syn ádil. Atalǵan problemany sheshý úshin Qazaqstan táýelsizdik jyldarynda kóptegen ádisterdi oı eleginen ótkizip shyqty. Búgingi kúni bizdegi bilim berý júıesi biliktiligi joǵary adamı kapıtaldy daıyndaýǵa toǵystyrylǵan», - dedi mınıstr  QR Prezıdenti Qasym-Jomart Toqaevtyń tóraǵalyǵymen ótip jatqan Sheteldik ınvestorlar keńesiniń otyrysynda.

Osy oraıda Ashat Aımaǵambetov oǵan QR Tuńǵysh Prezıdenti - Nursultan Nazarbaevtyń bastamasymen qolǵa alynǵan «Bolashaq» baǵdarlamasy jarqyn dálel bola alatynyn aıtty. Ol búginde shamamen 11 myń stıpendıat sheteldegi oqýyn bitirip, Qazaqstan ıgiligi úshin jumys istep jatqanyn atap ótti.

«10 jyldyń ishinde Qazaqstan adamı damý ındeksi boıynsha ósim kórsetip, adamı kapıtaly óte joǵary deńgeıdegi elderdiń qataryna kirdi. Bizde halyqtyń 100 paıyzǵa jýyǵy saýatty. Balalardyń 95 paıyzy mektepke deıingi tárbıemen jáne oqýmen, al 100 paıyzy mektepte oqýmen qamtylǵan. Oqýshylarymyz da básekege qabiletin kórsetip júr. Matematıka-jaratylystaný ǵylymı saýaty zertteýinde balalarymyz progres kórsetti. Sońǵy ólshemge sáıkes elimiz álemniń 40 eliniń ishinde úzdik 10 eldiń qataryna kirdi», - dedi A.Aımaǵambetov.

---