InfoHub Logo

Ertede el berekeli, molshylyq zaman bolypty. Aǵashtar bolsa jemisin ázer kóterip turady eken. Barlyq ań, jan-janýar emin-erkin ómir súripti. Baqa ǵana bajyldap júrip, sýda da, qurlyqta da tynym tappapty. Jerge shyqqanda jertóle qazypty. Aǵashtan tógilgen jemisterdi jertólesine tasyp, murnyna sý jetpeı júripti... Sýǵa tússe, injý-marjan terip, tuńǵıyq gúlin úzip, jylt etken jaqsy nárselerdi jınaýmen aınalysypty. Ný orman ishinde ań ataýly emin-erkin kún keship, saýyq-saıran quryp júrgende, baqa óz qarbalasynan tanbapty.

Qaharly qys keledi. Sýyqqa tońyp, qaryndary ashqan ańdar endi ǵana baqany eske alady. Aıaqtarynyń astynda tógilip jat­qan jemisterdi baqa sıaqty jınap almaǵandaryna qatty ókinedi.

— Baqataı, bala-shaǵamyz ashyǵyp jatyr. Azyǵyńnan qaraı­lasa gór, — dep baqanyń terezesine telmiretinder kóbeıdi.

— Aqshalaryń bolsa alyńdar, aqsha bolmasa taıyńdar, — deıdi baqa.

Baqanyń bul sózi ashyqqan ańdardyń kóbine soqqy bolyp tıdi. «Ol kókbetten kútýge bolatyn sóz» dep bireýi tildep, bireýi qarǵady. Áıtse de, tamaqqa toqtaý bar ma, báribir ony munysyn aparyp, tamaqqa aıyrbastap alyp júredi.

Baqa baıydy, biraq tegin eshkimge eshnárse bermedi. Bul jaǵdaı keıbir janýarlardyń zyǵyrdanyn qaınatty.

Sóıtip olar baqanyń úıin órteýdi uıǵarysty. Tátti uıqyda jatqan baqanyń áýletine qaraly kún týdy. Barlyq nárseniń aldy-artyn oılaıtyn baqa altyn toly qapty arqalap, jer asty arqyly ázer qashyp shyǵyp, jan saýǵalady. Bala-shaǵasynyń qatygezdikte ólgenin bildi. Sonyń kúıiginen tilinen aırylyp, eńsesin basqan qaıǵydan adymdap júre almaıtyn halge jetti. Altyndarynyń salmaǵy jaýyrynyn janshydy. Keıinnen tas arqalaǵan tasbaqalar ómirge keldi.

Qula túzde, sorda, betpaq dalada, elsiz mekende tasbaqalardyń ómir súretini sondyqtan eken. Eshkimge qıanaty joq, biraq ómirge ókpesi kóp.

---