InfoHub Logo

Qara kúshine masattanǵan bir maqtanshaq balýan:

— Balýan ataýlynyń bárin jyǵyp boldym. Endi kim qaldy menimen ustasatyn, — dep jar salypty.

Maqtana sóıleıtin kisini jany jek kóretin bir qarapaıym aryq jigit:

— Men kúresemin, — dep halyqty kýá qylyp, maqtanshaq balýanǵa qarsy shyǵypty. Balýan tyrtyıyp turǵan aryq jigitti kelemejdep:

— Bel omyrtqań úziledi ǵoı, sorly, — depti.

Jigit:

— Úzilse úzilsin, maǵan sonysy kerek. Sondyqtan myna shartpen kúreseıik: ustasa ketkende birimizdi birimiz qysyp oıbaılataıyq. Sol jyqqan bolyp eseptelsin, — degen eken.

Kúshine sengen balýan jigitti kekete-muqata kelisimge kelipti. Jıylǵan halyq kýá bola maqtanshaq balýannyń jyǵylýyn tilepti. Sol eki arada eki balýan ustasa ketipti. Shyn balýan jigittiń belin úzip jibermekshi bolyp, soıyldaı qolyn oıqastyra bergende, jigit alaqanyna qysqan tebenin beline suǵyp alypty da laqtyryp jiberipti. Balýannyń jan daýsy shyǵyp, jigitti qoıa berip, ytyp ketipti. Jıylǵan jurt «jyǵyldyń» desip, maqtanshaqty mazaqtap, jigitke alǵys aıtysypty. Yzalanǵan balýan daýryǵa ózeýrep:

— Aldady, deneme bir páleni tyǵyp aldy. Nanbasańdar qarańdar, qany aǵyp tur, — dep kóılegin sheshipti. Jurt qarasa qan túgili saıtan da joq. «Bul qalaı» dep ań-tań bolǵan balýanǵa jurt:

— Balýandyǵyń jaqsy, maqtanshaqtyǵyń jaman. Maqtanshaqtyń joly bir-aq tutam, — desipti.

Sonymen, qarapaıym jigit qan shyǵarmaıtyn dárimen dárilengen tebenmen maqtanshaqtyń únin aqyl-aılamen óshirgen eken.

---