InfoHub Logo

Qatysýshylar:
Maqtaqyz
Mysyq
Sıyr
Aǵash
Qyzdar
Satýshy
Taýyq
Tyshqan

Daýys. Baıaǵyda Maqtaqyz ben mysyq dos bolady. Birde Maqtaqyz úıin jınap júrip, meıiz taýyp alady.

Maqtaqyz. Mysyǵym, mysyǵym, men meıiz taýyp aldym. Kel, ekeýmiz jeıik!

Daýys. Mysyǵy kelmeıdi. Sosyn meıizdi ózi jep qoıady.

Mysyq (sálden soń kelip). Nege shaqyrdyń?

Maqtaqyz (qyrsyǵyp). Óziń shaqyrǵanda kelmediń. Endi aıtpaımyn.

Mysyq. Endeshe, qatyǵyńdy tógem!

Maqtaqyz. Men quıryǵyńdy kesip alamyn!

Mysyq. Al men qatyqty tóktim.

Maqtaqyz. Al men seniń quıryǵyńdy kesip aldym.

Mysyq. Apa, apa, quıryǵymdy bershi!

Maqtaqyz. Meniń qatyǵymdy taýyp ber!

Mysyq (sıyrǵa). Sıyr, sıyr, maǵan qatyq bershi.

Sıyr. Meniń qarnym ashyp tur. Maǵan japyraq ákelip bershi.

Mysyq (aǵashqa baryp). Aǵash, aǵash, japyraǵyńdy bershi!

Aǵash. Men shóldep turmyn. Sý ákelseń, japyraq beremin.

Mysyq. Qyzdar, qyzdar! Aǵash shóldep tur eken. Maǵan sý berińdershi. Aǵashqa aparyp bereıin.

Qyzdar. Bizge saǵyz ákelip berseń, biz saǵan sý beremiz.

Mysyq (dúkendegi satýshyǵa). Áı, satýshy, maǵan saǵyz bershi!

Satýshy. Maǵan jumyrtqa ákelip ber. Sosyn saǵyz berem.

Mysyq (taýyqtarǵa baryp). Taýyq, taýyq, maǵan jumyrtqa bershi!

Taýyq. Bizge jem ákelip berseń, biz saǵan jumyrtqa beremiz.

Mysyq. Endi qaıttim? Ony qaıdan tabam? Á, bálem, myna bir tyshqan in qazyp jatyr eken. Qambadan dán urlaǵysh qoı. Jem taýyp ber dep janyn shyǵaraıyn. (Tyshqanǵa bas salady.) Janyńnyń barynda aıt, úıinde ne bar?

Tyshqan (qatty qorqyp). Úıimde bir tabaq tarym bar.

Mysyq. Maǵan bir ýys tary ber!

Tyshqan. Qup, taqsyr, kazir, qazir! (Tyshqan júgirip baryp, bir tostaǵan bıdaı ákelip beredi.)

Mysyq (masattanyp). Á, qorqaq tyshqan, ákeldiń be? Men muny taýyqqa aparyp bereıin.

Taýyq. Jaraısyń, mysyǵym! Má, jumyrtqamdy ala ǵoı.

Mysyq. Raqmet, tarǵyl taýyq! Men muny satýshyǵa bereıin.

Satýshy. Má, saǵyzyńdy ala ǵoı.

Mysyq. Qyzdar, qyzdar, senderge saǵyz ákeldim. Shaınańdar máz bolyp...

Qyzdar. Pyryldaq mysyq, má, sýyńdy al.

Mysyq. Aǵash, aǵash, sýyńdy ákeldim.

Aǵash. Qalaǵanyńsha japyraǵyńdy al.

Mysyq. Sıyr, sıyr, men japyraq ákeldim.

Sıyr. Jaraısyń, pyryldaq! Qatyǵymdy qalaǵanyńsha al.

Mysyq. Maqtaqyz-aý, Maqtaqyz, ýáde boıynsha saǵan qoıý qatyq ákeldim.

Maqtaqyz. Kórdiń be, mysyqan, (ony erkelete qolyna alady) biz bir-birimizge osylaı kómektesýimiz kerek. Sonda bári bolady. Má, quıryǵyńdy ala ǵoı. Bárimiz de endi dos boldyq.