InfoHub Logo

Qatysýshylar:
Qoıshy
Túlki
Aıý

Qoıshy. Bir túlkini bir aıý qýyp keledi eken. Túlki bir tamǵa tar tesiginen kirip ketedi. Aıý da tamǵa kireıin degende tesikke keptelip qaldy. Iá ári, ıá beri shyǵa almady. Túlki ony mazaqtap, kúlip, qashyp ketti.

Aıý (tesikten ázer shyǵyp). Eı, qoıshy, sen ne kórdiń?

Qoıshy. Kórgenimdi aıtaıyn... Bir aıýdy bir túlki mazaqtap, qashyp ketti.

Aıý (ashýlanyp). Eger de osyny bireýge aıtsań, seni jep qoıamyn!

Qoıshy. Oıbaı, onda aıtpaımyn!

Aıý. Maqul, sendim. Biraq bireýge aıtsań, menen jaqsylyq kútpe!

Qoıshy(zalǵa qarata). Bul qyzyqty jurtqa qalaı aıtpa-ıyn... İshimdi tesip barady. Bárine aıttym. Bári kúldi. Al aıý ony estip qoıypty. Erteńine maǵan keldi. Ózi ashýly.

Aıý. Eı, qoıshy, seniń eshkimge aıtpaımyn degeniń qaıda? Sózińde turmadyń. Sondyqtan men seni jeımin!

Qoıshy (jylamsyrap). Úsh kúnge ruqsat bar. Úı ishimmen, aǵaıyn-týysqanmen qoshtasyp keleıin...

Aıý. Jaraıdy, jylama! Úsh kúnge ruqsat berdim.

Qoıshy (zalǵa qarap). Dalada jylap otyrsam, janyma aıýdy mazaqtap ketken túlki keldi.

Túlki. E, qoıshym, nege jylap otyrsyń?

Qoıshy. Óı, qańǵyǵan qý túlki! Bári seniń kesiriń. Aıýdy seniń mazaq qylǵanyńdy aýyldaǵylarǵa aıtyp qoıyp... Aıý meni jeımin deıdi...

Túlki. Sol da sóz bolyp pa?! Men bir amalyn tabamyn. Aıýdan qutqarsam ne beresiń?

Qoıshy. Oıbaı, qalaǵanyńdy al!

Túlki. Aıýǵa jem bolmaıyn deseń, maǵan bir búıregińdi ber.

Qoıshy. Bastan qulaq sadaǵa. Búıregimdi bereıin.

Túlki. Al, qoıshy, bir qap tap. Aıý kelgende anaý jerde shańdy burqyratyp men júreıin. Aıý: «Anaý ne?» dese, «Hannyń balasy da, seniń etińdi jeımin dep júr» de.

Qoıshy. Qalaı aıtam? Qorqam. Senimen qosa meni jep qoısa qaıtem.

Túlki. Óı, aqymaq! Meniń aıt degenimdi aıtsań, aıý qorqady: «Oıbaı, meni jasyr. Qaıda tyǵylamyn?» deıdi.

Qoıshy. Sonda ne isteımin?

Túlki. Ana qolyńdaǵy qaptyń aýzyn ash ta. «Mynda tyǵyl!» de.

Qoıshy (úreılenip). Sosyn...

Túlki. Sosyn qorqaq aıý qapqa kiredi. Sol kezde qaptyń aýzyn myqtap baıla. Shoqparmen ur. Sespeı qatady.

Qoıshy (zalǵa qarap). Túlki qý osyny aıtty da, tyǵylyp qaldy. Aıý keldi. Túlkiniń aıtqanynyń bárin istep edim, sespeı qatty. Daıyn asqa tik qasyq, yrjalańdap, áne, túlki de kele jatyr.

Túlki. Eı, qoıshy! İs bitti. Baǵanaǵy ýáde boıynsha endi maǵan búıregińdi ber!

Qoıshy(qıpaqtap, jylamsyrap). İshim shuryldaı ma, quryl-daı ma, yryldaı ma? Bilmeımin... Búıregimdi bir nárse talap jep jatqan sıaqty.

Túlki (úreılenip, qoıshynyń ishine qulaǵyn tige qoıyp). Ol ne qyńsylaǵan?

Qoıshy. Túneýkúni bir tazynyń kúshigin jutyp qoıyp edim. Sol endi úlken tazy bolyp, ishimnen shyǵaıyn dep, qyńsylap jatyr. Ásti seniń ısińdi sezip tursa kerek.

Túlki. Oıbaı, qoıshy, dos edik qoı! Tazy shyqpaı turǵanda, men zytaıyn! Dos edik qoı, shyǵarmaı tura tur!

Qoıshy. Áp, bálem! Qý túlki! Adamnyń aqylyna quryq ta boı-lamaǵan, oǵan qýlyǵyń da teń kelmes! Aıt, aıt, aıtaq, alyp-soǵym.