Birinshi óleń
Ol ómirge kelgende kóktem edi,
Jer gúlin, kók te nuryn tókken edi.
Saıalatyp sal-samal ópken edi,
Sol ómirge nesine ókpeledi?!
Sol ómirge nesine ókpeledi?!
Al ómir ony syrtqa teppep edi.
Qaıǵyrmaımyn, jyrym ǵoı jazylmaǵan,
Kúrsintkeni bolmasa tekke meni.
Kúrsindirip ketti ǵoı tekke meni...
Qoıshy, táıiri, osynaý ıt ómirge
Tekke kelip, adamdar tekke óledi.
Deı almaımyn ómirge ol ókpeledi,
Jer astyna jem kerek túzden keıde,
Júzder ótip ómirden, júz kelmeı me.
Qoıshy, táıiri, dalanyń raýshany
Kóktemde ósip, osylaı kúzde ólmeı me?!
Ekinshi óleń
Túsime endi ap-aryq qyzym búgin,
Qyzym búgin... Julynǵan qyzyl gúlim.
Baqshamdaǵy balbyrap pisip turǵan
Úzip ketti, apyr-aı, júzimdi kim?
...Túsimde qyzym meni shaqyrady,
Ózenniń ar jaǵynda otyr, áni...
Ǵafý, balam, ǵafý et, bara almaımyn,
Men degen jer betiniń «aqymaǵy»
Men degen jer betiniń «aqymaǵy»,
Aldymda asqar asý jatyr áli.
Sabyr, balam, qaı jaqqa qashar deısiń
Seni japqan qara jer topyraǵy...
Deı kórme ázir maǵan janyma kel,
Taǵdyrdyń degenine baǵyna ber.
Túbinde bir jol bizdi tabystyrar,
Qaıteıin, saǵyna ber, saǵyna ber...

---