InfoHub Logo

Adam balasynyń búkil ómiri kóptegen sátterden turady, al olardyń ishindegi eń keremet sátterin keıde toqtatyp, eń bolmaǵanda birneshe sekýndqa keri qaıtarǵymyz keledi. Biraq, ókinishke oraı, bul múmkin emes. Osylaısha kúnder birtindep ótip, ol birneshe aptaǵa, aıǵa, jylǵa jyljyı beredi. Adamdardyń jasy kelgen saıyn ótkenge qarap, árdaıym ótken kúnderin kúlimsirep eske alady. Ásirese, mektepte oqyp júrgen kezimiz kóptegen jyly estelikterdi eske túsiredi.

«Mektep» - degen sózdi estigende oqýshylardyń oıynda birden «qońyraý» túser. Barlyq mektep oqýshylary sabaq kezinde qońyraýdyń kelýin asyǵa kútedi. Saǵatqa qarap, qajetti úziliske deıin mınýttardy sanap otyrady. Qońyraý soǵyla salysymen kóptegen oqýshylar birden muǵalimderdi tyńdaýǵa ýaqyt tappaı, oryndarynan shyǵyp ketedi, al muǵalim olardy toqtatýǵa ýaqyt ta tappaıdy. Bar-joǵy 10-15 mınýt ishinde biz dostarymyzben sońǵy jańalyqtarmen bólisip, oıyn oınap, kúlip úlgeremiz. Keıde qońyraý keshe keshke bastaǵan úı jumysyn aıaqtaýǵa, oqýlyqtaǵy abzasty qaıtalaýǵa nemese test úshin birneshe mańyzdy formýlalardy jazyp alýǵa jetkilikti ýaqyt. Al, asyǵa kútetin úzilis - úlken úzilis. Úlken úzilis bastalǵanda dostarymyzben ashanaǵa baryp, kishkene bálish alsaq soǵan qýanyp, dostarymyzben áńgime-dúken quramyz.

 Bizdiń árqaısymyz óz mektebimiz týraly oılanǵanda ár túrli nárseni esimizge túsiremiz. Bireýler úshin bul oıyn-saýyq pen mektep keshteri bolsa, al basqalar úshin olımpıadalar, baıqaýlar, súıikti sabaqtar. Biraq eń bastysy - biz mektepte oqyp júrip, naǵyz dostarymyzdy taptyq. «Mekteptegi dostyq - eń myqty dostyq», - dep aıtyp jatady. Múmkin ol kóp ýaqytyn birge ótkizgendikten jáne bir-birimizdi jaqsy tanıtyndyqtan bolar. Árıne, mekteptegi dostarymyz arqyly mektep ómiri týraly árdaıym este qalatyn nárseler bolady.

«Ómiriniń barlyq máni - ózderi biletin nárseni úıretý» bolyp tabylatyn muǵalimder bizdi mektepte qarsy alady. Olar bizdiń zeıinimizdi, jadymyzdy, qıalymyzdy damytady, bizge ómirde óz jolymyzdy tabýǵa kómektesedi. Eń bastysy, olar ózderiniń isterimen jáne sózderimen bizge eń mańyzdy ǵylymdy - adam bolýdy úıretedi. Muǵalim bizdi balalyq shaq, jasóspirim jyldary basqarady, baıqalmaıtyn erlik jasaıdy - bizge óz bilimin beredi, júreginiń bir bóligin oqýshylaryna arnaıdy. Jáne árbirimizdiń mektepte jaqsy kóretin muǵalimderimiz bolady. Alaıda, mektep bitirer sátte buryn unatpaıtyn muǵalimderdiń ózin qımaı jatamyz.

Ýaqyttyń tez ótýimen qalaı mektepti aıaqtap qoıǵanymyzdy baıqamaımyzda. Mektep jyldary - eń alańsyz jáne baqytty jyldar. Bir ókinishtisi kóbimiz muǵalimderge durys alǵys aıtpaǵanymyzdy jáne eń qyzyq sátterimizdi shynaıy baǵalaı almaǵanymyzdy mektep bitirer sátte ǵana túsinip jatamyz.

Ý. M. Djoldybaeva Ál-Farabı atyndaǵy QazUÝ-niń Qazaqstan tarıhy kafedrasynyń dosenti

J. N. Alıasqar Ál-Farabı atyndaǵy QazUÝ-niń Shyǵystaný fakúltetiniń 1-kýrs stýdenti

---