InfoHub Logo

Kóregendikten taǵy bir kórkem kórinisi
Synga túsken eki udaı tusta myna,
Qaramaıdy ol baqytqa, bas qamyna,
Laıyq ol baıqasań qazaq túgil,
Álemdi de ádemi basqarýǵa.  

Ǵafý Qaıyrbekov

Tireýsiz Aspan jaratqan, tóńkerilgen kók kúmbezdeı alyp kókke Aı men Kún ornatqan qudireti sheksiz, meıirim, shapaǵaty mol Alla taǵalanyń qazaq halqyna syılaǵan baǵa jetpes eń úlken baqyty - ǵasyrlar boıy arman bolǵan Táýelsizdik! Jannan da tátti, qannan da qymbat Táýelsizdiktiń oshaqtyń úsh tiregindeı myqty úsh dińgegi bar. Olar: eńbekker qazaq halqy, Ult baǵyna týǵan Uly tulǵa Nursultan Ábishuly Nazarbaev, ultaralyq kelisim men birlik. Eli eńbeksúıgish, kósh bastaǵan kósemi kóregen bolsa aspaıtyn asý, alynbaıtyn qamal joq. Qazaqstannyń TMD-da kóshbasshy bolýynyń bir syry osy. Bar bolǵany jıyrma toǵyz jylda ǵasyr júgin arqalaǵan Qazaqstannyń álem tańqalǵan tabystary elimizdiń búkil halyq saılaǵan tuńǵysh jáne qazirgi Prezıdenti N.Á. Nazarbaevtyń esimimen tyǵyz baılanysty. Madaq sózge sarań, asa saq, aýyzy dýaly saqa saıasatker Súleıman Demırel: «Oǵan teńdesetin eshkim joq» dep beker tańdaı qaǵyp, tamsanbasa kerek.

Mıllıondaǵan halyqtyń kóshbasysy, kósemi bolyp, óz eliniń juldyzyna aınalǵan álemdik deńgeıdegi saıasatkerlerdiń osaly joq. Olardyń bári de saıasat álemindegi sý tógilmes jorǵa. Sol kemel oıly kemeńger saıasatkerlerden Nursultannyń ereksheligi, artyqshylyǵy desek te asyra aıtqandyq emes, asa qıyn bıikter men kúrdeli mindetteri alǵa qoıa alatyndyǵy, eń mańyzdysy - qıyn istiń qıýyn taýyp, asyl armanǵa qol jetkize alatyndyǵyǵ Sonyń myńnan bir mysqal mysaly - «Qazaqstan - 2030» baǵdarlamasy.

N.Á. Nazarbaevtyń Jaratqan Iem jomarttyqpen syılaǵan taǵy bir qasıeti - ýaqyttyń tamyryn dál basyp, qıyn sıtýasıalar kezinde utymdy da utqyr sheshimderdi der kezinde batyl qabyldaı alatyn qabileti. Osyǵan oraı Ult kóshbasysynyń kórigendigine kóptegen mysaldar keltirýge bolady. Áıtsede, kóziqaraqty qaýym jaqsy biletin ótkendegi jaılardy qaıtalap, oqyrmannyń ýaqytyn almaı, Elbasynyń bıylǵy jylqy jyly tamyz aıynyń altynshy juldyzynda Aqordada ótkizgen Úkimettiń keńeıtilgen otyrysynda aıtqan ataly, bataly sózderi men onda qabyldanǵan sheshimderdi eske alsaq ta jetkilikti. Myna dóńbekshigen dúnıe, alashapqyn, almaǵaıyp ýaqytta álemdik ekonomıka tyǵyryqqa tirelip, Ýkraınadaǵy oqıǵalarǵa baılanysty TMD-daǵy jaǵdaı kúrdeli bolyp turǵan kezde, der kezinde ótken Úkimettiń keńeıtilgen otyrysynda eldiń ekonomıka jáne áleýmettik salalarynyń ózekti máseleler qaralyp, oń sheshimder qabyldandy. Qazaqstan Respýblıkasy memlekettik basqarý júıesiniń reformalaýy, jańadan bes mınıstrlik qurylyp, ońtaılandyrylǵan yqsham úkimet jasaqtalýy - der kezinde qabyldanǵan dana sheshim boldy. Yqsham úkimet sany kóp, sapasy joq jınalys, jıynnan arylyp, kedergilerdi jeńý jolynda tıimdi jumys isteı alady ári qaǵazbastylyq pen demokratıamen syıyspaıtyn búrokratıa da joıylady, jeke jaýapkershilik kúsheıedi. Sátti kún sársenbide ótken jıynda Memleket basshysy, Ult kóshbasshysy N.Á. Nazarbaev qabyldaǵan tarıhı sheshimder qytaı fılosofy Konfýsııdiń: «Ózgeris jeli soqqanda aqymaq adam jelden qalqan bolar qorǵanysh turǵyzady, al aqyldy adam jel dıirmenin salýǵa kirisedi» danalyǵymen sabaqtas.

Kún saıyn qyryq qubylyp turǵan alaquıyn ýaqyt, almaǵaıyp zamanda aıtqan sózi men istegen isi, der kezinde qabyldaǵan danalyq sheshimder adastyrmas aq juldyzǵa aınalǵan Nursultandaı Ult Kóshbasshysynyń bolýy halyq úshin qut. Aqordada, sársenbide qabyldanǵan sátti sheshimder - Nursultan Ábishuly Nazarbaevtyń aldaǵyny kórip, alysty boljaıtyn kóregendiginiń taǵy bir kórinisi.

Shetel ǵulamalarynyń: «Nazarbaevtaı Prezıdenti bar el baqytty» degen sózin ómir ózi kún saıyn dáleldep otyr. Baqyt baǵalaǵannyń basynda turady. Baqytymyzdy baǵalaı, ult baǵyna týǵan uly Tulǵa Nursultandy aıalaı bileıik.

Tarıh uzaq tolǵatyp, sırek týatyn qaıtalanbas has tulǵa Nursultan Ábishulyna aıtar tilek, júrek jardy sóz mynaý:

Ózińmenen birge meniń júregim,

Sen júdeseń halqyńdy oılap júdediń.

El tizgine bolsyn uzaq qolyńda,

Júz jasta da lúp-lúp soqsyn júregiń.

Ý.M.Djoldybaeva Ál-Farabı atyndaǵy QazUÝ-niń Qazaqstan tarıhy kafedrasynyń dosenti

D.S.Jumamurat Ál-Farabı atyndaǵy QazUÝ-niń shyǵystaný fakúltetiniń 1 kýrs stýdenti

---