InfoHub Logo

Men jastarǵa: «Aldaryńda taýdaı talap tur. Ómir zańǵarlary únemi bıikke shyǵarady. Oǵan jetý úshin talmaı izdenińder!» - der edim. Jastarǵa toǵysharlyq, boıkúıezdik dertinen aýlaq, sergek, sezimtal bolǵan jarasady.

Ǵabıt Músirepov

«Men memleketimniń gúldenýi úshin ne isteı alamyn?» taqyrybyna esse  jaza bastaǵanymda «basqa qatysýshylardyń oıymen dálme-dál bolyp qala ma» degen boıymda azdaǵan qobaljý paıda boldy. Kóbisi óz jazbalarynda memleketiniń gúldenýine óz paıdasyn tıgizetin adamdy bilimdi, jan-jaqty, zamanaýı, oıy jınaqy, sózi salmaqty, ortaǵa beıimdi etip sýretteıdi. Óıtkeni, barlyq adam «Zamanyna qaraı bórkińdi kı» degen sóz tirkesi sekildi óz zamanyna saı bolýy tıis. Birinshi orynǵa  bilimdi qoıatynymyz aqyly, bilimi jetik urpaq – jarqyn keleshegimizdiń kepili. Oǵan elbasymyz Nursultan Ábishuly Nazarbaevtyń sózi dálel: «Bolashaq- bilimdi jastar qolynda. Erkin elde ósken urpaqtyń rýhy árdaıym bıik bolýy tıis. Jastary jalyn júrekti, órshil namysty, bıik rýhty bolsa – ol eldiń eńsesi de bıik bolady. Órshil, namysshyl jas otanshyl, patrıot keledi, halqyna, óz ultyna adal qyzmet etýge umtylady».  Bilimdi bolý-qaı zamanda da bolsyn  aýadaı qajet. «Bilimsiz adam haıýanmen teń» dep tegin aıtylmaǵan. Biliminiń arqasynda adam úlken jetistikterge jetedi jáne de eline óz paıdasyn tıgize alady. Aldymyzǵa qoıǵan maqsattarymyzdyń birdeı bolyp kórinýi – Otanymyz ortaq. Sondyqtan aqyly men tili bir, oıy men armany bir, júregi men tilegi bir, árdaıym alda bolýǵa umtylatyn urpaq bola alsaq, nur ústine nur bolar!

«Men memleketimniń gúldenýi úshin ne isteı alamyn?» dep óz ishimnen júz oılanyp, myń tolǵandym. Sebebi, bul saýal jastar arasynda óte kúrdeli jáne aýqymdy. Sondyqtan bar oıymdy jınaqtap, sarapqa salyp, «baq shaba ma, bap shaba ma» dep, bastaǵan isimdi orta joldan toqtatqym kelmeı shyǵarmamdy jazýǵa kiristim.

Kóptiń talqylaýyna túsken bul saýaldyń jaýabyn tapqandaı bolyp, óz aldyma qoıǵan maqsattarymmen, armandaǵan armandarym jaıly oılaı bastaǵan edim, oıyma oı qosylyp qalamyma qanat bitti.

Árbirimiz bul dúnıege shyryldap kelgen mezetten bastap, myna ómirdiń aýasymen tynystaı bastaımyz. Ata-babalarymyzdyń keıbir qasıetin ananyń aq sútimen sińire ómirge aıaq basamyz. Eń bastysy árqaısymyzdyń tutastaı kelbetimiz, ishki syrtqy mazmunymyz, ártúrli oılarymyz men armandarymyz bolady, biraq túbi bári bir ózindik sıpatqa ıe. Osyǵan baılanysty árbirimizdiń atqarar mindetimiz bar.

«Ásempaz bolma árnege,

Ónerpaz bolsań, arqalan.

Sen de-bir kirpish dúnıege,

Ketigin tap ta bar qalan», — dep qara óleńniń patshasy uly aqyn Abaı atamyz aıtyp ketkendeı, kez kelgen adam «Ómir» atty dúnıeniń bosaǵasyn attaǵannan keıin óz ornyn, kirpish sekildi óz ketigin tabýǵa umtylady, ıaǵnı bıikteıdi, ónedi, ósedi. Aldyna qoıǵan qaǵıdasyn berik ustanyp, tańdaǵan mamandyqtarynyń qyzyǵyn kórýge umtylady. Bul rette «Elim úshin ne isteı alamyn» degen zańdy suraqqa: «Siz ózińiz qalaǵan kásibińizdiń mamany bolý arqyly elińizge óz úlesińizdi qosasyz. Al sol qalaýyńyzdaǵy mamandyq arqyly siz el damýyna paıda ákelesiz»-dep jaýap berýge bolatyn sekildi. Biraq bul maqsatqa jetý jolynda tek sózge qaraǵanda naqty, aıqyn qadamdarǵa barý mańyzdy. Elin súıetin ár adam memleketiniń gúldenýi úshin úles qosýy kerek. Alaıda óz úlesin qosýda mindetti túrde uly ister atqarý shart emes. Árkim óz múmkindigine qaraı qyzmet atqarsa sol da jetkilikti. Keıbiri mádenıet jaǵynan, keıbiri ekonomıka, saıasat jaǵynan, al keıbiri tehnıka, ekologıa, sport jaǵynan memleketimizge óz úlesin qosyp jatyr.

Búgingi Qazaqstan Astanasyn bas qala etip, damyǵan  mádenıet pen ekonomıkanyń, bilim men ǵylymnyń ortalyǵyna aınaldyryp, eliniń turaqtylyǵy men birligin saqtap, dúnıejúzine tanytýǵa kúsh salýda. Buǵan memleketimizdiń Birikken ulttar uıymyna, Eýropadaǵy qaýipsizdik pen yntymaqtastyq uıymy sıaqty halyqaralyq qaýymdastyqtarǵa múshe bolyp dúnıe júzi elderimen tyǵyz baılanys ornatýy jáne osy jolda atqaryp jatqan qyrýar isteri dálel bola alady. Kemeńger Elbasymyzdyń «Qazaqstan -2050» baǵdarlamasy óz baǵytymen júzege assa, keleshekte Qazaqstan memleketi dúnıe júzindegi iri memleketter qataryna qosylady degen senimdemin.

Ózim jaıly aıtsam men stýdentpin. Pavlodar qalasynyń Inovasıalyq Eýrazıa Ýnıversıtetiniń «Jýrnalısıka» mamandyǵy boıynsha bilim alýdamyn. Qazirgi tańda  3 kýrs stýdentimin. Osy úsh jyl ishinde jýrnalısıka salasynyń muhıttaı sheksiz tereńine júzip ketkendeımin. Bolashaqta osy mamandyqtyń arqasynda úlken jetistikterge jetip, elim úshin bárin isteýge daıynmyn. Meniń memleketti gúldendirýge qosar úlesim qandaı bolmaq? Meniń qosar úlesim, oqýymdy jaqsy oqý, bolashaq mamandyǵymnyń qyr-syryna teorıalyq turǵydan qanyǵyp, jan-jaqty tanyp, qoǵamdyq jumystarǵa belsene aralasa júrip shyńdalý. Bári shyńdalý degennen shyǵady. Kez kelgen mamandyq ózindik, basqaǵa uqsamaıtyn tereń izdenisti talap etedi. İzdengen adam damıdy, ózge adamdardan kósh ilgeri bolady. Ózimizdiń damýymyz arqyly ózgeniń de bilimin jetildirýge jol salamyz. Osy tusta meniń mamandyǵymnyń róli ańǵarylady. Nege deseńiz, jýrnalıs basqaǵa uqsamaıtyn, ózgelerden aıyrmashylyǵy bar mamandyq. Sondyqtan bul mamandyqtyń tizginin ustaý ekiniń biriniń qolynan kele bermeıtin is dep bilemiz.

Qazirgi tańda elimizde kóptegen mańyzdy jaǵdaılar oryn alýda. Men bolsam osy jastarǵa toqtalǵym keledi. Kóbisi batysqa elikteıdi. Eliktegeni jaraıdy kóz jumdyq, biraq jastar arasynda komýnıkasıa joq. Kóbimiz uıaly telefonǵa, naqtyraq aıtsam ǵalamtorǵa táýeldimiz. Aramyzda syı-qurmet azaıýda. Búgingi jastarǵa rýhanı baılyq, taza oı, tereń bilim, adamgershilik, adaldyq, qaırat, qala berse, densaýlyǵymyz da jetispeıtin sekildi. Nege densaýlyǵymyzdy, janymyzdy taza ustap, talǵamymyzdyń bıiktigin bildirip, salaýatty ómir súrmeske? Bul rette meniń tarapymnan qandaı kómek nemese sheshim bolady? Biz jastar ujymy bolyp birge at salysyp, elimizdegi túrli qaıyrymdylyq sharalarǵa, ártúrli baıqaýlarǵa qatysyp, jaraly janǵa demeý bolsaq, dinı ekstremızm men terorızmge qarsy turyp, sapaly bilim alyp, bolashaqta qazaq eliniń ar-namysyn, qorǵaıtyndaı naǵyz patrıot bolamyz. Egerde qolymnan kelse, joǵaryda otyrǵan zań ókilderin, májilis jáne senat depýtattaryn qazaq tilinde saıratyp, balalaryn tastaǵan bezbúırek analarǵa qarsy zań qoldanyp, para alǵan azamattardy jazalap, zeınetkerlerdiń zeınetaqysyn kóterip, qarapaıym qara qazaqtyń jalaqylaryn kóbeıtsem, elimizdiń ekonomıkasyn óz ornyna qoıyp, munaı, gaz, kúndelikti ómirde qoldanylyp júrgen turmystyq zattardyń baǵalaryn qarapaıym halyqqa qoljetimdi etip, lankestikti, qazaq qyzyna tán emes tumashalanyp kıý degendi joısam jáne jetimderdi jebep qol ushyn sozsam men ózimniń elimdi gúldendirer edim. Elbasymyz bul jolda aıanbaı eńbek etýde. Biz de osy joǵaryda aıtylǵan máselelerdiń oń sheshimin tabýǵa járdemdessek, menen asqan baqytty jan bolmas!

Iá, men áli stýdentpin. Sonda da aldyma qoıǵan maqsatymnyń mazmuny aıqyn, armanymnyń tuǵyry bıik. Óz mamandyǵymmen qarapaıym halyqtyń muńyn muńdap, joǵyn joqtaǵan jáne tek aqıqatty ǵana jazatyn jýrnalıs bolamyn dep óz-ózime sert ettim.

Bizdiń jer - talaı batyrlardyń aq bileginiń kúshimen, aq naızanyń ushymen arpalysqan, qıynshylyqtyń taýqymetin kórse de, shydamdylyq pen tabandylyq tanytqan azamattarymyzdyń arqasynda jastarǵa, ıaǵnı bizderge mura etip qaldyrylǵan jer. Ol jerdi saqtaý endi - bizdiń mindetimiz.

Qoryta aıtqanda, patrıot, tárbıeli, bilimdi urpaqtyń qalyptasýyna kepil bola alatyn ýnıversıtetimizde jarqyn bolashaq úshin kóp jumystar qolǵa alynýda. Elimizdiń búgingi jastary jańa jaǵdaıda zamanaýı memlekettiń jasap jatqan syndarly saıasatynyń arqasynda alysqa qol sermep, álemdik deńgeıdegi ustanymdy ıgerip, keleshektiń kiltin óz qoldaryna alýda. Sondyqtan keleshekte Qazaqstan álemdegi eń damyǵan, eń qýatty elderdiń qataryna enip gúldenýine búgingi stýdentter qaltqysyz úlesterin qosady, ıakı qosý úshin aıanyp qalmaıdy degen senimdemin. Elimniń kórkeıýine qasyq qanym qalǵansha, tynbaı eńbek etetinime ar aldynda ant etemin!

Aıdana Boranbaeva

                                                 Inovasıalyq Eýrazıa Ýnıversıtetiniń 4 kýrs stýdenti

Pavlodar qalasy

---