InfoHub Logo

Taýǵa aparatyn jalǵyzaıaq jol Nartaılardyń aýylynyń shetinde. Onymen kóbinde oıǵa túsken malshylar, keıde myltyq asynǵan ańshylar ótetin.

Keshe Nartaı ájesi ekeýi bir jaqqa baryp kele jatyp sol jolmen júrdi. Kún uıasyna eńkeıgen kez bolatyn. Bir kezde bir top atty adam arttarynan qýyp jetti. Nartaılar shetke yǵysty. Úlken adam kele jatqanyn kórgen bolý kerek, atty kisiler keshikpeı joldyń bir jaǵyna shyǵyp, Nartaılardy aınalyp ótti.

— Mynalar taýdan qaıtqan ańshylar ǵoı. Qorjyndary toq —oljalary kóp boldy, — dedi ájesi sálden soń álgilerge qarap ózine ózi sóılegendeı.

Nartaı sonda baryp baıqady, arasynda bir-ekeýi myltyq asynyp alypty.

— Iá, ańshylar eken. Myltyq asynyp alypty, — dedi sosyn ájesin qoshtap.

— Onda múshe sura, — dedi ájesi Nartaıǵa qarap.

— Qaıtip suraımyn, alystap ketti ǵoı…

— Eshteńe etpeıdi. «Múshe, múshe» dep aıǵaı sal. Esti ańshylar bolsa, burylady, — dedi ájesi baıyppen.

— Uıat emes pe? — dedi Nartaı áli de tartynshaqtap.

— Nesi uıat… buryn-sońǵynyń joly, — dedi ájesi qaıtalap.

Sonda baryp qaıratqa mingen Nartaı «Múshe, múshe» dep aıǵaı saldy.

Kóp ótken joq. Atty kisilerdiń aldynda ketip bara jatqan bireýi toqtap, keri buryldy. Uzamaı Nartaılar da jetti qastaryna.

— Amansyz ba? — dep amandasqan túlki tymaqty kisi qolyn qanjyǵasyna qaraı sozdy. Baýyn aǵytqan qorjynynyń aýzynan bir kesek et aldy da:

— Buıyrǵany osy boldy, aıyp etpeńiz, — dedi eńkeıe bere usynyp.

— Kóp jasa, qaraǵym, — dedi Nartaıdyń ájesi sozylǵan qoldan etti alyp jatyp. — Ash júrgen joqpyz, kóneniń joly ǵoı… aıyp etpeńiz!

— O ne degenińiz, úlken kisi! Qaıta jaqsy boldy, myna júrgender qazaqtyń bir dástúrin bilip qalatyn boldy, sizdiń arqańyzda! — dedi aty tyqyrshyp turǵan túlki tymaqty kisi qasyndaǵylarǵa qarap. — Jón-josyqty biletin sizderdeı úlken kisiler aman bolsyn!

— Raqmet, balam! Joldaryń bolsyn! — dedi ájesi rızashylyqpen.

Burylǵan ańshylar «Saý bolyńyz!» dep qaıta joldaryna tústi.

— Eliktiń sany eken, — dedi ájesi sálden soń qolyndaǵy etke bir qarap alyp. — Qýyrdaq jeıtin boldyń.

Bul kezde bar nársege tańyrqaıqaraıtyn Nartaıdyń kókeıinde bir suraq qyltıyp edi.

— Áje, múshe degen ne? — dedi keshikpeı.

— Múshe degen be.. .— dedi ájesi jaýap berer aldyndaǵy daǵdysymen qaıta bir surap alyp. — Múshe degen — ańnan oljaly qaıtqan ańshylardan surap alatyn et. Burynǵydan qalǵan jol. Atqan ańynyń etinen jolda kezdesip, suraǵanǵa múshe bermese, úlken aıyp bop sanalady. Bildiń ǵoı?

— Bildim, — dedi Nartaı ile basyn ızep.

---