InfoHub Logo

Nartaı búgin kúndegiden erte turdy. Óıtkeni, qaladan qysqy demalysqa kelgen stýdent kókesi Narman sabaǵyna qaıtpaq.

Birge otyryp shaı ishti.

— Aǵańa, kelinge sálem aıt,— dedi atasy bir kezde shynysyn qolyna alyp.— Aıbat pen Gúlimdi men úshin súıip qoı. Jazǵa qaraı kelsin…

— Maqul,— dedi Narman kókesi basyn ızep.

Nartaı sezdi, atasynyń aıtyp otyrǵany — qaladaǵy úlken kókesi, Aıbat pen Gúlimniń ákesi. Byltyr jazda úı-ishterimen kelip aýnap-qýnap qaıtqan.

Nartaıdyń Narman kókesi sol úıde jatyp oqıdy.

— Aǵań men kelinge aıt, kelip, sybaǵalaryn jep ketsin,— dedi ájesi osy arada sóz qosyp.— Aıtpaqshy, Sadyq qudaǵa da arnaıy baryp sálem aıt. Ol kisi de kelip, sybaǵasyn jep ketsin. Umytpa, úlken kisi… uıat bolady.

— Maqul, — dedi Narman kókesi bul joly da basyn ızep. — Umytpaımyn. Ózim de baramyn ǵoı, sonda aıtam.

Kókesiniń odan ary ne aıtqanyn estimeı qaldy, óıtkeni bul kezde Nartaıdyń nazary «sybaǵa» degen jańa sózge aýyp edi.

— Áje, sybaǵa degen ne? Ony biz jesek bolmaı ma?— dedi keıinge qaldyrýǵa taǵaty jetpeı.

Otyrǵandar dý kúldi. Ne bolǵanyn bilmeı Nartaı jan-jaǵyna japaqtaı qarady.

— Sen sybaǵańdy jep aldyń ǵoı, — dedi ájesi kúlip. — Soǵym soıylǵaly beri jep jatsyń, jetpeı me sol?

— Sybaǵa degen soǵym ba? — dedi yńǵaısyzdanyp qalǵan Nartaı endi atasyna burylyp.

— Iá, — dedi atasy basqalarǵa «qoıyńdar» degendeı ıshara jasap.— Bilmese, qaıtedi endi… — dedi sosyn Nartaıdy qorǵaı sóılep. — Durys aıtasyń, sybaǵa degen — soǵym. Biraq, bir aıyrmashylyǵy, uıatty úlken kisilerge, jaqyn týystarǵa, quda-jegjattarǵa alyp qoıatyn soǵymnyń kádeli músheleri. Ony jańaǵy kisiler qys shyqqansha kelip, jeýi kerek. Keıde, tipti, túrli jaǵdaılarǵa baılanysty qatynasqan adamdardan berip jiberýge de bolady. Endi túsindiń ǵoı…

— Túsindim, — dedi Nartaı basyn ızep.

---