InfoHub Logo

— Nartaı! — dedi ájesi syrttan. — Nartaı!

Nartaı úıde kitap oqyp otyrǵan bolatyn. Ájesiniń daýysynan bir mańyzdy sharýaǵa kerek bop qalǵanyn shamalap, atyp shyqty. Sóıtse, ájesi esik aldyndaǵy qurt óreniń qasynda tur eken. Qolynda dorba, qasynda oryndyq.

— Kel beri, — dedi Nartaıdy kórgen soń. — Ana oryndyqqa shyq. Kepken qurttan myna dorbany toltyryp, alyp tús!

Nartaı ájesiniń aıtqanyn istedi. Sharýany bitirgen soń, ánsheıinde mańyna jolatpaıtyn qurtyn dorbaǵa toltyryp alǵanyna túsinbeı, ádeti boıynsha suraý tastady.

— Áje, bul qurttardy kimge beresiz?

Dorbaǵa túsken qurttardy qolyna alyp, kepken-keppegenin bilip, ózimen-ózi bolyp ketken ájesi birden jaýap bergen joq. Jumysyn támamdaǵan soń baryp:

— A? — dedi basyn kóterip.

Nartaı jańaǵy saýalyn taǵy bir ret qaıtalady.

— Oı, álgi… — dedi ájesi áldenege rıza bola jymıyp. — Baıaǵy Marta bar emes pe… myna oń jaǵymyzda otyrǵan kórshi… Germanıaǵa kóship ketken… Sonyń… Oı, aljyǵan basym, sen ony bilmeıdi ekensiń ǵoı, ras… — dedi osy arada bir toqtap, qolyn siltep qoıyp. Sonsyn ózine-ózi sóılegendeı, bastalǵan áńgimesin ary jalǵap ákete berdi. — Olar kóshkeli de, mine, on neshe jyl boldy. Onda sen joqsyń… sondaı bir jaqsy kórshimiz bolǵan. Ulty — nemis. Nemis bol ǵanmen, qazaqqa bergisiz jandar bolatyn. Jaqsy adamdar edi, shirkin! Sonyń osydan keterde es kirip qalǵan uly bar edi, sol kelipti. Qazaqshasyn umytpapty álgi bala. Kádimgideı qol berip amandasady. Áke-sheshesi úıretken ǵoı, jaryqtyqtar. «Áke-sheshem sizderdi saǵynyp jylaıdy» deıdi. Endi qaıtsin, beısharalar! Ońaı deısiń be?! Qansha degenmen úırengen el ǵoı! Saǵynady. «Jol alys, ózderi kele almaıdy. Sen baryp, kórip kel dep meni jiberdi» deıdi. Azamat! Aqyldy bolyp ósipti ózi. Sol bala bir-eki kúnde ketedi eken. Birge júrgen kisiler ǵoı, balasynyń qolyna qaraıtyn shyǵar, áke-sheshesine sálemdeme berip jibereıin dep…

— Sálemdeme degen qurt pa, áje?

— Joǵa. Qurty nesi?! Men qurt berem. Basqa qazy-qarta, jemis-jıdek berýge kún ystyq, buzylyp ketedi. Qurtty durys kórdim. Onyń ústine, Marta qurtty qatty jaqsy kóretin. Kerek bolsa, ózi aıran uıytyp, qurt jasaıtyn. Ol jaqta sıyr joq shyǵar, bolsa, jasaıdy ǵoı talaı. Qazaqtyń as-tamaǵyn jasaýdy eshkimnen suramaıdy ol. Mynaý, endi, júrgen jeriniń, eldiń dámi degenim ǵoı… maýqyn bir basyp qalsyn asyl qurbym!

Ájesi áńgimesin aıta júrip, úıge kirip ketti. Nartaı esik aldynda qaldy. «Sálemdeme» dep qoıdy sálden soń umytyp qalmaıyn degendeı taǵy bir qaıtalap. «Sálemdeme».

---