InfoHub Logo

Mektepke úshtildilik júıeni engizý baǵytynda «eriktilik qaǵıdatyn» belgili bir merzimge engizý joly talqylanyp jatyr. Bul týraly Astanada respýblıkadaǵy barlyq bilim basqarmalarynyń ókilderiniń basyn qosqan Erlan Saǵadıev málim etti.

«Aǵylshyn tili týraly aıtarym... Eń bastysy biz ata-analarmen, mektep dırektorlarymen, muǵalimdermen, oqýshylarmen kóp sóılestik. Demek, bizdiń usynysymyz mynadaı: 2019 jyly, tipti 2018 jyldan bastap «eriktilik qaǵıdatyn» belgili bir merzimge engizsek... Demek, mektep ózi daıyn bolsa, ata-analar ózderi kelisse - marhabat, mektepte aǵylshyn tilinde sabaq bere bersin», - deıdi mınıstr.

Erlan Saǵadıev óz sózinde bul baǵytta ártúrli usynystar talqylanyp jatqanyn atap ótti.

«Ekinshiden, 2019 jyldan bastap aǵylshyn tilinde mindetti túrde oqytylatyn pánder bola ma? Osy suraqqa baılanysty bizge mynadaı atap óterlik usynys tústi: «bir ǵana pándi 10-11 synyptarda aǵylshyn tilinde mindetti túrde ótetindeı eteıik» degen. Sonda barlyq mektepter joq degende bir pándi, ary ketkende tórt pándi aǵylshyn tilinde oqyta bere alady. Shartty túrde aıtar bolsaq, fızıka, hımıa, İT jáne bıologıany aǵylshyn tilinde oqyǵysy kelse, meıli oqyta bersin. Eger qalamasa ózderi sheshedi. Biraq, bir pándi mindetti túrde qaldyrý kerek», - deıdi ol.

Mınıstr sonymen birge, 2,5 aı boıy talqylap kele jatqan másele - shaǵyn jınaqty mektepterge eriktilik quqyǵyn berý ekenin jetkizdi.

«Olarǵa aǵylshyn tilinde pándi oqytýdyń qajettigi bar ma? 2,5 aıdyń ishinde biz ár mekteptiń esigin qaǵyp, osyǵan baılanysty oıyn bilýimiz kerek. Bizdiń zertteýimiz boıynsha ata-analardyń 85 paıyzy osyny qalaıdy (aǵylshyn tilinde oqytýdy - avt.) Biz úshtildilik baǵdarlamamyz úshin alańdamaımyz. Eriktilik qaǵıdaty qanshaǵa sozylatyny - ol tórtinshi suraq. Oǵan eki jarym aıdyń ishinde jaýap berý kerek. Sholpan Tańatqyzy (QR BǴM ókili - avt.) talqylaý boıynsha mınıstrliktiń ustanymyn jetkizgen bolatyn. Men sizderge osy ustanymdy rastaǵym keledi. Biz buny jalpyhalyqtyń talqylaýǵa salamyz», - dep túıdi Erlan Saǵadıev.

QazAqparat

---