InfoHub Logo

QR Bilim jáne ǵylym mınıstri Erlan Saǵadıev mekteptegi muǵalimniń aılyǵy óskenimen, dırektorlar men oqý isiniń meńgerýshileriniń aılyǵynyń óspeı qalǵanyna qatysty bir sheshim usyndy.

«Muǵalimderdiń aılyǵy týraly... Bul máselege kelgende eshqandaı suraq qalmaǵan shyǵar. Men dırektorlar jaıly aıtyp bergim keledi. Iá, dırektorlar men oqý isiniń meńgerýshileri bul máselege alańdaýshylyq bildirip otyr. Ádistemeshiler de osyndaı másele kótereri daýsyz. Aldyn ala esep boıynsha, barlyǵy qamtylǵan edi. Biraq, kategorıalar óte kóp ekenin bilesizder. Sondyqtan, Qarjy mınıstrligimen talqylaý kezinde ýaqyt tyǵyz bolǵandyqtan, úkimettik deńgeıde «aldymen muǵalimderdiń aılyǵyn ósirsek» degen toqtamǵa keldik. Sebebi muǵalimderdiń aılyq máselesi qıyndap ketkeni ras edi», - deıdi Astanada respýblıkadaǵy barlyq bilim basqarmalarynyń ókilderiniń basyn qosqan Erlan Saǵadıev.

Mınıstr óz sózinde endigi kezekte mektep dırektorlary men orynbasarlarynyń qamy úshin tyrysatynyna ýáde berdi.

«Qolymyzdan shara kelmeı jatsa, mınıstrlik ákimderge shyǵady. Ákimderge «mektep dırektorlary men orynbasarlaryna qol ushyn sozsańyzdar» dep ótinish bildiremiz. Bul kóp shyǵyndy qajet etpeýi kerek. Jalpy, memlekette 7 myńǵa jýyq mektep dırektory men oqý isiniń meńgerýshisi bar. Bir oblysta - 500-600 adamnan. Joq degende ákimderden olardyń aılyǵyn 30 paıyzǵa arttyrýdy suraǵaly otyrmyz. Ózim bul jumysty qolǵa alamyn», - dedi ol.

Ol sonymen birge, ádistemeshilerdiń de osy máselesin sheshiletinin aıtty.

«Eń bastysy jetistik - aılyq ósip keledi. Aıta keterligi, aılyqtyń ósimi anyq baıqalady», - dedi mınıstr.

QazAqparat

---