InfoHub Logo

WRO-2021 baıqaýynyń basty taqyryby – PowerBots, ıaǵnı qazirgi  zamannyń eń jahandyq basymdyqtaryna arnalǵan. Jasyl ekonomıkanyń bolashaǵyn qalaı qurýǵa bolady, jańartylatyn jańa energıa kózderin qaıdan alýǵa bolady, ekologıalyq jaýapkershilikti qalaı qalyptastyrady – jas robototehnıkter shyǵarmashylyq turǵydan jáne jas erekshelikterine baılanysty Regular, Open, Future  Engineers sanattarynda naqty mindetterdi qarastyrdy. WRO-nyń ulttyq kezeńine barlyǵy qyryqqa jýyq komanda jınaldy, olardyń árqaısysy óńirlik irikteý týrlarynda tabysty óner kórsetti. 

Onlaın format qatysýshylardyń yntasyn, kreatıvtiligin, úzdik  daıyndyǵy pen jas robototehnıkterdiń jeńiske degen umtylysyn kórsetti.
Negizgi kishi sanatta Almaty qalasyndaǵy «Aq-Nıet» jeke bastaýysh mektebiniń MagicKris komandasy jeńimpaz atandy. Komanda quramy – Krıstına Kıselóva, Mark Bırúkov, Petr Moroz jáne bapkeri Oleg Kıselóv. Olar energıa tutynýdy azaıtatyn aqyldy úıdiń eń ońtaıly  sheshimin usyndy. Negizgi orta sanatta chempıon tıtýlyn almatylyq «Lessons.kz» oqý ortalyǵynyń A and B komandasy jeńip aldy. Arána Kadyrova men  Bernar Berdalıev (jattyqtyrýshy Áıgerim Erkabaeva) jasaǵan  robottar olımpıadalyq jyldamdyqta gıbrıdti jáne elektromobılderdi zarádtaýǵa arnalǵan akýmýlátorlar taratty. Negizgi joǵary sanatta komandalarǵa jańartylatyn resýrstardan turǵyn úılerdi elektr energıasymen jabdyqtaý, akýmýlátorlarda artyq energıa saqtaý mindetteri qoıyldy. Bul sanatta dástúr boıynsha Nazarbaev Zıatkerlik mektepteri ókilderine teń keler eshkim bolǵan joq. Shyńǵysbek Balǵabaı men Áltaır Jambyl  (jattyqtyrýshysy Iasynjan Shakan) bastaǵan Almatydaǵy hımıa-bıologıa baǵytyndaǵy NIS-tiń Vector komandasy eń úzdik ýaqyt pen eń jaqsy nátıje kórsetti. Osy sanattaǵy barlyq qurmet tuǵyryn Zıatkerlik mektep oqýshylary ıelendi. 

WeDo negizgi kategorıasynda balalar shyndyqqa barynsha jaqyn kúrdeli máselelerdi sheshti. Komandalar orman órtterimen kúresetin jáne adamdardy qaýipsiz jerlerge evakýasıalaıtyn robottardy jasaqtady, keıin órtengen aǵashtardyń ornyna jańasyn otyrǵyzdy. Bul tapsyrmany Oral qalasyndaǵy «Jaiq school» robototehnıka jáne baǵdarlamalaý mektebiniń (jattyqtyrýshy Esenǵalı Qaısar) Jaiq 3  komandasynan shyqqan Danıel Talǵatov pen Erasyl Haıdar óte jaqsy oryndady. Kishi shyǵarmashylyq sanatynda Halyqaralyq robototehnıka akademıasynyń LegoMozg komandasynan Daýjan Beketov pen Kırıl Ostrovskıı (jattyqtyrýshysy Tom Noah) kún paneli men jel týrbınasyn qamtıtyn aqyldy elektr stansıasyn jasady. Jańartylatyn energıa kózderiniń tıimdiligin arttyrýǵa baǵyttalǵan joba óz avtorlaryna jeńis ákeldi.

Elordalyq fızıka-matematıka baǵytyndaǵy Zıatkerlik mekteptiń NG- PHOTOBIO komandasy atynan qatysqan Amına Rahymbergenova, Aldıar Pazılov jáne Dáýlet Muhanov (jattyqtyrýshysy Baqytgúl Qajykenova) amorfty baldyrlar ósimdiginen bıootyn alý úshin jasandy ıntellekt qaǵıdattaryn paıdalanatyn robot qurdy. Olar joǵary shyǵarmashylyq sanattaǵy jeńimpazdar dep tanyldy.

Óz sanattarynda úzdik bolǵan barlyq komandalar 2021 jyldyń qarasha aıynda onlaın formatta ótetin WRO-2021 álemdik kezeńine qatysý quqyǵyn ıelendi. Qazylar alqasy quramyna engen álemdik robototehnıkanyń tanymal tulǵalary baıqaýǵa qashyqtan qatysady  dep josparlanýda. Óńirlik jarystar men WRO Ulttyq chempıonatyn jyl saıyn Qazaqstandaǵy World Robot Olympiad ulttyq úılestirýshisi retinde  «Nazarbaev Zıatkerlik mektepteri» derbes bilim berý uıymy ótkizedi.

- Olımpıadalar ózekti ınjenerlik-tehnıkalyq mindetterdi  praktıkalyq sheshýdiń shyǵarmashylyq qabileti men daǵdylaryn damytýǵa, ǵylymı-tehnıkalyq qyzmetke qyzyǵýshylyqty keńeıtýge, aqparattyq tehnologıalar salasyndaǵy kásipterdiń bedelin arttyrýǵa  baǵyttalǵan, – dep atap ótti «Nazarbaev Zıatkerlik mektepteri» DBBU  Aqparattyq tehnologıalar jáne qyzmet ortalyǵy dırektorynyń  orynbasary Azamat Bıdanov.
⠀
World Robot Olympiad (WRO) – Dúnıejúzilik robottar olımpıadasy,  bul 10-19 jas aralyǵyndaǵy 6-11 synyp oqýshylaryna arnalǵan baıqaý.

---