InfoHub Logo

 

Óńimde men bul jerdi kezbegenmin,

Shynyn aıtsam, bar-joǵyn sezbegenmin.

Al túsime osy shyń  jıi kired,

Sezem, sezem, jeri emes ózgelerdiń,

Tóskeıinen qansha jyl, ǵasyr ótti,

Qanshama urpaq almasty óńirińnen,

Qar kómkerdi, jańǵyrtyp jasyn ótti.

Ony qazir tap basyp aıta alar kim?

Tap bassa da, esesin qaıtarar kim?

Osy shyńǵa órleımin túsimde men,

Tún túndigin túrgende aıqara kún.

 

 

Qazyna izdep sabylam úńgirlerden,

Tosyn únnen seskenip kúńgirlegen,

Óz-ózime jatqanym saýal qoıyp,

İzdegenim altyn ba, múmkin, óleń?..

San úńgirdi sabylyp sharlap-sharlap,

Túk taba almaı kózimnen jasym parlap.

Oıanamyn, o, táýba-aı, erteń taǵy

Tús saparǵa shyǵamyn.

Maǵan arnap,

İzdemek bop tyǵylǵan qazynany,

Qanaǵat qyp az dáýlet, az murany,

Júrgen jan em, bul syrym Allaǵa aıan,

Joq izdetip nege úńgir qazdyrady?

Ne deseń de,

 

 

Tylsym syr ashylmaǵan,

Kórinedi kóp jaıdan basym maǵan.

İzdep júrgen qazynam óleńim be,

Jazylmaǵan,sonan soń basylmaǵan,

Jyr shashýym jurtyma shashylmaǵan?..

Nege únsizsiń, máńgi jas, jasyl ǵalam?

Súleımen Baıazıtov

---