InfoHub Logo

Biz qandaı da bir qyzmetti tóleı otyryp, qıyndyq týǵyzǵan máselelerdi sheshýge úmittenemiz. Mysaly, áýejaıda tasymaldaýshyǵa aqysyn tóleı otyryp, biz aýyr chemodandardy kóterýden qutylamyz. Biraq, ókinishke oraı, qoǵamdyq oryndarda qyzmet árqashan tıisti dárejede kórsetile bermeıdi: áýejaıda qaltańyzdan aqy tólep, uıaly telefonyńyzdy zarádtaı otyryp basyńyzǵa bále tilep alýyńyz ǵajap emes. 

Qaskúnemder qoǵamdyq USB-stansıalardy qorǵaýdan ilik taba otyryp, telefonǵa op-ońaı qosyla alady, sonymen qatar oǵan túrli zıandy baǵdarlamalar ornatyp, tipti sizdiń jeke málimetterińizdi júkteı alady.

IBM Security-degi X-Force Threat Intelligence-niń  vıse-prezıdenti Kaleb Barloý: «kópshilikke qoljetimdi USB-portqa qosylý jolda bireýdiń tis shetkasyn taýyp, ony paıdalanǵanyńyzben para-par. Siz onyń buryn sońdy kim paıdalanyp, qaıda jatqanyn bilmeısiz ǵoı. Qoǵamdyq  porttar derekterdi jibere alatynyn eskere júrińizder» — deıdi.

Aıta ketý kerek, 2019 jyly jarıalanǵan kórsetkishterge sáıkes, kıberqylmyskerler sońǵy birneshe jylda qoǵamdyq USB-stansıalardy qorǵaýdaǵy kemshilikterdi belsendi túrde paıdalana bastady. 2018 jyldyń qańtarynan bastap telefon zarádtaý stansıalary arqyly 566 mıllıon derek urlanǵan eken.

Al bundaı keleńsizdikten qutylýdyń joly bar ma? Árıne bar. Zarádtaý shnýryna deıin zarádtaý qurylǵysyna salynǵan arnaıy adapter bar jáne ol arqyly derekterdi jiberý buǵattalady, ol arqyly tek tok ótedi. Biraq ózińizben birge portatıvti zarádtaý qurylǵylaryn alý nemese áýejaıda bos toq kózin taýyp, ózińizdiń zarádtaǵyshyńyzdy paıdalanǵanyńyz jaqsy. Sondaı-aq Kaleb Barloý áýejaıdaǵy  áldebireýdiń umyt qaldyrǵan zarádtaý qurylǵysyn qoldanbaǵanyńyz jón ekenin ataı ketti. Zarádtaý symyna túrli zıandy baǵdarlamalardy telefonǵa taratatyn chıpti engizip qoıýy da múmkin. Al alaıaqtar mundaı baǵdarlamalardan qutylý úshin qarjy talap etýi ǵajap emes.

---