InfoHub Logo

Pan Gý aspan men jerdi, óziniń denesinen kún men aıdy, juldyzdardy, jazyqtyq pen taýlardy, ózen-kólderdi, ósimdikterdi, ań-qus, balyq pen jándikterdi jaratyp, tek adamzatty ǵana jaratpady. Sóıtip, álemge bir túrli tiri jan jetispeı, on segiz myń jyl qulazyǵan jaǵdaıda ótti.

Keıin aspan men jer ortasynda Núı Va atty bir áıel qudaıy paıda boldy. Kóptiń aıtýy boıynsha, ol Pan Gýdyń júreginen jaratylǵan. Pan Gýdyń rýhy bir kezderi oǵan: «Men seni eń sulý áıelge aınaldyramyn, senen asyp túsetin kelbet eshkimde bolmaıdy. Men ári saǵan erekshe batyldyq jáne álemniń rýhyn qutqaratyn qasıet beremin, saǵan men aıaqtap úlgermegen uly mindetti aıaqtaýdy tapsyramyn», – depti.

Núı Va Pan Gýdyń úmitin aqtaǵan joq. Ol óte sulý bolyp boıjetti, kúlgen kezde kóktemde jańa ashylǵan qyzǵaldaqqa uqsady. Biraq álemde tek jalǵyz ózi ǵana bolǵandyqtan, ol qatty zerikti. Osy kezde ol bulaq jaǵasyna sý ishýge keldi, sý betinde óziniń beınesin kórdi, dereý oılady: «Jer beti osynshama keń, men tárizdi kóptegen tirshilik bolsa, sonda ǵana bul dúnıeniń máni bolar edi», – dep oılanyp qalady. Osylaı ol bir sary topyraqty aldy da, oǵan biraz sý qosty, óziniń túrine sáıkes balshyqtan bir súıkimdi balanyń beınesin jasap shyqty. Balshyqtan jasalǵan bala jerge túse sala, «ana» dep daýystady. Núı Va óte qatty qýandy, birden bul jańadan jasalǵan tirshilik ıesin «adam» dep atady.

Sol kezde Núı Va sary topyraqtan kóptegen adamzatty jasaýǵa kiristi, mynaý keń-baıtaq álemniń shattyqqa tolýyna jaǵdaı jasaýǵa sheshim qabyldady. Ol sary topyraq pen sýdy paıdalanyp, kóptegen adamdardy jaratýyn jalǵastyrdy. Olar alǵys aıtyp, Núı Va analaryna tájim etip, dúnıeniń ártúrli buryshtaryna tarap ketti.

Núı Va túnimen eńbektendi. «Biraq jer beti shyndyǵynda óte keń eken, qalaısha onyń shet-shetin adamdarmen toltyrýǵa bolady?» – dep oılady. Núı Va aqyry bir jaqsy amal oılap tapty. Ol taýdan kóptegen shópterdi terip ákelip, olardan jip ıirdi, ony balshyq eritindisine batyryp, keıin bar kúshimen jazyq pen taýǵa qaraı silkip jiberdi, sansyz batpaqtar jerge shashyrap, olar birden kishkentaı adamdarǵa aınaldy.

Jer betiniń bary adamzatqa tolyp, Núı Va jumysyn toqtatty. Eger adamzattyń bir toby ólse, Núı Va taǵy bir tobyn jasady, biraqtan bylaı jasaý Núı Vaǵa óte qıyn boldy. Sol kezde Núı Va er adamdar men áıel adamdardyń bir-birimen kelisip, bala týyp, tárbıeleýine, urpaq jalǵastyrýyna ruqsat berdi.

Neke júıesin qalyptastyrǵan Núı Vany adamdar Qudaı dep atap, oǵan ǵıbadathana turǵyzdy. Ár jyly kóktemniń naýryz aıynda adamdar ǵıbadathanaǵa jaqyn jerde jınalyp, saltanatty jınalys ótkizetin. Jınalysqa jınalǵan adamdar Núı Vaǵa arnap kóńildi madaq jyrlaryn aıtyp, sol arqyly adamzattyń paıda bolýyna ólsheýsiz úles qosqan Núı Va áýlıeni eske alyp, oınap-kúlip qaıtatyn.

---