InfoHub Logo

Tama rýynan shyǵyp, elin jaqsy basqarǵan Qultas degen bolys elýden asyp qalǵan shaǵynda óz jaqyny Ońdybaı degen bala erjetip, bolystyqqa talasady. Bolystyqqa talas aıtysqa ulasady. Sodan eliniń qarıalary balanyń qaıtpaıtynyn sezip, ol eldiń qart synshysyna astyrtyn habarlasyp, «myna balany betinen qaıtarsyn» dep sálem joldaıdy. Al Ońdybaıdy qarıanyń qolyn alyp, bata alýǵa jiberedi. Ońdybaı kelgesin qarıa áńgimege aınaldyryp otyryp:

— Qultas atańnyń qara quly ǵoı, oǵan teń kelmeısiń, — degen sózdi aıtady.

Sonda alǵan betinen qaıtpaıtyn bir bet Ońdybaı turyp:

— Meni Qudaı Ońdybaı qylyp jaratsa, sizdiń batańyzsyz-aq Ońdybaı bolarmyn, — dep ornynan turyp, júre beripti.

Ońdybaıdyń qaıtpaıtynyn sezgen synshy Qultasqa sálem joldaıdy: «Kózi kók, raqymy joq, birbet jigit eken. Bolystyǵynyń jartysyn bólip bersin» degen sálemdeme jiberipti.

Sonymen, Ońdybaı bul jaqta júrgende ákesi Qultasty úıine shaqyryp, syılap kútken eken. Ákesi qara maıa, sheshesi janat ishik jaýyp jiberipti. Ony Ońdybaı jolshybaı esitip, ashýmen kelip sheshesine:

— Á, sheshe, qaınyńyz keldi me? Oǵan ne syı jasadyńyzdar? — depti.

Sonda sheshesi:

— Men janat ishik japtym, ákeń qara maıa mingizdi, — depti.

Sonda ákesi:

— Shesheń janat ishik japsa, qaınysyna japty. Men qara maıa mingizsem, seniń til jazańa mingizdim. Úlkenge tiliń tıip, úlkendi syılamadyń, — depti.

Aqyry Ońdybaı baqtalastyqpen Qultasty úzeńgige ý jaǵyp óltirip jiberedi eken.

---