InfoHub Logo

— Senderge birdeńe aıtsa, «aljyǵan adamnyń sózin aıtyp, osy zamanda» dep ózimizdi máńgúrt deısińder. Bosa da bastaǵan soń senseńder de, senbeseńder de aıtaıyn.

Osydan eki apta shamasynda birneshe qatyn bas qosyp, et kombınatyna et alýǵa bardyq. Osy jaqyn mańda bes bıeniń sabyndaı, oń jaq kózi jybyrlap júretin bir jesir qatyn bar, so da bizben birge bardy. Biz et kútip, onda qyrýar ýaqyt júrip qaldyq. Sóıtip, shetkerirek júrip kele jatyr edik, bir mezette álginiń aýzy sol jaǵyna qaraı qısaıa bastady da, álden soń álgi qısyq aýyz boldy da qaldy. Et alý turmaq, záremiz
ketti.

Sol áıel:

— Myna bizdiń ar jaǵymyzda turatyn pirádarǵa aparyp kórset, — dep jalynyp, jalpaıyp maǵan keldi. Aıaǵannan alyp bardym. Pirádar:

— Birdeńe degen sý perisi soqqan eken. Emdeýine (aqysy) bir qoı baıladym, — dedi. Sodan keıin emdep, betin beri qaratyp (túzep) berdi. Qazir sál ǵana kemdigi baıqalady. Múlde túzettirýge pul bermegen soń, barýǵa beti bolmaı júr. Nanbasań, sol qatynnyń ózin de, pirádardy da kórseteıin. Jáne bir aıtqany:

— Shyraǵym, óziń erkekti jaqsy kórip, kóringen erkekke ólip-óship turady ekensiń. Odan aýlaq bolǵaısyń. Sý perisiniń júrmeıtin jeri joq. Sondyqtan taza júrip saqtanǵandaryń jón, — dedi.

Basqa ne deıin, bul kisi óte bilikti adam, oqymysty, peri oqýyn oqyǵan. Qazaqtardyń aıtýynsha, qara sýdy teris aınaldyrady desedi. Óz bilýim — aldyna barǵanyńda senen ol eshteńe de suramaıdy. Ótken-ketken ómirińdi, ne boldy, ne qoıdy, ne bolǵaly jatyr (óziń týraly) aıtyp beredi. Áıteýir bir ǵajap jan, jasy qazir jetpisterde, balasy ólip, qazaly bop qaldy.

---