InfoHub Logo

1914 jyldar shamasynda Qamys Samarǵa pravıtel bolyp birinshi okrýgtiń adaıy Ájiǵalı Shyntaıuly keldi. Onyń pomoshnıgi Imanǵalı Meńdyhanov bolypty. Ájiǵalıdyń oqýy az, al Imanǵalı — kóp oqyǵan, burynǵy semınarıst. Ekeýi qalaıda sıysa almaıdy. Imanǵalı Ájiǵalıdy aryzdap qýady. Onyń zararyna sóz aıtýǵa Tańmergen Janqojaulyn, Tastanbek Jeldibaıulyn, Dúıse Túlkibaıulyn, Súndetqalı
Nursaryulyn aıǵaq etip kórsetedi. Sol kúndegi el adamdary Ájiǵalı Imanǵalıdy tatýlastyrýǵa araǵa júrip kelistirmekshi bolady. Imanǵalı ashýyn tastaıdy. Tek shart qoıady. Onysy tórt bıdiń ózimen birge bolýyn talap etedi. Bıler tórteýin shaqyrady. Dúıse májiliske kesh kelip qalady. Ájiǵalı úıinde qonaq bolyp, bári keńsege bitim qaǵazǵa qol qoıyp, isti kesýge shyǵady. Dúıse qozǵalmaı otyra beredi. Bestabaılar aıaq kıimin salyp dińkildep turady. Qaıta-qaıta:

— Dúıseke, keńsege baraıyq? — deıdi. Sonda Dúıse sóz bastap bylaı depti:

— Buqa býǵa asyq, tentek daýǵa asyq. Qulaǵan qus qýǵa asyq, qý sýǵa asyq, ótirikti bilmeıdi, jasaǵan Qudaı shynǵa asyq. Atqa minseń, shider sal, shider salsań, tıek sal. Eger tıek salmasań, atyńnyń ketýi shyn, ashyq, qasyǵyńdy maıǵa sal, aýzyńdy jyrtar nur qasyq, — depti.

Ájiǵalı aradaǵy bılerge:

— Dúısekemdi razy qylmaǵan ekensińder, — dep, janynan jıyrma bes som shyǵaryp beredi. Dúıse túregelip:

— Endi kebisimdi salmasańdar da, ózim kıip baram, — dep keńsege jóneledi.

---