InfoHub Logo

Yrǵyzdyń ońtústigine qaraı attasań, arqadaǵy kók oraı shalǵyn erkeletip tastaǵan kóziń burynǵylaryn kórý joq. Sur kilem sıaqty jazylyp jatqan meńireý shól. Ár jerinen kirli kóılek kórinip turatyn, tozǵan, jyrtyq jamaýly sur shekpenmen kıilgen dalanyń ústin bireý jaýyp qoıǵan sıaqty. Shekpenniń ana jerin otqa, myna jerin qaramaı tıgizip, ana jeriniń júnin uıpalap bireý áýrelep qoıǵan sıaqty. Uıpalanǵan júnniń ishinde ań-mań da kórinbeıdi, baıqap qaraǵanda ǵana kózińe bir nárse ilinedi.

Jeri sorǵa baı, topyraǵy ashshy, tuzdyqtyń beti sıaqtanyp qaımaqshyp jatady. Ústinde tis shuqyrlyq shóp joq. Jańa ǵana shashyn aldyrǵan tazdyń basy syqyldy. Aınala sur jýsan, buıra qum, biraq arqadaǵy ıisti kók jýsandaı emes, jińishke aýrý bolǵan adam sekildi qatyp qalǵan. Sor jaǵasynda jerge jabysyp, tyrbysyp jatqan qyna, jazylyp jatqan kıik oty.

Mańaıyndaǵy aýanyń ylǵalyn tuz «á» degenshe tartyp alady, dem alý qıyndalyp, tynys tarylady. Úırenbegen adam men kólik tez sharshap, áli qurıdy. Jazǵytury, kúzdi kúni jańbyr bastalǵanda, jer irkildep, oıylyp ketedi. Munyń artynan keýip, tus-tusyna jarylady, tas bolyp qatyp qalady. Kelesi jyly jazǵytury sý jaryqpen aǵyp, keńitip, qulatyp, saı qylady, jan-jaǵyna taǵy ashalar shyǵady, keı jerler ańǵar bolyp qalady, keı jerlerdiń jaryǵy laı batpaqpen sylanyp, tegistelip, bitelip qalady. Sondaı tegistelip qalǵan jerler ǵana jaryqsyz bolady. Bir shóp ıa bir butaǵa súrinemin dep qoryqpasyn, asyq oınaýǵa keletin tap-taza!

Jol tabany áldeqashan taptalyp, qatyp qalǵan, kóliktiń tuıaǵyna tıgende tasyrlap otyrady, temir tegermeshti arbalardyń da izi bilinbeıdi. Oıylyp qalǵan jol burańdap soǵady da otyrady. Burylyp shyǵyp ketý de ońaı jumys emes.

---