InfoHub Logo

Arǵyn qarakesek Bekbolat bıdiń báıbisheden toǵyz uly bolypty, toqaldan Tilenshi degen bir uly jáne bir qyzy bolypty. Bı qartaıypty. Turǵylas arǵynnyń jaqsylary kórise kelip: «Jasyńyz bolsa jetip kele jatyr, ornyńyzdy ustap, kisi bolýǵa balalaryńyzdyń qaısysyn uıǵaryp júrsiz? Kózińizdiń tirisinde bata bereıik dep kelip edik», — deıdi. Bekbolat tolǵanyp úndemeıdi, kózin jumyp otyra beredi. Sonda arǵyndardyń Bekbolattan jaýap kútip otyrǵanyn, bıdiń Tilenshini aıtaıyn dese báıbisheden jasqanyp otyrǵanyn shymyldyqtyń ishinde keste tigip otyrǵan qyzy biledi. Qyz shydamaı shymyldyqtyń bir shetin kóterip, jıylǵan kisilerge qarap: — «Qarakesekten shyǵyp, on eki baýly arǵyn senderdi ákem (Bekbolat) bıleýshi edi, áıel de bolsa, ákemdi sheshem bıleýshi edi, ákem sheshemnen qoryqpasa aıtpaıtyn nesi bar? Toqaldan týdy demese, Tilenshi jannyń el ustamaıtyn nesi bar?» dep shymyldyqty qaıta japty deıdi (qyz Tilenshimen birge týysqan eken).

Manadan tomsaryp otyrǵan Bekbolat kózin ashyp: — «Balamnyń sózi ras, sol nemeden úmitim bar edi, biraq el jumysynan oılaǵan oıy joq, qoıshy-qolańshymen oınaı berýshi edi, boıyn ustaı bilmeýshi edi», — deıdi. Sonda báıbishesi: — «Sol nemeden meniń de úmitim bar edi, túsimde bıdiń aq býra ıesi bar edi, onyń aq taılaq ıesi bar edi, áli turyp, áli shóge berýshi edi, eldi bir buzyp, bir túzeı me dep oılaımyn» — deıdi.

Tilenshi qaıda? — degende, Nuradan jylqy sýara ketip edi, deıdi. Otyrǵan arǵynnyń ıgi jaqsylary endi oǵan ózimiz baryp jolyǵyp, sol sýdyń jaǵasynda tileý qylyp, bata bereıik desipti. Bekbolat bári júzdeı kisi attanypty. Kelse, jylqysyn sýǵa jaýyp shyǵara salyp, Tilenshi ózen boıyndaǵy qoıshylarmen alysyp-julysyp oınap jatyr eken. «Aǵalaryń keldi» degen soń kıinip, aldarynan shyǵyp, Tilenshi sálem beripti. Sonda arǵynnyń álgi jaqsylary Tilenshige tus-tustan: — «Ákeń Bekbolat qartaıdy, on eki arys arǵyndy bılep edi, adam bola ma degen balasy sen ediń, qoıshy-qolańshymen alysyp-julysyp jatqanyń mynaý», — dep urysa bastaıdy.

Tilenshi tosyp alyp, aıtatyn aryzym bar dep, ulyqsatpen sóılepti:

— «Ákem Bekbolat edi, on eki arys arǵyn seni bılep edi, arǵyndardyń jýany kelse, qabaǵyn ashyp, jadyrap otyryp sóılesip, aryz-muńyn tyńdaýshy edi. Nashar, jińishke atanyń balalary aıdahardaı kórip, aıbatynan jasqanyp, aldyna kelmeıtin edi. Kelse, aryz-muńyn jóndep, boıyn bılep aıta almaı, kóbi aram ólip kete berýshi edi. Sonda oılaýshy edim: sondaı ónerdi qolǵa berer kún bolsa, aryzy jete almaǵan nasharlar jasqanbaı, armanyn aıtatyn kisi bolsam dep: sonyń úshin osy bastan bularmen oınap, boıyn úıir qylsam, qoryqpaı aryz armanyn aıtar edi, aram ólip ketpes edi degen oıym» — depti.

Arǵyndar: — «Balam, biz munyńdy bilgen joq edik, seniki maqul eken» dep bata berisip, tarqasypty.

---