InfoHub Logo

Jaıyqtan Shyǵysqa qaraı Amanqaraǵaı aǵashyna sheıin Torǵaı dýanyna ańtarylyp barǵan sary dala. Jaman qaladan ońtústikke qaraı tap Yrǵyz qalasyna sheıin jetkenshe eki ara jazyp salǵan kilemdeı tep-tegis, ádemi dala kóshpeli qazaqtardyń «shóbi mol, jeri — baı» deıtin Arqasy osy. Sol keń dalany Jem, Or, Yrǵyz degen úsh ózen kesip ótedi. Tushshy sýly ýaq kólder myń san, ásirese, keń dalanyń tamyry — Or mańynda sý kóp.

Qar kete dala naýryz aıynyń aıaǵynda-aq asyǵyp, kók oraı shalǵynǵa orana bastaıdy. Keń dala tutasynan irkildek mıge aınalady, ásirese, asty tastaı jerlerdiń beti mı, sabyr bolyp, júrgen attyń aıaǵyn batyryp otyrady. Jazǵyturǵy yssy kún dalany tez soryqtyryp, keptire bastaıdy. Topyraǵyn qyzdyra bastaıdy, sondyqtan kilem túgindeı kók maısa jer betin jasyra bastaıdy. Kórmegen kisi dala shóbiniń ásemdigin bile almaıdy.

Sál jel soqsa, boz ben betege jasyl teńiz sıaqty tolqyndaıdy, birine-biri bas ızep, teńselip, shaıqalady. Qyzyl, jasyl, aq kıgen qyz, kelinshek syqyldy báısheshekter jer betine óń beredi, jer qulpyryp, ajarlanady. Oıpań jerde qyp-qyzyl, jap-jasyl, appaq gúlder shaıqalady, kúnge kúlip, kózińdi qytyqtap, shaǵylystyrady.

Kóz toqtarlyq aǵash joq, biraq eski jurttyń kóńinde ósken kókqýraı men kisi boıyna jaqyndap soraıǵan oshaǵandar alystan aǵashtaı saǵymdanyp, kózdi aldaıdy. Saı jaǵasynda burań qaqqan jas taldyń sabaqtary, qalyń japyraqty tamyrsha aralap, shaıyrdyń hosh ıisin murnyńa jetkizedi. Jel soqty degenshe butalar basy shaıqalady, jaltyraıdy, aǵarady. Japyraǵynyń asty aq betin aýdaryp kórsetedi, jel tyndy degenshe jaǵadaǵy altyndaı jyltyldaǵan sary qumnyń ústinde qaraýyta qoıady.

Kóbelekter ersili-qarsyly seńdeı soǵylysyp, qalbaqtaıdy, birin-biri qýalap, jarysyp zeń salady. Myń san shegirtkeniń tyrsyly qosylǵanda qulaq sarsıdy. Ara men kók shybyndar tizbektesip tanysqan qyzdarsha yńyldap, yzyńdaıdy. Qara qońyzdar shóp arasynda ysyldap-pysyldap Táńirige jazady.

---