InfoHub Logo

- Meni jurt qatal oqytýshy dep aıtady, - deıdi oqytýshy. - Stýdentterin qınaıdy deıdi, olarǵa qoımaıdy deıdi. Mundaı áńgimeler ózimniń de qulaǵyma jetip jatady. Tipti birde rektorǵa deıin jetipti. "Órken, seni jurt solaı dep aıtyp júr ǵoı, nege stýdentterińdi qınaısyń?" - dedi rektor. "Onda sabaq suramastan qoıyp bere bereıin", - dedim. "Men olaı dep turǵan joqpyn, - dedi rektor. - Biraq stýdentter de adam balasy ǵoı. Kishkene túsinistikpen qarasańdar bolmaı ma?"

Birde bir qyzyq oqıǵa boldy. Jazǵy ýaqyt edi. Jazǵy sesıanyń bastalǵan kezi. Oqý ornynan shyǵyp, jaıaý júrginshiler júretin soqpaqqa túsip alyp kele jatqanmyn. Bir kezde joldyń jıeginde otyrǵan bir kelinshekke kózim túsip ketti. Álgi kelinshektiń túri degen ábden ábirjip ketken. Ózi jerge tóselip, jaıǵasyp otyryp alypty. Janyna eriksiz aıaldadym. Túrine qarap aıap kettim.

- Qaryndas, - deımin álgi kelinshekke, - túrińiz nege sonsha ábirjip ketken? Ne jaǵdaı bolyp edi?

- Aýyldan kelip edim, - deıdi kelinshek. - Myna oqý ornynyń syrttaı bóliminde oqýshy edim. Bir oqytýshynyń sabaǵynan ala almaı ábden ábirjip ketkenim.

Qanym basyma shyqty. "Ol neǵylǵan oqytýshy?! Adam degendi osyndaı kúıge túsirýge bola ma?! Bul da bir qazaqtyń balasy ǵoı. Álgi oqytýshyń da osyndaı anadan týǵan shyǵar?!"

- Qaryndas, - deımin álgi kelinshekke ıile túsip. - Men de osy oqý ornynda oqytýshy bolyp jumys isteımin. Múmkin álgi oqytýshyny tanıtyn shyǵarmyn. Famılıasy kim edi? Aý, oǵan el bolyp, halyq bolyp jabylyp júrip túsindireıik. Adam degendi osyndaı kúıge túsirýge bola ma?

Sóıtsem, álgi kelinshektiń aıtqany:

- Ol - siz, - deıdi.

Shoshyp kettim. Men ózimshe stýdentterimdi bilimge, izdeniske jeteledim dep oılap júrmin. Sóıtsem, olar osyndaı kúıge túsip ketken eken ǵoı.

Dereý sheshimge keldim.

- Topqa aıtyńyz. Erteń dárishanada jınalyp otyrsyn. Men kelemin, - dedim.

Erteńine keldim de, sabaq suramastan bárine qoıyp jiberdim. Máz-meıram boldy da qaldy. Ózimniń de arqamnan bir aýyr júk túsip qalǵandaı boldy. Adamǵa jaqsylyq jasaǵan degen qandaı jaqsy!

Munyń taǵy da qyzyǵy bar. Endi kelesi jyl keledi ǵoı. Kelesi kýrs ta jyljyp aldyma keledi. Olar da meniń sabaǵymdy oqıdy. Dál tapsyratyn kúni dárishanaǵa kirem ǵoı. Oıymda eshteńe joq, stýdentterge:

- Qalaı, daıynsyńdar ma? - deımin.

Sóıtsem, álgiler:

- Daıynsyńdar ma degenshe, odanda qoıyp jibermeısiz be?! - deıdi.

"Mynalardyń esteri durys pa? - deımin ózime-ózim. - Álde aqyldarynan adasaıyn degen be? Áı joq, sháı joq, maǵan edireńdegenderi nesi?"

Ómirimde stýdentterim bulaı sóılep kórmegen ǵoı.

- Senderdiń esteriń durys pa? Men senderge ne dep qoıyp jiberýim kerek?! Kózderińdi ashyńdar. Aldaryńda oqytýshylaryń tur. Sender ózderińniń stýdent ekendikterińdi umyttyńdar ma?!

Sóıtsem, analar da aıylyn jıatyn emes.

- Ne, byltyrǵy stýdentterge qoıyp jiberipsiz ǵoı! Biz toqaldan týdyq pa?! - deıdi.

Sol kezde baryp mańdaıymdy alaqanymmen sart etkizippin. Men ózimshe jaqsylyq jasadym dep júrmin. Sóıtsem, álgiler júgirip baryp tómengi kýrsqa jetkize qoıǵan eken ǵoı. Bir esalań oqytýshyny taýyp aldyq degen shyǵar, sabaq suramastan qoıyp bere beretin.

Aıǵaıdy saldym kelip:

- Boılaryńdy jınap ustańdar! Sender tym erkinsip bara jatyrsyńdar ǵoı! Men - oqytýshymyn! Káne, sabaqtaryńa daıyndalyńdar!

- Sodan beri, - dep kúldi oqytýshy. - Qaıtadan qatal minezimdi taýyp alǵanmyn.

---