Oqý grantyna úmitkerler arasynda muǵalimdik kásip tanymal boldy
2016 jylǵy oqý granttary úshin talapkerler kóbirek tapsyrǵan mamandyqtardyń arasynda geografıa jáne alǵashqy áskerı daıyndyq muǵalimdigi tanymal boldy. Bul týraly búgin Astana Bilim granttaryn bólý jónindegi respýblıkalyq konkýrstyq komısıanyń otyrysynda QR BǴM Joǵary jáne joǵary oqý ornynan keıingi bilim departamentiniń dırektory mindetin atqarýshy Gúlzat Kóbenova málim etti.
Atap aıtqanda, aǵymdaǵy jyly 97 myń talapkerdiń ishinde 60 myńǵa jýyǵy oqý granttaryn alý konkýrsyna qatysýda. Jalpy, 32 myńǵa tarta grant bólinip otyr.
«Qazaq tilinde «Geografıa» baǵytynda bilim alýǵa konkýrs bir orynǵa 28 adamnan, «Alǵashqy áskerı daıyndyq» - 22 adam, «Mýzykalyq bilim» - 18, «Beıneleý óneri» - 14, «Pedagogıka jáne psıhologıa» - 12 adam úmitker. Eger de orys bólimderine toqtalatyn bolsaq, onda «Geografıa» mamandyǵy boıynsha bir orynǵa 18 adam úmitti, «Alǵashqy áskerı daıyndyq» baǵytynda - 15, «Beıneleý óneri» - 11. Bul rette muǵalimdik kásip mektep jáne kolej túlekteri arasynda tanymal bolyp otyrǵandyǵyn baıqalýda», - dedi ol.
Sonymen qatar G. Kóbenova bıyl tehnıkalyq mamandyqtarǵa stýdentter arasynda eleýli konkýrs baıqalyp otyrǵandyǵyn atap ótti. Qazaq bólimderinde «Geodezıa jáne kartografıa» (bir orynǵa 7-den astam úmitker), «Aqparattyq júıeler» (tórtten astam), «Elektroenergetıka» (tórtten astam) baǵyttarynda konkýrs kóbirek.
Orys tili bólimderinde «Geodezıa jáne kartografıa» boıynsha bir orynǵa altydan astam úmitker, al «Elektroenergetıkada» - tórtten asyp otyr.
Osy arqyly atalǵan mamandyqtarǵa konkýrs ortasha eseppen alǵanda bir orynǵa 2-7 adamǵa úmitti bolǵan.
Munymen qosa, aýyl sharýashylyǵy salasyndaǵy mamandyqtarǵa da joǵary konkýrstyq deńgeı tirkelgen eken. Budan bólek, «Stomatologıa» baǵytynda bilim alýǵa nıettiler kóp tirkeldi. Sondaı-aq orys bóliminde «Halyqaralyq qatynastar» boıynsha bir orynǵa - 22 adam, «Quqyqtanýda» -12 adam úmitti.
«Bıyl memlekettik tapsyrysty qalyptastyrý eldiń áleýmettik-ekonomıkalyq damý basymdyqtaryna negizdeldi. Osy oraıda atalǵan basymdyqtardy eskere otyryp, 12 593 grant tehnıkalyq jáne tehnologıalyq mamandyqtarǵa eskerilgen. Sonymen qatar, 5 000 grant - pedagogıkalyq, 2 690 grant - aýyl sharýashylyǵy men veterınarıa mamandyqtaryna, 3 000 grant - medısınalyq salaǵa mamandyqtarǵa bólinip otyr», - dedi QR Bilim jáne ǵylym mınıstri Erlan Saǵadıev.
You Might Also Like
-
QR Bilim jáne ǵylym mınıstriniń 2016 jylǵy 27 shildedegi buıryǵymen orta bilim berý mekemelerinde jańa oqý jylynyń bastalatyn ýaqyty jáne oqý barysyndaǵy kanıkýldar uzaqtyǵy belgilendi.
-
Qazaqstan halyqaralyq kelisimder aıasynda segiz eldiń azamattaryna 100-den astam oqý grantyn bólýdi josparlap otyr. Bul týraly búgin Astana Bilim granttaryn bólý jónindegi respýblıkalyq konkýrstyq k...
