InfoHub Logo

Jer men kóktiń ortasy ashyla qoımaǵan, qara túnekke oranǵan ǵalam baǵzy bir zamanda jumyrtqa ispettes bolypty-mys. Osy bir jumyrtqanyń ishinde Pan Gý esimdi jigit shyrt uıqyda bolypty. Ol jumyrtqa ishinde uıyqtaǵan saıyn ósip, ósken saıyn úlken kúsh ıesine aınalady. Ańyz boıynsha, ol qytaı ultynyń túp atasy. Pan Gý on segiz myń jyl shyrt uıqyda bolady. Bir kúni ol kenetten oıansa, jan jaǵy qara túnek. Sol sátte ol qolyna balta alyp, qara túnekti bar kúshimen qaq bóledi. Osy qatty daýystan jumyrtqa eki bólikke bólinedi. Jeńil ári taza zattardyń barlyǵy kókke kóterilip, aspan álemin qurasa, aýyr ári las zattar aqyryndap tómenge túsip, qara jerdiń negizin quraıdy. Osylaısha jer men kók ekige bólingen desedi.

Pan Gý jer men kóktiń qaıta birigip ketýin aldyn alý úshin jelkesimen aspandy, aıaǵymen jerdi, bar kúshimen eki ortany dińgek syndy ustap turdy. Al ýaqyt óz aǵymymen óte berdi. Aspan kún ótken saıyn óse berdi, al qara jer kún ótken saıyn qalyńdaı tústi. Al Pan Gý she, ol da kúnnen kúnge ósip, osylaısha arada on segiz myń jyl ýaqyt óte shyqty, Pan Gýdiń boıy 90myń lı bıiktikke jetti.

Arada talaı jyldar zymyrap taǵy óte shyqty, aspan men jer óz ornyna qatyp qaldy, endigi jerde olardyń arasynyń qaıta qosylyp ketý qaýpi joıyldy. Bar kúsh-jigerimen, jalǵyzdyqpen osynsha jyl tik turyp qyzmet etken Pan Gý aqyr aıaǵynda bar kúshin sarp etip mert boldy.

Onyń qazasynan keıin sol kózi kúnge aınaldy, oń kózi jarqyraǵan altyn aıǵa aınalsa, aıaq qoly álemniń tórt buryshyna negiz boldy, denesi taýlarǵa, demi jel men bulttarǵa, boıyndaǵy qany ózenderge, bulshyq etteri jerge aınaldy, shashtary aspandaǵy juldyz bolsa, tisteri men súıekteri altynǵa jáne tastarǵa aınaldy, denesiniń qyldary ajarly ósimdikter álemine aıaldy, al onyń denesinen bólinetin ter jańbyr sýy men shyqqa aınaldy.

Osylaısha, álemniń jaratylý jolynda Pan Gý aıamaı ter tógip, ózin qurban etti.

---