InfoHub Logo

Sýda pisirilgen et

Jumystyń oryndalýy

Pisirý úshin ázirlengen massasy 2 kg etti sýǵa (ystyq) salyp qaınatady. Kóbigin túsiredi jáne qaınatpaı pisirip  (90⁰S temperatýrada) daıarlyqqa  jetkizedi. Osylaısha pisirýdiń nátıjesinde erigish zattar men sýdyń shyǵyny azaıady. Et shyryndy keledi jáne pisirý prosesi birqalypty júredi. Etti hosh ıistendirý úshin pisirý aıaqtalýǵa 30-40 mın qalǵanda tuz salady. Lavr japyraǵyn jáne dánekti burysh salýǵa bolady.  Ár sybaǵaǵa 1-2 danadan keletindeı etip pisken etti kóldeneń sybaǵa kesekterine týraıdy (shyǵym: 50, 75, 100g). Ystyq sorpa quıady, qaınatady jáne jel qaqpas úshin ári qurǵamas úshin, marmıtte saqtaıdy. Usynar kezde tárelkege nemese tabaqqa garnır salady, janyna et qoıady. Maı ne sorpa quıady.  Jelkók qosylǵan qaımaq tuzdyǵyn, qyzyl, pıaz  tuzdyǵyn bólek beredi.  Sıyr etin pisken kartoppen, kartop pisirmesimen, kóbeıtilgen  kókónispen, sábizben nemese sút tuzdyǵyndaǵy kókpen, sýsymaly botqamen qosa beredi. Qoı etin kóbeıtilgen kúrishpen, shoshqa etin buqtyrylǵan  oramjapyraqpen jáne sıyr, shoshqa etterine qyzyl tuzdyq, al qoı etine aq tuzdyq úılesimdi bolýyna sáıkes qosyp beredi.

       Pisken shúrek et nemese sardelkıler

Jumystyń oryndalýy

Sardelkıden shıram jipti alady, al shúrek etten aldyn ala jasandy qabyǵyn alady. Ázirlengen sardelkı men shúrek etin qaınap turǵan, azdap tuz qosylǵan sýǵa (1kg ónimge 2l sý) salady da qaınatady. Otty baıaýlatyp, shúrek etti 3-5 mın qyzdyrady, al sardelkıdi 7-10 mın qyzdyrady. Uzaq qaınatatyn bolsa ónim qabyǵy jarylyp, sýdy boıyna sińirip dámsizdenedi. Olardy pispe sýynda 20 mın artyq ýaqyt saqtaýǵa bolmaıdy. Usynar kezde tárelkege nemese tabaqqa kartop púresin, buqtyrylǵan oramjapyraq, kók burshaq, sýsymaly botqa salyp, janyna shúrek etin ne sardelkı qoıyp, maı ne qyzyl, tomat, qysha qosylǵan pıaz tuzdyqtaryn quıady.

            Pisirilgen san, arqa-bel etteri

Jumystyń oryndalýy

Bul taǵamdy daıarlaý úshin ystalyp (súrlenip) pisirilgen jáne sýda pisirilgen et ónimderi qoldanylady. Olardy usynar aldynda sybaǵa kesekterine týraıdy, sorpa quıady jáne qaınatady. Súrlengen arqa-bel jáne tós etterin pisiredi, súıegin alady, terisin sypyrady. Jartylaı súrlengen san etin aldyn ala jýady jáne muzdaı sýda 2,5-3 saǵat ustap tuzyn azaıtady. Usynar kezde tárelkege ne sybaǵa tabaǵyna kartop púresin ne pisken kartop, kók burshaq salady da janyna vechına salady. Qyzyl, jelkók qosylǵan qaımaq tuzdyqtaryn nemese sharap qosylǵan qyzyl tuzdyq qosyp beredi.