InfoHub Logo

Túrli tústi qalampyr (gvozdıka raznosvetnaıa, Dianthus versicolor Fisch) — shóp tektes ósimdik. Onyń japyraqtary ósip shyqqan jerlerinde býnaqtary bolady, sabaqtary jumyr, túzý ósedi. Bıiktigi 60 santımetrdeı. Tamyry jýan, qosymsha tamyrlary da bar. Japyraqtary qarama-qarsy ornalasqan, otyrmaly, qandaýyr tárizdi. Gúlderi iri, qyzyl tústi, ósimdiktiń joǵarǵy jaǵyna bir-birden ornalasqan. Maýsym-shilde aılarynda gúldeıdi. Taý etekterinde, qaraǵaıly ormandarda, shabyndyqtarda ósedi. Dári jasaý úshin ósimdiktiń jer ústindegi bóligin gúldegen kezinde jınap alady.

Quramynda saponınder, alkaloıdter, krıstaldy zattar, askorbın qyshqyly bar. Uzaqqa sozylǵan zertteýler nátıjesinde qalampyr tunbasynyń jatyrdy óte jaqsy jıyryltatyn qasıeti anyqtaldy. Osy maqsat úshin qoldanylyp júrgen keıbir dárilerge qaraǵanda qalampyrdan jasalǵan dárilerdiń áseri 3-4 ese az, biraq onyń esesine odan jasalǵan dáriniń organızmge eshqandaı zıandy áseri joq. Sondyqtan ony jatyrdyń bulshyq etteriniń kúshi azaıǵanda, etekkir óte kóp mólsherde kelgende paıdalanady. Halyq medıdınasynda qalampyrdy jatyrdan jáne gemoroı túıinderinen qan ketkende de paıdalanady.

Qoldaný tásili

Qalampyr shóbiniń 15 gramyn qaınap turǵan 1 stakan sýǵa salyp tundyrady da, súzip alyp 1 as qasyqtan kúnine 3 ret ishedi.

---